ဖဲယ့ၣ်ၡူးဟ့ၣ်လုၢ်ထီၣ်အသးသမူ ဒ်တၢ်ပှ့ၤက့ၤအခါ မ့ၢ်ဒၣ်အအုၣ်က့ၤခီၣ်က့ၤ ပှၤဟီၣ်ခိၣ်ဖိလၢ အအိၣ်ဒီးတၢ်သးတီတဖၣ်လီၤ. (မးသဲ ၂၀:၂၈) အဃိ လံာ်စီဆှံကိးဝဲ ယ့ၣ်ၡူးလၢ ပှၤလၢအ “အုၣ်က့ၤခီၣ်က့ၤဟီၣ်ခိၣ်” လီၤ. (၁ ယိၤဟၣ်​ ၄:၁၄) ဘၣ်ဃးဒီးယ့ၣ်ၡူးန့ၣ်​ လံာ်စီဆှံတဲဝဲလၢ “ပှၤအဂၤလၢ အကအုၣ်က့ၤခီၣ်က့ၤပှၤန့ၣ်​ တအိၣ်နီတဂၤဘၣ်. ဒီးလၢဟီၣ်ခိၣ်ချၢန့ၣ်​ မံၤအဂုၤအဂၤလၢ ကစၢ်ယွၤ ဟ့ၣ်လီၤဝဲဒ်သိး ပကဒိးန့ၢ်ဘၣ်​ တၢ်အုၣ်က့ၤခီၣ်က့ၤ ခီဖျိလၢအီၤန့ၣ်​ တအိၣ်နီတဖျၢၣ်ဘၣ်.”—မၤတၢ် ၄:၁၂, NWT.

 ယ့ၣ်ၡူး “လ့ၣ်ကွၢ်တၢ်သံလၢ ပှၤကညီခဲလၢာ်” လၢအနာ်အီၤတဖၣ်​ အဂီၢ်လီၤ. (ဧ့ၤဘြံၤ ၂:၉; ယိၤဟၣ်​ ၃:၁၆) ဘၣ်ဆၣ်​ “ယွၤဒုးဂဲၤဆၢထၢၣ်က့ၤ” အီၤဒ်ပှၤနီၢ်သးဖိတဂၤအသိး ဒီးအဝဲက့ၤထီၣ်ဆူ မူခိၣ်လီၤ. (မၤတၢ် ၃:၁၅) ဒီး “ပှၤလၢအသုးဃီၤအသးဆူ ကစၢ်ယွၤအအိၣ်​ ခီဖျိလၢယ့ၣ်ၡူးန့ၣ်​ ယ့ၣ်ၡူးအုၣ်က့ၤခီၣ်က့ၤအဝဲသ့ၣ်​ သ့ဝဲသပှၢ်တၢၢ် မ့ၢ်လၢ အမူဝဲထီဘိ ဒီးဃ့ကညးန့ၢ်တၢ်လၢ အဝဲသ့ၣ်အဂီၢ် လၢကစၢ်ယွၤအအိၣ်​ အဃိလီၤ.”—ဧ့ၤဘြံၤ ၇:၂၅, NWT.

ဘၣ်မနုၤအဃိ ယ့ၣ်ၡူးဘၣ်ဃ့ကညးန့ၢ်တၢ်လၢ ပဂီၢ်လဲၣ်

 ပဝဲခဲလၢာ်န့ၣ်​ ပမ့ၢ်ပှၤတၢ်ဒဲးဘးဖိ. (ရိမ့ၤ ၃:၂၃) ခီဖျိလၢတၢ်ဒဲးဘးအဃိ ပသုးဘူးပသးလၢ ကစၢ်ယွၤအအိၣ်တန့ၢ်ဘၣ်​ ဒီးပကတုၤလၢတၢ်သံလီၤ. (ရိမ့ၤ ၆:၂၃) ဘၣ်ဆၣ်​ ပှၤလၢအနာ် ယ့ၣ်ၡူးအတၢ်ပှ့ၤက့ၤတဖၣ်န့ၣ်​ ယ့ၣ်ၡူးဃ့ “သကွံၢ်ကညး” န့ၢ်တၢ်လၢ အဝဲသ့ၣ်အဂီၢ်လီၤ. (၁ ယိၤဟၣ်​ ၂:၁) ယ့ၣ်ၡူးဃ့ကညးန့ၢ်တၢ်လၢ အဝဲသ့ၣ်အဂီၢ် ဒီးအဃ့ဝဲလၢ ကစၢ်ယွၤကဒိကနၣ်​ အဝဲသ့ၣ်​ အတၢ်ထုကဖၣ်​ ဒီးကပျၢ်ကွံာ်န့ၢ် အဝဲသ့ၣ်အတၢ်ဒဲးဘး ခီဖျိလၢ အဟ့ၣ်လုၢ်ထီၣ်​ အသးသမူအဃိလီၤ. (မးသဲ ၁:၂၁; ရိမ့ၤ ၈:၃၄) မ့ၢ်လၢ ယ့ၣ်ၡူးအတၢ်ဃ့ကညးတဖၣ်အံၤ လီၤပလိာ်ဒီး ယဟိဝၤယွၤအတၢ်ဘၣ်သးအဃိ ကစၢ်ယွၤဒိကနၣ်အီၤလီၤ. ကစၢ်ယွၤ ဆှၢလီၤဝဲ ယ့ၣ်ၡူးလၢ ဟီၣ်ခိၣ်ချၢ “ဒ်သိးဟီၣ်ခိၣ်ဖိ ကဘၣ်တၢ်အုၣ်က့ၤခီၣ်က့ၤလၢအီၤ” အဂီၢ်လီၤ.—ယိၤဟၣ်​ ၃:၁၇.

ထဲဒၣ်ပနာ်ယ့ၣ်ၡူးန့ၣ်​ ပကဒိးန့ၢ်ဘၣ်​ တၢ်အုၣ်က့ၤခီၣ်က့ၤဧါ

 ဒ်သိး ပကန့ၢ်ဘၣ်​ တၢ်အုၣ်က့ၤခီၣ်က့ၤအဂီၢ်န့ၣ်​ ပကဘၣ်နာ်ယ့ၣ်ၡူး ဘၣ်ဆၣ်​ ထဲပနာ်ယ့ၣ်ၡူးန့ၣ်​ တလၢပှဲၤဒံးဘၣ်​ ပကဘၣ်မၤ တၢ်လၢအဂၤန့ၣ်အိၣ်ဒံး. (မၤတၢ် ၁၆:၃၀, ၃၁) လံာ်စီဆှံ တဲဝဲလၢ “ဒ်နီၢ်ခိတအိၣ်ဘၣ်ဒီးသးန့ၣ်​ မ့ၢ်တၢ်သံအသိးန့ၣ်​ တၢ်နာ်တအိၣ်ဘၣ်ဒီး တၢ်မၤတဖၣ်​ မ့ၢ်တၢ်သံစ့ၢ်ကီး ဒ်န့ၣ်အသိးလီၤ.” (ယၤကိာ် ၂:၂၆) ဒ်သိး ပကဒိးန့ၢ်ဘၣ်​ တၢ်အုၣ်က့ၤခီၣ်က့ၤအဂီၢ်

•    ပကဘၣ်​ မၤလိ ယ့ၣ်ၡူးဒီးအပၢ်ယဟိဝၤယွၤအဂ့ၢ်.—ယိၤဟၣ်​ ၁၇:၃.

•    ပကဘၣ်​ နာ်အဝဲသ့ၣ်.—ယိၤဟၣ်​ ၁၂:၄၄; ၁၄:၁.

•    ပကဘၣ်​ ပပာ်ဖျါထီၣ်ပတၢ်နာ် ခီဖျိပဒိကနၣ်​ အဝဲသ့ၣ်အတၢ်မၤလိာ်တဖၣ်. (လူၤကၣ်​ ၆:၄၆; ၁ ယိၤဟၣ်​ ၂:၁၇) ယ့ၣ်ၡူးသိၣ်လိဝဲလၢ ပှၤကိးဂၤဒဲးလၢ အကိးအီၤလၢ “ကစၢ်” န့ၣ်​ တမ့ၢ်လၢကန့ၢ်ဘၣ်​ တၢ်အုၣ်က့ၤခီၣ်က့ၤဘၣ်. ဘၣ်ဆၣ်​ ထဲဒၣ်ပှၤမ့ၢ် ‘မၤဝဲ ဖဲဒၣ်အပၢ်အိၣ်လၢမူခိၣ်အသး’ ဧိၤမးကန့ၢ်ဘၣ်​ တၢ်အုၣ်က့ၤခီၣ်က့ၤလီၤ.—မးသဲ ၇:၂၁.

•    ပကဘၣ်​ ဆဲးပာ်ဖျါထီၣ်​ တၢ်နာ် ဖဲပထံၣ်ဘၣ်ဒီး တၢ်ကီတၢ်ခဲတဖၣ်ဒၣ်လဲာ်လီၤ. ယ့ၣ်ၡူးတဲဝဲလၢ “ပှၤလၢအအိၣ်ဂၢၢ် ဆိးကျၢၤဝဲ တုၤအကတၢၢ်န့ၣ်, ကတုၤလၢတၢ်အုၣ်က့ၤခီၣ်က့ၤအီၤလီၤ.”—မးသဲ ၂၄:၁၃.