ဖဲယဟိဝၤယွၤပာ်လီၤဝဲ ဟံၣ်ဖိဃီဖိတၢ်ရဲၣ်တၢ်ကျဲၤအခါ အဝဲမၢမိၢ်ပၢ်တဖၣ်လၢ ကပၢဆှၢအဖိန့ၣ်လီၤ. (ကလီးစဲ ၃:၂၀) ဒ်နမ့ၢ်မိၢ်ပၢ်အသိး နအိၣ်ဒီးမူဒါလၢနကဘၣ် သိၣ်လိမၤယုၤနဖိလၢ ကအဲၣ်ယဟိဝၤယွၤဒီး ကကဲထီၣ်ပှၤဒိၣ်တုာ်ခိၣ်ပှဲၤလၢ မၤလၢပှဲၤအမူဒါကသ့အဂီၢ်လီၤ. (၂ တံၤမသ့း ၁:၅; ၃:၁၅) တၢ်အိၣ်လၢနဖိအသးပူၤန့ၣ် နကဘၣ်သ့ၣ်ညါစ့ၢ်ကီးလီၤ. လၢတၢ်န့ၣ်အမဲာ်ညါ နဒိနတဲာ်န့ၣ်အရ့ဒိၣ်ဒိၣ်မးလီၤ. ယဟိဝၤယွၤအကလုၢ်ကထါ မ့ၢ်အိၣ်ပာ်လၢနသးကံၢ်ပူၤန့ၣ် နသိၣ်လိနဖိတဖၣ်လၢ ယွၤအကလုၢ်ကထါကသ့ဂ့ၤဂ့ၤလီၤ.—စံးထီၣ်ပတြၢၤ ၄၀:၈.

လံာ်စီဆှံစံးဝဲ– “ပှၤကိးဂၤဒဲးကဘၣ်ချ့လၢ တၢ်နၢ်ဟူတၢ်, ဒီးဃၢဝဲလၢတၢ်ကတိၤတၢ်” န့ၣ်လီၤ. (ယၤကိာ် ၁:၁၉, ခ့ခါစှီၤကျိာ်) နအဲၣ်ဒိးလၢနဖိတဖၣ် ကတူၢ်ဘၣ်ဝဲလၢအဝဲသ့ၣ် ကတိၤတၢ်ဒီးနၤသ့လၢ တၢ်သဘျ့န့ၣ်လီၤ. အဝဲသ့ၣ်ကဘၣ်သ့ၣ်ညါဝဲလၢ နအိၣ်ကတဲာ်ကတီၤနသးထီဘိလၢ နကဒိကနၣ်အတၢ်ကတိၤန့ၣ်လီၤ. ဒ်သိးအဝဲသ့ၣ်တဲဖျါထီၣ် အသးအတၢ်ဆိကမိၣ်နီၢ်နီၢ် ကသ့အဂီၢ်ဒုးအိၣ်ထီၣ် တၢ်အိၣ်သးလၢအပှဲၤဒီး တၢ်မုာ်တၢ်ခုၣ်န့ၣ်တက့ၢ်. (ယၤကိာ် ၃:၁၈) အဝဲသ့ၣ်မ့ၢ်ဆိကမိၣ်ဝဲလၢ နကဒူအလိၤမ့တမ့ၢ် ဃုအတၢ်ကမၣ်န့ၣ် ဘၣ်သ့ၣ်သ့ၣ်တမ့ၢ်ကတဲတၢ် တီတီလၢၤဘၣ်. ဝံသးစူၤနဖိတဖၣ်ဒီး ပာ်ဖျါထီၣ်နတၢ်အဲၣ်လၢ အဝဲသ့ၣ်အဖီခိၣ်တလီၢ်လီၢ်တက့ၢ်.—မးသဲ ၃:၁၇; ၁ ကရံၣ်သူး ၈:၁.

တၢ်လၢနမၤသ့–

• ဖဲနဖိတဖၣ်အဲၣ်ဒိး ကတိၤတၢ်ဒီးနၤအခါ မၤ ချုးနသးတက့ၢ်

• တဘၣ်ကတိၤတၢ်ဒီးနဖိ ထဲဒၣ်ဖဲတၢ်သဘံၣ်ဘုၣ် ဟဲအိၣ်ထီၣ်အခါန့ၣ်တဂ့ၤ, ကတိၤတၢ်ဒီးအဝဲသ့ၣ်ထီဘိတက့ၢ်

လံာ်စီဆှံစံးဝဲ– “ပှၤကညီအထးခိၣ် အတၢ်ကတိၤန့ၣ်မ့ၢ်ထံယိာ်လီၤ.” (ကတိၤဒိ ၁၈:၄) ဒ်သိးနကသ့ၣ်ညါ နဖိအသးအတၢ်တူၢ်ဘၣ် နီၢ်နီၢ်အဂီၢ်န့ၣ်တဘျီတခီၣ် နကဘၣ်သူတၢ်ကူၣ်တၢ်ဆး ဒီးဆိကမိၣ်က့ၤအဝဲသ့ၣ် အတၢ်ကတိၤအခီပညီန့ၣ်လီၤ. ပှၤသးစၢ်တဖၣ်န့ၣ်ညီနုၢ် ကတိၤလုာ်ကိတၢ်မ့တမ့ၢ် ကတိၤတၢ်လၢတအိၣ်လၢအသးပူၤန့ၣ်လီၤ. “ပှၤလၢအစံးဆၢတၢ်တမံၤလၢ တချုးနၢ်ဟူဒံးဘၣ်အဂ့ၢ်အကျိၤန့ၣ် မ့ၢ်ပှၤဟးဂီၤဖိအတၢ်ဒီး တၢ်မဲာ်ဆှးလၢအဂီၢ်လီၤ.” (ကတိၤဒိ ၁၈:၁၃) တဘၣ်သးထီၣ် ချ့ချ့တဂ့ၤ—ကတိၤဒိ ၁၉:၁၁.

တၢ်လၢနမၤသ့–

• ဆၢတဲာ်နသးလၢ နဖိမ့ၢ်တဲတၢ်ဒ်လဲၣ်ဂ့ၤဒ်လဲၣ်ဂ့ၤ နကပၢၤနသးဒီးပျဲနဖိကတိၤတၢ်န့ၣ်တက့ၢ်

• ဖဲနနီၢ်ဆံးထဲသိးဒီးနဖိအခါ နတူၢ်ဘၣ်တၢ်ဒ်လဲၣ် ဒီးတၢ်လၢဖျါအရ့ဒိၣ်လၢ နဂီၢ်မ့ၢ်မနုၤလဲၣ်န့ၣ်ဂုာ်ကျဲးစၢး သ့ၣ်နီၣ်ထီၣ်က့ၤတက့ၢ်

လံာ်စီဆှံစံးဝဲ– “ယဖိခွါဧၢ, ကနၣ်နပၢ်အသိၣ်တၢ်တက့ၢ်, ဒီးလဲၤသဒၣ်နမိၢ် အသိၣ်က့ၤသီက့ၤတၢ်တဂ့ၤ.” (ကတိၤဒိ ၁:၈) ယဟိဝၤယွၤဟ့ၣ်ဝဲမိၢ်ပၢ်တဖၣ် တၢ်န့ၢ်စိန့ၢ်ကမီၤလၢ ဖိတဖၣ်အဖီခိၣ်လီၤ. နကဘၣ်သိၣ်လိနဖိတဖၣ်လၢ ကယူးယီၣ်ပာ်ကဲနၤဒီး ကဒိကနၣ်နကလုၢ်လီၤ. (အ့းဖ့းစူး ၆:၁-၃) မိၢ်ပၢ်တဖၣ်မ့ၢ်တအိၣ်ဒီး “တၢ်ကူၣ်ထီၣ်ဖးလီၤတၢ်တမံၤဃီန့ၣ်” ဖိတဖၣ်နၢ်ပၢၢ်ဝဲသ့လီၤ. (၁ ကရံၣ်သူး ၁:၁၀) သုဒီမိဝၤခံဂၤအတၢ်ထံၣ် မ့ၢ်တဒ်သိးဘၣ်န့ၣ် ပလီၢ်နသးဒ်သိးနသုတပာ်ဖျါ တၢ်သးတလီၤပလိာ်လၢ နဖိအမဲာ်ညါန့ၣ်တဂ့ၤ. မ့ၢ်လၢအဝဲသ့ၣ် အတၢ်ယူးယီၣ်ပာ်ကဲသု စှၤလီၤဝဲသ့အဃိလီၤ.

တၢ်လၢနမၤသ့–

• နကသိၣ်လိနဖိတဖၣ်ဒ်လဲၣ်န့ၣ် ကတိၤသကိးဒီးနသးသမူတံၤသကိး ဒ်သိးသုကအိၣ်ဒီး တၢ်သးတဖျၢၣ်ဃီန့ၣ်တက့ၢ်

• နကဘၣ်သိၣ်လိမၤယုၤ နဖိဒ်လဲၣ်န့ၣ် နတၢ်ဆိကမိၣ် မ့ၢ်လီၤဆီလိာ်သးဒီး နသးသမူတံၤသကိးဒၣ်လဲာ် ဂုာ်ကျဲးစၢးဒ်သိးနကနၢ်ပၢၢ် နသးသမူတံၤသကိး အတၢ်ထံၣ်န့ၣ်တက့ၢ်

လံာ်စီဆှံစံးဝဲ– “ဆှၢဖိဒံဖိသၣ်လၢ အကျဲဧိၤကပူၤဧိၤန့ၣ်တက့ၢ်.” (ကတိၤဒိ ၂၂:၆) တၢ်သိၣ်လိမၤယုၤလၢ အကဲထီၣ်လိၣ်ထီၣ် လၢဖိတဖၣ်အဂီၢ်န့ၣ် တဟဲကဲထီၣ်ဒၣ်အတၢ်ဘၣ်. နလိၣ်ဘၣ်တၢ်သိၣ်လိမၤယုၤ တၢ်ရဲၣ်တၢ်ကျဲၤလၢပၣ်ဃုာ်ဒီး တၢ်သိၣ်ဃီၣ်ဖိန့ၣ်လီၤ. (စံးထီၣ်ပတြၢၤ ၁၂၇:၄; ကတိၤဒိ ၂၉:၁၇) တၢ်သိၣ်ဃီၣ်န့ၣ်တမ့ၢ်ထဲဒၣ် တၢ်ဟ့ၣ်တၢ်ကမၣ်ဘၣ်, ဘၣ်ဆၣ်တၢ်အံၤပၣ်ဃုာ်ဒီး တၢ်မၤစၢၤဖိသၣ်လၢကနၢ်ပၢၢ်ဝဲ ဘၣ်မနုၤအဃိအဝဲသ့ၣ်လိၣ်ဘၣ် တၢ်ဘျၢလဲၣ်န့ၣ်လီၤ. (ကတိၤဒိ ၂၈:၇) သိၣ်လိစ့ၢ်ကီးအဝဲသ့ၣ်လၢ ကအဲၣ်ယဟိဝၤယွၤအကလုၢ်ကထါဒီး ကသ့ၣ်ညါနၢ်ပၢၢ်အတၢ်နဲၣ်လိတဖၣ်အဂီၢ်န့ၣ်တက့ၢ်. (စံးထီၣ်ပတြၢၤ ၁:၂) တၢ်အံၤကမၤစၢၤအဝဲသ့ၣ်လၢ ကအိၣ်ဒီးသးလၢအသ့ၣ်ညါဒၣ်တၢ်လၢ နီၤဖးတၢ်ဂ့ၤဒီးတၢ်အၢသ့အဂီၢ်န့ၣ်လီၤ.—ဧ့ၤဘြံၤ ၅:၁၄.

တၢ်လၢနမၤသ့–

• နကဘၣ်သိၣ်လိနဖိဒ်သိး ကထံၣ်သ့ၣ်ညါယွၤ ဒ်အမ့ၢ်ကစၢ်နီၢ်နီၢ်တဂၤ လၢအဝဲနာ်န့ၢ်ဝဲသ့န့ၣ်လီၤ

• မၤစၢၤအဝဲသ့ၣ်လၢကသ့ၣ်ညါဆိဒီး ဟးဆှဲးတၢ်လၢကမၤဘၣ်ဒိ အသကဲာ်ပဝး, ဒ်သိးဒီးတၢ်ဘၣ်ယိၣ်အလီၢ်လၢ ပထံၣ်ဘၣ်အီၤသ့ဖဲအ့ထၢၣ်နဲး ဒီးတၢ်ရ့လိာ်သးဒီးပှၤဂၤလၢ အ့ထၢၣ်နဲးအပူၤန့ၣ်တက့ၢ်. အဝဲသ့ၣ်ဟးဆှဲးဝဲ ပှၤလူၤမၤကမၣ်ဖိသၣ် ကသ့ဒ်လဲၣ်န့ၣ် သိၣ်လိအီၤတက့ၢ်