တၢ်နီၤဖး ၂
တီဒီး နသးသမူတံၤသကိးတက့ၢ်
“တၢ်လၢယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ” —မၢ်ကူး ၁၀:၉
ပကဒိးန့ၢ်ဘၣ်ယဟိဝၤယွၤ အတၢ်ဘၣ်သးအဂီၢ်ပကဘၣ် “တီ” ဒီးပသးသမူတံၤသကိးလီၤ. (မၤလကံ ၂:၁၆) တၢ်န့ၣ်မ့ၢ်တၢ်အရ့ဒိၣ်လၢ နတၢ်ဆီဟံၣ်ဆီဃီအပူၤလီၤ. တၢ်သးတီမ့ၢ်တအိၣ်န့ၣ် တၢ်နာ်န့ၢ်လိာ်သးတအိၣ်ဘၣ်. တၢ်အဲၣ်ကဒိၣ်ထီၣ်အါထီၣ်အဂီၢ် တၢ်နာ်န့ၢ်လိာ်သးလိၣ်ဝဲ သပှၢ်တၢၢ်လီၤ.
မုၢ်မဆါတနံၤအံၤ ပှၤနီၢ်ဒီမိဝၤတဖၣ် ကွၢ်ဆၢၣ်မဲာ်ဘၣ်ဒီးတၢ်လၢကမၤဟးဂီၤ အတၢ်သးတီဒီးအသးသမူတံၤသကိး အိၣ်အါမးလီၤ. လၢတၢ်န့ၣ်အဃိ နကဒီသဒၢနတၢ်ဆီဟံၣ်ဆီဃီအဂီၢ် နကဘၣ်ဆၢတဲာ်နသးလၢနကမၤတၢ်ခံမံၤလီၤ.
၁ ပာ်နတၢ်ဆီဟံၣ် ဆီဃီလၢညါ
လံာ်စီဆှံစံးဝဲ– “အိၣ်မူဒ်ပှၤကူၣ်တၢ်သ့ အသိးန့ၣ်တက့ၢ်.” (အ့းဖ့းစူး ၅:၁၅, ၁၆, ခ့ခါစှီၤကျိာ်) နတၢ်ဆီဟံၣ်ဆီဃီန့ၣ် မ့ၢ်တၢ်အရ့ဒိၣ်ကတၢၢ်အကျါတမံၤ လၢနတၢ်အိၣ်မူပူၤလီၤ. လၢတၢ်န့ၣ်အဃိ နမ့ၢ်ပာ်တၢ်အံၤလၢညါန့ၣ် ကြၢးဝဲဘၣ်ဝဲလီၤ.
ယဟိဝၤယွၤအဲၣ်ဒိးလၢ နသးကစၢၢ်ဆၢ နသးသမူတံၤသကိးဒီး “မူသးခု” ဒီးအီၤန့ၣ်လီၤ. (စံၣ်တဲၤတဲလီၤ ၉:၉) ကစၢ်ပာ်ဖျါဝဲတြၢၢ်ကလာ်လၢ နတကြၢးကွၢ်ကပာ် နသးသမူတံၤသကိးနီတဘျီဘၣ်. လၢတၢ်န့ၣ်အလီၢ်, နကြၢးဃုကျဲလၢကမၤသးခု နသးသမူတံၤသကိးန့ၣ်လီၤ. (၁ ကရံၣ်သူး ၁၀:၂၄) မၤနဲဒ်သိးနသးသမူတံၤသကိး ကသ့ၣ်ညါလၢနလိၣ်ဘၣ်အီၤ ဒီးနပာ်လုၢ်ပာ်ပှ့ၤအီၤန့ၣ်တက့ၢ်.
တၢ်လၢနမၤသ့–
-
ထီဘိန့ၣ်နကဘၣ်ဟ့ၣ် တၢ်ဆၢကတီၢ်လၢ နသးသမူတံၤသကိးအဂီၢ်, ဒီးဖဲသုကတိၤတၢ်အခါ ပာ်ဖျါထီၣ်နတၢ်သးအိၣ်အီၤ လၢလၢပှဲၤပှဲၤန့ၣ်တက့ၢ်
-
မၤဖဲနသးတဂ့ၤ, ဆိကမိၣ်တၢ်လၢ နသးသမူတံၤသကိးအဂီၢ်တက့ၢ်
၂ ပၢၤနသးတက့ၢ်
လံာ်စီဆှံစံးဝဲ– “ကယဲၢ်ပှၤလၢအကွၢ်ပိာ်မုၣ်ဒီး အသးကတၢကိးဂၤဒဲးန့ၣ် အဲၣ်ဘၢလံတၢ်ဒီးအီၤလၢ အသးကံၢ်ပူၤလံ.” (မးသဲ ၅:၂၈) ပှၤတဂၤမ့ၢ်ဆိကမိၣ်ထီဃာ် တၢ်မၤကမၣ်မုၣ်ကမၣ်ခွါအဂ့ၢ်န့ၣ် အဝဲတမ့ၢ်ပှၤလၢအတီဒီး အသးသမူတံၤသကိးဘၣ်.
ယဟိဝၤယွၤစံးဝဲလၢ လိၣ်လၢနကဘၣ် “ပၢၤနသး” လီၤ. (ကတိၤဒိ ၄:၂၃; ယံးရမံယၤ ၁၇:၉) နပၢၤနသးကန့ၢ်အဂီၢ် နကဘၣ်ပၢၤနမဲာ်ချံလီၤ. (မးသဲ ၅:၂၉, ၃၀) မၤဒိးစီၤယိၤဘးအဒိအတဲာ် လၢအမၤတၢ်အၢၣ်လီၤအီလီၤဒီး အမဲာ်ချံလၢတကွၢ်ဝဲပိာ်မုၣ်အဂၤလၢ တၢ်သးကတၢနီတဘျီဘၣ်န့ၣ်တက့ၢ်. (ယိၤဘး ၃၁:၁) ပာ်လီၤနသးလၢနတကွၢ် တၢ်ဂီၤဘ့ၣ်ဆ့နီတဘျီဘၣ်န့ၣ်တက့ၢ်. ဆၢတဲာ်နသးကျၢၤကျၢၤလၢ မ့တမ့ၢ်နသးသမူတံၤသကိးဘၣ်န့ၣ် နတသးကွံပှၤအဂၤနီတဂၤဘၣ်န့ၣ်တက့ၢ်.
တၢ်လၢနမၤသ့–
-
လၢပှၤဂၤအမဲာ်ညါ ပာ်ဖျါထီၣ်လၢနမ့ၢ်ပှၤလၢ အတီဒီးနသးသမူတံၤသကိးန့ၣ်တက့ၢ်
-
ဆိကမိၣ်နသးသမူတံၤသကိး အသးတၢ်တူၢ်ဘၣ် ဒီးနသးသမူတံၤသကိး အသးမ့ၢ်ဘၣ်တံာ်တာ်လၢ နတၢ်ရ့လိာ်သးဒီးပှၤတဂၤဂၤအဃိန့ၣ် မၤကတၢၢ်ကွံာ်တၢ်ရ့လိာ်သးအံၤ တဘျီဃီတက့ၢ်