ဖဲနဆီဟံၣ်ဆီဃီသီသီအခါ တၢ်သဘံၣ်ဘုၣ်တဖၣ် ကဟဲပၢၢ်ထီၣ်အါမံၤလီၤ. တၢ်န့ၣ်ဟဲအိၣ်ထီၣ်သ့ခီဖျိလၢ သုတၢ်ဆိကမိၣ်, တၢ်တူၢ်ဘၣ်, ဒီးတၢ်ပညိၣ်လၢတၢ်အိၣ်မူပူၤ တလီၤဂာ်လိာ်သးအဃိလီၤ. မ့တမ့ၢ်ဘၣ်ဒီး တၢ်သဘံၣ်ဘုၣ်တဖၣ် ကဟဲလၢတၢ်ချၢ ဒီးတၢ်မၤအသးလၢ တၢ်တပာ်သူၣ်ပာ်သးအဃိလီၤ.

ဘၣ်သ့ၣ်သ့ၣ်နကအဲၣ်ဒိး ကွၢ်ကပာ်တၢ်သဘံၣ်ဘုၣ် တဖၣ်အံၤလီၤ. ဘၣ်ဆၣ်လံာ်စီဆှံ ဟ့ၣ်ကူၣ်ပှၤလၢ ပကမၤဘၣ်လိာ်က့ၤ တၢ်သ့ၣ်တဖၣ်အံၤလီၤ. (မးသဲ ၅:၂၃, ၂၄) နမ့ၢ်မၤထွဲလံာ်စီဆှံ အတၢ်ဟ့ၣ်ကူၣ်န့ၣ် နကထံၣ်န့ၢ်တၢ်အစၢလၢ အဂ့ၤကတၢၢ်လၢ နတၢ်ကီတၢ်ခဲတဖၣ်အဂီၢ်လီၤ.

လံာ်စီဆှံစံးဝဲ– “အကတီၢ်လၢ ပှၤကတိၤတၢ်အဂီၢ်” အိၣ်ဝဲလီၤ. (စံၣ်တဲၤတဲလီၤ ၃:၁, ၇) ဟံးန့ၢ်တၢ်ဆၢကတီၢ်ဒီး တဲသကိးတၢ်သဘံၣ်ဘုၣ်အဂ့ၢ်တက့ၢ်. ဘၣ်ဃးဒီးတၢ်သဘံၣ်ဘုၣ်အံၤ နတူၢ်ဘၣ်ဒ်လဲၣ်ဒီး နဆိကမိၣ်တၢ်မနုၤလဲၣ်န့ၣ် ဒုးသ့ၣ်ညါနသးသမူတံၤသကိး တီတီလိၤလိၤတက့ၢ်. “ကတိၤလိာ်သုသးလၢ တၢ်မ့ၢ်တၢ်တီ” ထီဘိတက့ၢ်. (အ့းဖ့းစူး ၄:၂၅) မ့ၢ်ကီလၢနကပၢၤနသးဒၣ်လဲာ်, ဟးဆှဲးတၢ်အ့ၣ်လိာ်တက့ၢ်. ပမ့ၢ်စံးဆၢတၢ်မုာ်မုာ်န့ၣ် တၢ်တၢၣ်ပီၣ်တၢၣ်ပီသကိး တကဲထီၣ်တၢ်အ့ၣ်လိာ်ဆိးက့လၢၤဘၣ်.—ကတိၤဒိ ၁၅:၄; ၂၆:၂၀.

နသးမ့ၢ်တလီၤပလိာ်သနာ်က့ အိၣ်ဒီးတၢ်မဲာ်မုာ်နါဆၢတက့ၢ်. ကြၢးလၢနပာ်ဖျါ တၢ်အဲၣ်ဒီးတၢ်ယူးယီၣ်ပာ်ကဲ နသးသမူတံၤသကိးန့ၣ် တဘၣ်သးပ့ၤနီၣ်နီတဘျီတဂ့ၤ. (ကလီးစဲ ၄:၆) ဂုာ်ကျဲးစၢးမၤဘၣ်လိာ်က့ၤ တၢ်ဂ့ၢ်ကီတဖၣ် လၢအချ့, ဒီးတဘၣ် ပာ်ပတုာ် နတၢ်ရ့လိာ်သးတဂ့ၤ.—အ့းဖ့းစူး ၄:၂၆.

တၢ်လၢနမၤသ့–

• ဃုထၢတၢ်ဆၢကတီၢ်လၢ အကြၢးဝဲဘၣ်ဝဲလၢ နကတၢၣ်ပီၣ်တၢၣ်ပီသကိး တၢ်သဘံၣ်ဘုၣ်အဂီၢ်တက့ၢ်

• ဖဲအဝဲတဲတၢ်အခါန့ၣ် ဒိကနၣ်ဒီးပၢၤနသး ဒ်သိးနသုတနုာ်လီၤတဲတၢ်တဂ့ၤ. နကဘၣ်တဲတၢ်အကတီၢ် ကတုၤဝဲလီၤ

လံာ်စီဆှံစံးဝဲ– “အဲၣ်လိာ်ကွံလိာ်သုသးဒ် ဒီပုၢ်ဝဲၢ်တံၢ်တံၢ် အသိးန့ၣ်တက့ၢ်. လၢတၢ်ယူးယီၣ်န့ၣ်, လဲၤလၢညါလိာ်သုသးတက့ၢ်.” (ရိမ့ၤ ၁၂:၁၀) နဒိကနၣ်တၢ်ဒ်လဲၣ်န့ၣ် အရ့ဒိၣ်ဒိၣ်မးလီၤ. ဒ်သိးနကနၢ်ပၢၢ်စၢၤ နသးသမူတံၤသကိး အတၢ်ထံၣ်အဂီၢ် ဂုာ်ကျဲးစၢးပာ်ဖျါထီၣ် တၢ်ဒိသူၣ်ဒိသးဒီး “တၢ်ဆီၣ်လီၤသး” န့ၣ်တက့ၢ်. (၁ ပ့းတရူး ၃:၈; ယၤကိာ် ၁:၁၉) မ့ၢ်သ့န့ၣ်, ပာ်တ့ၢ်နတၢ်မၤဒီးဒိကနၣ် နသးသမူတံၤသကိး အတၢ်ကတိၤလၢ တၢ်သူၣ်အိၣ်သးအိၣ်အပူၤတက့ၢ်. မ့တမ့ၢ်သံကွၢ်အီၤလၢ နတဲသကိးတၢ်ဂ့ၢ်အံၤ လၢခံတဘျီကသ့ဧါန့ၣ်တက့ၢ်. တဘၣ်ပာ်မၤနသးဒ် နဒိကနၣ်တၢ်အသိးတဂ့ၤ. ပာ်နသးသမူတံၤသကိးဒ် နဒုၣ်နဒါတဂ့ၤ, နမ့ၢ်ပာ်အီၤဒ် ပှၤမၤသကိးတၢ်ဒီးနၤန့ၣ် တမ့ၢ်နက “သးထီၣ်ချ့” ဘၣ်.—စံၣ်တဲၤတဲလီၤ ၇:၉.

တၢ်လၢနမၤသ့–

• တၢ်ကတိၤ မ့ၢ်တဝၣ်နနၢ်ပူၤသနာ်က့, သးအိၣ်ဒိကနၣ်န့ၢ်အီၤလၢ တၢ်သးစူၤ အပူၤတက့ၢ်

• ကနၣ်ထဲတၢ်ကတိၤအဖျၢၣ်တဂ့ၤ, ဆိကမိၣ်ထံအခီပညီတက့ၢ်. ပာ်သူၣ်ပာ်သး နသးသမူတံၤသကိး အက့ၢ်အဂီၤတၢ်ဟူးတၢ်ဂဲၤ ဒီးအကလုၢ်န့ၣ်တက့ၢ်

လံာ်စီဆှံစံးဝဲ– “မၤတၢ်ဖံးတၢ်ခဲလၢာ်န့ၣ် အိၣ်ဒီးအဘျုးလီၤ. မ့မ့ၢ်ပျုၤအကတိၤတၢ်န့ၣ် ဘၣ်ဃးထဲလၢ တၢ်ဖှီၣ်တၢ်ယာ်လီၤ.” (ကတိၤဒိ ၁၄:၂၃) ထဲဒၣ်သုတူၢ်လိာ် တၢ်အစၢလၢအဂ့ၤန့ၣ် တလၢပှဲၤဒံးဘၣ်. လိၣ်လၢသုကဘၣ်မၤထွဲဒ် သုခံဂၤသုဆၢတဲာ်ပာ်အသိးလီၤ. လၢသုကမၤဒ်အံၤအဂီၢ် သုကလိၣ်ဘၣ်တၢ်ဂုာ်ကျဲးစၢး ဒီးတၢ်ထဲးဂံၢ်ထဲးဘါ, ဘၣ်ဆၣ်အဘျုးကအိၣ်ဝဲလီၤ. (ကတိၤဒိ ၁၀:၄) သုမ့ၢ်မၤသကိးတၢ်ဒ်သိးသိးန့ၣ် “အဘူးအလဲဂ့ၤအိၣ်ဝဲလၢ” သုတၢ်ဂုာ်ကျဲးစၢးအဃိလီၤ.—စံၣ်တဲၤတဲလီၤ ၄:၉.

တၢ်လၢနမၤသ့–

• ဆၢတဲာ်လီၤနသးလၢ နကမၤဘၣ်လိာ်က့ၤ နတၢ်ကီတၢ်ခဲတဆီဘၣ်တဆီ ဒ်လဲၣ်န့ၣ်တက့ၢ်

• တဘျီတခီၣ်န့ၣ် ကွၢ်ကဒါက့ၤဒီးသမံသမိး နတၢ်ဂုၤထီၣ်ပသီထီၣ်တက့ၢ်