Xwedê bê ferq dixwaze hemû însanan bibereket bike.

Xwedê ev soz da Îbrahîm pêxember: “Dê hemûya gelên li rûyê erdê bi navdîtiya te bên pîroz kirin!” (1. Mûsa 12:3).

Em ji vê yekê çi dielimin? Xwedê ji me pir hez dike û dixwaze însanên ji hemû gelan, yanî jin û mêr û zarokan, ên ku guhdariya wî dikin, bibereket bike.

Xwedê dilrehm e û ew her kesê ku dixwaze wî nas bike, bibereket dike.

Xwedê qeweta xwe da Mûsa pêxember da ku ew mucîzeyên mezin çêbike. Dîsa jî, Mûsa pêxember wisa dua kir: “Rêyên xwe ji niha ve ji min re agahî bike, da ku, bona ez di çavê te de xêrê bibînim [û] te binasim” (2. Mûsa 33:13). Xwedê ji xwestina Mûsa pêxember razî bû û xêr û bereketa xwe da wî û rê û sifatên xwe hê zêdetir bi wî da zanîn û fehmkirin. Mesela, Mûsa pêxember li ser Xwedê elimî ku ew “Xwedayê ku zehf keremkar û dilovan e” (2. Mûsa 34:6, 7).

Em ji vê yekê çi dielimin? Eger em xîret bikin ku Xwedê baştir nas bikin, ewê me giştan, yanî jin û mêr û zarokan, bibereket bike. Ew di Kitêba Pîroz de zelal dike ku gerek em çawa ji wî re îbadetê bikin û ku ew bi rastî jî dixwaze xêr û bereketa xwe bide me.

Eger em der heqê jiyana Îsa pêxember û gotinên wî de bielimin, emê bi bereketên Xwedê yên ebedî dilşad bibin.

Em dikarin ji Peyva Xwedê gelek tiştan li ser jiyana Îsa pêxember û gotinên wî bielimin. Xwedê bi destê Îsa pêxember gelek mucîzeyên mezin çêkirin. Îsa pêxember kesên kor, ker û seqet qenc kirin. Heta wî kesên mirî jî, ji mirinê rakirin. Bi vî awayî, Îsa pêxember nîşan da, ku Xwedê wê di pêşerojê de kîjan xêr û bereketan bide însanan. Wî zelal kir ku her yek ji me çawa dikare van nîmetan bistîne: “Jiyana herheyî jî ev e: Ku ew te, tu Xwedayê bi tenê rast û Îsa Mesîhê ku te şandiye nas bikin” (Yûhenna 17:3).

Îsa pêxember dilşewat, dilrehm û dilovan bû. Jin û mêr, mezin û biçûk dihatin cem wî, çimkî wan ev teklîfa wî ya dilgerm qebûl dikir: “Ji min hîn bibin, çimkî ez nerm û ji dil nefsbiçûk im û hûnê rihetiyê ji bo canê xwe bibînin” (Metta 11:29). Li wexta Îsa pêxember gelek kesan qedrê jinan nedigirt, lê Îsa pêxember ji jinan re baş bû û wî qedir û qîmet dida wan.

Em ji vê yekê çi dielimin? Îsa pêxember ji dil ji însanan hez dikir, û wî bi mîsala xwe nîşanî me da, ku gerek em ji hevdû re çawa bin.

Kitêba Pîroz dielimîne ku “tenê Xwedayek heye” û ku Îsa pêxember xeberbêjekî Xwedê bû (1. Korîntî 8:6). Îsa pêxember bi nefsbiçûkî got ku Xwedê ew şandiye erdê û ku Xwedê ji wî mezintir e (Yûhenna 11:41, 42; 14:28). *