ပဝဲခဲလၢာ်ပလိၣ်ဘၣ်ကျိၣ်စ့ လၢပကလုၢ်အီၣ်ပဟံၣ်ဖိဃီဖိအဂီၢ် ဒီးပကမၤလၢပှဲၤ အဝဲသ့ၣ်အတၢ်လိၣ်ဘၣ်အဂီၢ်လီၤ. (ကတိၤဒိ ၃၀:၈) အါန့ၢ်အန့ၣ်, “စ့မ့ၢ်တၢ်တဒီတၢ်လီၤ.” (စံၣ်တဲၤတဲလီၤ ၇:၁၂) ဒ်ပှၤဒီမိဝၤခံဂၤအသိး, ဘၣ်သ့ၣ်သ့ၣ် တမ့ၢ်ကညီလၢ သုကတဲသကိး ကျိၣ်စ့အဂ့ၢ်န့ၣ်ဘၣ်. ဘၣ်ဆၣ်တဘၣ်ပျဲကျိၣ်စ့ ဒုးအိၣ်ထီၣ်တၢ်သဘံၣ်ဘုၣ်လၢ ဟံၣ်ဃီအပူၤတဂ့ၤ. (အ့းဖ့းစူး ၄:၃၂) ပှၤဒီမိဝၤခံဂၤန့ၣ် ဖဲဆၢတဲာ်တၢ်ဘၣ်ဃး ကဘၣ်သူကျိၣ်စ့ဒ်လဲၣ်အဂ့ၢ်အခါ ကြၢးနာ်န့ၢ်လိာ်အသး ဒီးအိၣ်ဒီးတၢ်သးတဖျၢၣ်ဃီန့ၣ်လီၤ.

လံာ်စီဆှံစံးဝဲ– “အဂ့ၢ်ဒ်အံၤ, ပှၤလၢသုကျါမိၣ်မၤအသးလၢ တၢးထီတဖျၢၣ်, ဒီးတဆ့ၣ်နီၤဆိဒီးဂံၢ်ကွၢ်ဝဲ, မ့ၢ်အတၢ်အိၣ်လၢဧါ, တလၢလဲၣ်န့ၣ် မ့ၢ်မတၤတဂၤလဲၣ်.” (လူၤကၣ် ၁၄:၂၈) သုကသူကျိၣ်စ့ဒ်လဲၣ်န့ၣ် သုကဘၣ်ရဲၣ်ကျဲၤအီၤဒ်သိးသိးလီၤ. (ဧၤမိၣ် ၃:၃) တၢ်လၢသုကဘၣ်ပှ့ၤန့ၣ် မ့ၢ်မနုၤလဲၣ် ဒီးသုကသူကျိၣ်စ့ထဲလဲၣ်န့ၣ် သုကဘၣ်ဆၢတဲာ်လီၤ. (ကတိၤဒိ ၃၁:၁၆) သုကျိၣ်စ့မ့ၢ်အိၣ်လၢ သုကပှ့ၤတၢ်တမံၤမံၤ အဂီၢ်ဒၣ်လဲာ် အခီပညီတမ့ၢ်လၢ သုကြၢးပှ့ၤအီၤဘၣ်. ဂုာ်ကျဲးစၢးဒ်သိးနသုတမၤထီၣ် ဒ့ၣ်ကမၢ်န့ၣ်တဂ့ၤ. သူထဲဒၣ်ကျိၣ်စ့လၢ အိၣ်ဒီးသုတက့ၢ်.—ကတိၤဒိ ၂၁:၅; ၂၂:၇.

တၢ်လၢနမၤသ့–

• နသူကျိၣ်စ့လၢ နတၢ်လိၣ်ဘၣ်တဖၣ်အဂီၢ် မ့ၢ်ဝံၤအလီၢ်ခံ, နကသူစ့လၢ အအိၣ်တီၢ်ဒံးတဖၣ်ဒ်လဲၣ်န့ၣ် ဆၢတဲာ်ဒ်သိးသိးတက့ၢ်

• နစ့မ့ၢ်တလၢတလီၢ်ဘၣ်န့ၣ် သုးကျဲၤလီၤတံၢ်က့ၤလၢ နကမၤစှၤလီၤ နတၢ်လၢာ်ဘူၣ်လၢာ်စ့ၤတက့ၢ်. အဒိ, နကဟးအီၣ်တၢ်လၢတၢ်ချၢအလီၢ် နဖီအီၣ်လၢနဟံၣ်သ့လီၤ

လံာ်စီဆှံစံးဝဲ– “ကတိၤတၢ်မ့ၢ်တၢ်တီ တဂၤဒီးတဂၤတက့ၢ်.” (စကၤရယၤ ၈:၁၆) ကတိၤတၢ်တီတီလိၤလိၤ ဒီးနသးသမူတံၤသကိး ဘၣ်ဃးစ့ဟဲနုာ်ဒီးစ့ဟးထီၣ် ထဲလဲၣ်န့ၣ်တက့ၢ်.

ဖဲနဆၢတဲာ်တၢ်လၢအရ့ဒိၣ် ဘၣ်ဃးကျိၣ်စ့ကိးဘျီဒဲးအခါန့ၣ် တၢၣ်ပီၣ်ဆိတၢ်ဒီး နသးသမူတံၤသကိးန့ၣ်တက့ၢ်. (ကတိၤဒိ ၁၃:၁၀) တၢ်တဲသကိးကျိၣ်စ့အဂ့ၢ် ဒ်သိးသိးန့ၣ်ကကဲထီၣ် တၢ်မၤစၢၤလၢနကပၢၤဃာ် တၢ်ဃူတၢ်ဖိးလၢ နဟံၣ်ပူၤအဂီၢ်လီၤ. စ့လၢနမၤန့ၢ်န့ၣ် တဘၣ်ပာ်အီၤဒ် နနီၢ်ကစၢ်အတၢ်တဂ့ၤ, ပာ်အီၤဒ်ဟံၣ်ဖိဃီဖိ အတၢ်အသိးန့ၣ်တက့ၢ်.—၁ တံၤမသ့း ၅:၈.

တၢ်လၢနမၤသ့–

• သုမ့ၢ်သူစ့ထဲ သုဆၢတဲာ်ပာ်လၢ သုကသူအီၤန့ၣ် တလိၣ်သုတၢၣ်ပီၣ်လိာ် သုသးလၢၤဘၣ်

• သုကတၢၣ်ပီၣ်ကျိၣ်စ့ အဂ့ၢ်အဂီၢ်တဘၣ်ထုး တၢ်ဆၢကတီၢ်တုၤလၢ တၢ်သဘံၣ်ဘုၣ်ဟဲအိၣ်ထီၣ်တဂ့ၤ