Twinthe nĩtũbataraga mbeca kenda twiingia moobatu ja nja cietũ. (Njuno 30:8) Kinya “mbeca” nĩ ũkaria. (Mutumiiria 7:12) Bũrĩ mũkũrũ na mwekũrũ, kwomba kwĩthĩrwa kũrĩ na inya kwaarĩĩria mantũ jegiĩ mbeca, ĩndĩ menya bũreka mbeca ireeta mathĩĩna kĩrĩ mũranũ jwenu. (Aefeso 4:32) Mũkũrũ na mwekũrũ babuĩri gwĩtĩkania na kũgwatanĩra rĩrĩa bagũtua ũrĩa bagatumĩra mbeca.

ŨRĨA BIBIRIA YUUGAGA: “Ni muntu uriku kiribwi, akienda gwaka nyomba ya ngoroba, utiambaga gukara nthi atara mbia ciawe cia kumiakithia, amenya kethira ari na ing’ani cia kumiujuria?” (Luka 14:28) Nĩ bwega kũbaanga bũrĩ amwe ũrĩa bũgatumĩra mbeca cienu. (Amosi 3:3) Rĩĩkanieni kĩrĩa bũkũbatara na nĩ mbeca ing’ana bũrĩnacio cia gũtumĩra. (Njuno 31:16) Nĩũntũ bwa kwĩĩthĩrwa bũrĩ na mbeca cia kũgũra gĩntũ, tĩ kuuga no mwanka bũkĩgũre. Gerieni kweebana na ĩraandũ. Tumĩreni mbeca irĩa bũrĩ nacio akĩ.—Njuno 21:5; 22:7.

ŨRĨA BŨŨMBA KŨTHITHIA:

• Kethĩra kũrĩ na mbeca bũratigaria nyuma ya kwiingia moobatu ja gĩtũmi, baangeni bũrĩ amwe ũrĩa bũkathithia nacio

• Kethĩra bũtĩ na cia kũng’ana, baanganieni ũrĩa bũkanyiyia ũtumĩri bwenu. Ngerekano, rugeni biakũria bienu antũ a kũrĩa mĩkaweene

ŨRĨA BIBIRIA YUUGAGA: ‘Thithia mantu jaria Mwathani oonaga jaagirite, na tiwe wenka, indi nkuruki kinya antu bangi bonthe.’ (2 Akorintho 8:21) Menyithia ũrĩa bũgũreene nawe ũmma bwĩgiĩ mbeca irĩa wonaga na ũrĩa ũcitumagĩra.

Rĩonthe, aranĩria na mũkũrũ kana mwekũrũ waaku rĩrĩa ũgũtua matua jamarito jegiĩ mbeca. (Njuno 13:10) Kwaarĩĩria mantũ jegiĩ mbeca gũkabũteethia kwĩĩthĩrwa na thĩĩrĩ mũranũne jwenu. Ona mbeca irĩa ũthũnkũmaga tĩ ta ciaku wengwa, ĩndĩ ta mbeca cia nja yaaku.—1 Timotheo 5:8.

ŨRĨA BŨŨMBA KŨTHITHIA:

• Rĩĩkanieni nĩ mbeca ing’ana o ũmwe weenu oomba gũtumĩra atĩũrĩtie ũngĩ

• Menya bweteera mwanka thĩĩna yuumĩra rĩu bwaarĩĩria mantũ jegiĩ mbeca