Muambi 3:1-22
3 Kudi tshikondo tshisungula bua tshintu tshionso,Tshikondo tshia bualu buonso muinshi mua diulu:
2 Tshikondo tshia kuledibua ne tshikondo tshia kufua;Tshikondo tshia kukuna ne tshikondo tshia kujula bivuabu bakune;
3 Tshikondo tshia kushipa ne tshikondo tshia kuondopa;Tshikondo tshia kupula ne tshikondo tshia kuibaka;
4 Tshikondo tshia kudila ne tshikondo tshia kuseka;Tshikondo tshia kuela kabobo ka muadi ne tshikondo tshia kuja maja;*
5 Tshikondo tshia kuimansha mabue ne tshikondo tshia kukunguija mabue kaba kamue;Tshikondo tshia kupukilangana ne tshikondo tshia kubenga kupukilangana;
6 Tshikondo tshia kukeba ne tshikondo tshia kulekela tshintu bu tshikadi tshijimine;Tshikondo tshia kulama ne tshikondo tshia kuimansha;
7 Tshikondo tshia kupanda+ ne tshikondo tshia kutela;Tshikondo tshia kupuwa+ ne tshikondo tshia kuakula;+
8 Tshikondo tshia kunanga ne tshikondo tshia kukina;+Tshikondo tshia kuluangana mvita ne tshikondo tshia ditalala.
9 Ntshinyi tshidi muenji wa mudimu upetela ku makanda ende onso adiye ufila?+
10 Ndi mumone mudimu udi Nzambi mupeshe bana ba bantu bua bikale anu ne tshiakuenza.
11 Yeye mmuenze tshintu tshionso tshilengele* mu tshikondo tshiatshi.+ Uvua mene muteke lungenyi lua dikalaku tshiendelele mu muoyo wabu; nansha nanku bantu kabakujingulula mudimu udi Nzambi mulelela muenze ku ntuadijilu too ne ku ndekelu to.
12 Ndi mufike ku dimona ne: kakuena tshintu tshimpe kudibu tshidi tshipite kusanka ne kuenza malu mimpe matuku abu a muoyo,+
13 kabidi ne: muntu yonso adie, anue ne apetele disanka mu mudimu wende wonso mukole. Ndipa dia kudi Nzambi.+
14 Ndi mufike ku dimanya ne: bualu buonso budi Nzambi mulelela wenza nebushalaku kashidi. Kakuena tshia kusakidilaku ne kakuena tshia kumbushilaku to. Nzambi mulelela mmuenze nanku bua bantu bamutshine.+
15 Tshionso tshidi tshienzeka tshikavua tshimane kuenzeka, ne etshi tshidi ne bua kulua tshikavua tshimane kuikalaku;+ kadi Nzambi mulelela udi ukeba tshidibu bipatshila.*
16 Ndi mumone kabidi bualu ebu muinshi mua dîba ne: Malu mabi avua pa muaba wa kulumbuluisha kuakane, ne malu mabi avua pa muaba wa buakane.+
17 Ke meme kuamba mu muoyo wanyi ne: “Nzambi mulelela neabalumbuluishe buonso buabu, muntu muakane ne muntu mubi,+ bualu tshikondo tshidiku bua bualu buonso budi buenzeka ne bua tshienzedi tshionso.”
18 Ngakamba kabidi mu muoyo wanyi bua bana ba bantu ne: Nzambi mulelela neabatete ne neabaleje ne: badi bu nyama,
19 bualu kudi bualu budi bufikila* bantu ne bualu budi bufikila nyama; bionso bidi ne bualu bua muomumue budi bubifikila.+ Mudi umue ufua, ke mudi mukuabu ufua; buonso buabi bidi ne nyuma* umue.+ Nunku muntu ki mmupite nyama to, bualu malu onso adi tshianana.
20 Bionso bidi biya muaba wa muomumue.+ Bionso mbifumine ku lupuishi,+ ne bionso bidi bipingana ku lupuishi.+
21 Nnganyi udi mumanye bushuwa bikala nyuma* wa bantu ubanda muulu, anyi bikala nyuma* wa nyama upueka muinshi mua buloba?+
22 Nunku, ngakamona ne: kakuena tshintu tshimpe bua muntu tshidi tshipite kupetela disanka mu mudimu wende,+ bualu edi ndifutu diende;* bualu nnganyi udi mua kumupesha bukole bua kumona malu alua kuenzeka panyima yeye katshiyiku?+
Note
^ Ku mua.: “kutumpika; kubosoka.”
^ Anyi “tshilongolola bimpe; tshiakane; tshikumbane.”
^ Anyi pamuapa: “tshikadi tshipite.”
^ Anyi “nshikidilu bua.”
^ Anyi “mupuya wa muoyo.”
^ Anyi “mupuya wa muoyo.”
^ Anyi “mupuya wa muoyo.”
^ Anyi “etshi ntshiende tshitupa.”
