Kuna kwa Esi Roma 12:1-21
12 Dianu vo, ampangi, inuwondelele muna nkenda za Nzambi nuatambika e nitu zeno+ se kimenga kia moyo, kiavauka,+ kiatondakana kwa Nzambi, se salu kieno kiavauka muna nyindu asikila.+
2 Nuyambula kuyifwananisa ye tandu* kiaki, kansi nuvanguluka muna soba nyindu mieno,+ kimana nuazaya*+ owu wina luzolo lwa Nzambi, lwambote, lwatondakana ye lwalunga.
3 Kadi muna nsambu za Nzambi zina yavewa, mpovele kwa konso muntu muna yeno vo kayindula ko vo osundidi kikilu o mfunu lutila mpila ina kenena,+ kansi kayindula kaka muna mpila yambote, mun’owu wa tezo kia lukwikilu+ Nzambi kavana kwa konso muntu.
4 Kadi wauna tunina ye yîkwa yayingi mu nitu mosi,+ kansi konso kîkwa kina yo mfunu andi,
5 i wau mpe tuna oyeto, kana una vo ayingi tuna, tu nitu mosi kaka muna Kristu, kadi tu yîkwa yayikakiana muntu yo nkwandi.+
6 Dianu vo, wau tuna ye tukau twaswaswana mun’owu wa nsambu za Nzambi zina twavewa,+ avo lukau lwa sakula, yambula twasakula mun’owu wa tezo kia lukwikilu twavewa;
7 avo uselo, yambula twayivana muna uselo weto; ndiona olonganga, yambula kayivana muna longa;+
8 ndiona okasakesanga,* yambula kakwamanana kasakesa;*+ ndiona okayanga, yambula kakayila kuna mvevo;+ ndiona ovitang’o ntu, yambula kavangila wo ye fululu kiawonso;+ ndiona osonganga nkenda, yambula kavangila wo kuna kiese.+
9 O zola kweno yambula kwakondwa kuyivunina.+ Numwena dina diambi e ngemi;+ nutatidila dina diambote.
10 Muna nzolani a ungudi, nusongaziana walakazi. Nuvitanga o ntu muna zitisa muntu yo nkwandi.+
11 Nukala akwa fululu,* ke nukadi miolo ko.+ Nuyambula mwand’avelela wanusadisa nuakala yo vema.+ Nusadila Yave* nze ntaudi.+
12 Nuyangalala muna vuvu. Nuzizila muna mpasi.+ Nusiamanana muna sambu.+
13 Nukayila avauki mun’owu wa nsatu zau.+ Nukala ye fu kia zola nzenza.+
14 Nusambula awana bekunubangikanga;+ nusambula, ke nusibi ko.+
15 Nukala ye kiese kumosi ye awana bena mu kiese; nudila ye awana bedilanga.
16 Nubadikila ankaka nze una nukuyibadikilanga; ke nuyindulanga mambu manene ko, kansi nuyindulanga kaka mambu masakalala. + Ke nuyimwena ko vo nu akwa ngangu.+
17 Ke nuvutula muntu mbi muna mbi ko.+ Nusia kaka e sungididi muna mambu mambote vana meso ma wantu awonso.
18 Avo dilendakana, kuna dieno sambu, nukadila kuna luvuvamu yo wantu awonso.+
19 Azolwa, ke nulandi kunda ko, kansi nusisila kaka o makasi*+ e nzila; kadi diasonama vo: “‘Diame dia landa e kunda; mono isenda,’ u kavovele o Yave.”*+
20 Kansi, “avo mbeni aku nzala kena zau, umvana lekwa kadia; avo vuina kena diau, umvana lekwa kanua; kadi muna vanga owau, osia makala ma tiya vana ntu andi.”*+
21 Kuyambula ko vo bi wasunda, kansi sunda kaka o bi muna vanganga o wete.+
Mvovo vana yand'a lukaya
^ Tala Nsas’a Mvovo.
^ Yovo “nuatonta.”
^ Yovo “owondelelanga.”
^ Yovo “wondelela.”
^ Yovo “vema.”
^ I sia vo, makasi ma Nzambi.
^ I sia vo, lembeka muntu yo zezesa bala kwandi kwa ntima.
