Dialufiaulwisu mu zaya vo Nzambi omonanga e mpasi za wantu ye osinga vanga diambu mu kuma kia mpasi zozo. (Nkunga 72:13, 14) Muna Diambu diandi, Nzambi osianga nsilu vo awana ‘bemweswang’e mpasi bevevolwa.’ Nkia ntangwa? “Muna lusengomoko lwa Mfumu Yesu tuka kuna zulu kumosi ye mbasi zandi zankuma . . . kalanda e kunda kw’awana balembi zaya Nzambi ye kw’awana ke belemvokelanga ko e nsangu zambote mu kuma kia Mfumu eto Yesu.” (2 Tesalonika 1:7, 8) O lusengomoko lwalu lwa Yesu luvangama muna “vit’a lumbu kianene kia Nzambi a Mpungu-ngolo” eyi iyikilwanga vo Armangedo.—Lusengomono 16:14, 16.

Muna nwana e vita yayi, Nzambi kesadila wantu ko. Kansi, Mwan’andi Yesu Kristu kesadila kumosi ye mbasi zakaka zankuma. Yau befokola lubangamu lwawonso.—Yesaya 11:4; Lusengomono 19:11-16.

E mpila o Nzambi kebadikilanga e vita ke yasoba ko. Kuna kwa yandi, e vita i mpila yansongi ya fokolwela e mbi yo lubangamu. Kansi, nze una usonganga lusansu, Nzambi kaka una yo nswa wa sikidisa e ntangwa ifwete nwanua e vita ye awana  bafwete yo nwana. Nzambi wasikidisa vo e vita ifokola e mbi yo tanina awana bebangikwanga, kuna sentu kaka ikala. Wasikidisa mpe vo Mwan’andi Yesu Kristu yandi onwana e vita yayi. Ediadi disongele vo Nzambi keyikamanga vita ko zinwanwanga o unu.

Muna bonga e nona, yindula vo wana wole benwananga ekolo se diau kena ku nzo ko. I bosi, bayambwidi nwana yo bokela o se muna telefone. Konso muntu mu yau ovovele vo nkwandi i nkwa kuma. Ozevo, yau awole babokele se diau muna vava e ndungidi. Vava o se kabawidi, ubavovese vo bayambula o nwana, bavingila yavana kevutuka muna singika e diambu diodio. I bosi, bayantikidi diaka nuana. Vava se kalweke, ofungidi makasi yo tumba yau awole wau vo bankolamene.

Vava wantu benwananga vita, nkumbu miayingi belombanga lusadisu lwa Nzambi. Kansi, Nzambi ke yikamanga vita zazi ko. Nkand’a Nzambi usonganga ziku kia diambu diadi. Uvovanga vo: “Ke nuvutula muntu mbi muna mbi ko . . . Ke nulandi kunda ko.” (Roma 12:17, 19) Vana ntandu, Nzambi okutuzayisanga vo ‘twantadila’ yovo twavingila kuna luzindalalu lwawonso muna yandi yavana ketwasa vita ya Armangedo muna singika mambu ova nza. (Nkunga 37:7) Vava wantu benwananga vita muna singika mambu mu mpil’au yo lembi vingila yavana Nzambi kevanga wo, Nzambi okendalalanga yo badikila dio vo vangu dia ukolami. Muna kuma kiaki, Nzambi ofwasa wantu awaya muna vita ya Armangedo yo singika emvimba e ntantani zawonso, “osima vita yakuna nsuk’a nza.” (Nkunga 46:9; Yesaya 34:2) Ozevo, Armangedo i vita ifokola e vita zawonso mu nza.

E mfoko a vita i zimosi muna nsambu kitwasa e Kintinu kia Nzambi. Yesu wayika luyalu lwalu vava kavanga e sambu eki kitomene zayakana: “E Kintinu kiaku kiza. O luzolo lwaku lwavangama ova ntoto nze koko zulu.” (Matai 6:10) Kintinu kia Nzambi ke kisinga fokola kaka vita ko, kansi kifokola mpe e mbi eyi itwasanga e vita. * (Nkunga 37:9, 10, 14, 15) Muna kuma kiaki, alandi a Yesu bevingilanga y’etima diawonso e nsambu ketwasa o Nzambi muna Kintinu kiandi.—2 Petelo 3:13.

Kolo kwa diaka tuvingila yavana Nzambi kefokola emvimba e mbi, mpasi yo lubangamu? E ndungan’a ungunza wa Nkand’a Nzambi isonganga vo mu “lumbu yambaninu” tuzingilanga. (2 Timoteo 3:1-5) * Ke kolo ko, Kintinu kia Nzambi kifokola e lumbu yayi yambaninu muna vita ya Armangedo.

Awana ‘ke belemvokelanga nsangu zambote ko mu kuma kia Mfumu eto Yesu,’ yau besinga fwaswa muna vita ya Armangedo. (2 Tesalonika 1:8) Kansi, sungamena vo Nzambi keyangalelanga lufwa lwa muntu ko kana nkutu lwa kimpumbulu. (Yezekele 33:11) Wau vo Nzambi “kazolele ko vo muntu kafwa” muna vita yayi, ovanganga mawonso kimana e nsangu zambote mu kuma kia Mfumu eto Yesu ‘zasamunwa mu nza yawonso, muna umbangi kwa zula yawonso’ vitila e mbaninu yiza. (2 Petelo 3:8, 9; Matai 24:14; 1 Timoteo 2:3, 4) E salu kia samuna e nsangu zambote kisalwanga kwa Mbangi za Yave, kivananga e lau kwa wantu bazaya Nzambi yo lemvokela malongi ma Yesu muna zingila mu nza yakondwa e vita.