តើរឿងណូអេនិងទឹកជំនន់ដ៏ធំ គ្រាន់តែជារឿងព្រេងឬ?
ចម្លើយពីគម្ពីរ
ទឹកជំនន់ដ៏ធំគឺជាហេតុការណ៍ពិត។ ព្រះបានបណ្ដាលឲ្យមានទឹកជំនន់ដើម្បីបំផ្លាញមនុស្សអាក្រក់ តែលោកបានបង្គាប់ណូអេឲ្យសង់ទូកធំមួយដើម្បីសង្គ្រោះមនុស្សល្អ និងសត្វទាំងឡាយ។ (ដើមកំណើត ៦:១១-២០) យើងអាចជឿជាក់ថាទឹកជំនន់ពិតជាបានកើតឡើងមែន ព្រោះនេះបានត្រូវកត់ទុកក្នុងគម្ពីរដែល«បានត្រូវសរសេរក្រោមការដឹកនាំរបស់ព្រះ»។—ធីម៉ូថេទី២ ៣:១៦
តើជាហេតុការណ៍ពិតឬជារឿងព្រេង?
គម្ពីររៀបរាប់ថាណូអេជាបុគ្គលដែលមានពិតមែន ហើយថាទឹកជំនន់ក៏ជាហេតុការណ៍ពិតដែរ មិនមែនជារឿងព្រេងឬរឿងប្រឌិតនោះទេ។
អ្នកសរសេរគម្ពីរបានជឿថាណូអេជាបុគ្គលដែលមានពិតមែន។ ជាឧទាហរណ៍ អ្នកសរសេរគម្ពីរឈ្មោះអែសរ៉ា និងលូកាជាអ្នកជំនាញខាងប្រវត្ដិសាស្ត្រ ពួកគាត់បានរៀបរាប់ឈ្មោះណូអេក្នុងបញ្ជីឈ្មោះប្រជាជាតិអ៊ីស្រាអែល។ (ប្រវត្តិហេតុទី១ ១:៤; លូកា ៣:៣៦) អ្នកសរសេរសៀវភៅដំណឹងល្អឈ្មោះម៉ាថាយនិងលូកា បានកត់ទុកប្រសាសន៍របស់លោកយេស៊ូអំពីណូអេនិងទឹកជំនន់។—ម៉ាថាយ ២៤:៣៧-៣៩; លូកា ១៧:២៦, ២៧
ម្យ៉ាងទៀត អេសេគាលជាអ្នកប្រកាសទំនាយនិងសាវ័កប៉ូល បានលើកបញ្ជាក់អំពីណូអេជាគំរូល្អក្នុងការមានជំនឿនិងសេចក្ដីសុចរិត។ (អេសេគាល ១៤:១៤, ២០; ហេប្រឺ ១១:៧) តើជាការសមហេតុផលទេ ដែលអ្នកសរសេរគម្ពីរទាំងនេះ លើកបញ្ជាក់អំពីបុគ្គលដែលមិនធ្លាប់មានពិតមែននោះ? ណូអេនិងបុរសស្ត្រីឯទៀតដែលមានជំនឿ ពិតជាគំរូល្អឲ្យយើងធ្វើតាមមែន ព្រោះពួកគេជាបុគ្គលដែលមានពិតប្រាកដ។—ហេប្រឺ ១២:១; យ៉ាកុប ៥:១៧
គម្ពីរប្រាប់ព័ត៌មានជាក់លាក់អំពីទឹកជំនន់។ កំណត់ហេតុគម្ពីរអំពីទឹកជំនន់ មិនមែនចាប់ផ្ដើមដោយរៀបរាប់ថា«កាលពីព្រេងនាយ» ដូចក្នុងរឿងនិទាននោះទេ។ ផ្ទុយទៅវិញ គម្ពីរបានចែងអំពីថ្ងៃ ខែ និងឆ្នាំដែលទឹកជំនន់ដ៏ធំកើតឡើង។ (ដើមកំណើត ៧:១១; ៨:៤, ១៣, ១៤) គម្ពីរក៏រៀបរាប់អំពីទំហំទូកដែលណូអេត្រូវសង់ដែរ។ (ដើមកំណើត ៦:១៥) ព័ត៌មានទាំងនោះបង្ហាញថាទឹកជំនន់គឺជាហេតុការណ៍ពិត មិនមែនជារឿងព្រេងទេ។
ហេតុអ្វីមានទឹកជំនន់ដ៏ធំ?
យោងតាមគម្ពីរ មុនពេលមានទឹកជំនន់«ការអាក្រក់របស់មនុស្សមានច្រើនក្រៃលែង»។ (ដើមកំណើត ៦:៥) គម្ពីរក៏ចែងទៀតថា៖«ផែនដីបានទៅជាខូចអាក្រក់នៅចំពោះព្រះពិត» ដោយសារផែនដីពេញទៅដោយអំពើឃោរឃៅ និងអំពើប្រាសចាកសីលធម៌ខាងផ្លូវភេទ។—ដើមកំណើត ៦:១១; យូដាស ៦, ៧
គម្ពីរចែងថាបញ្ហាជាច្រើន គឺបណ្ដាលមកពីពួកទេវតាអាក្រក់ដែលចាកចេញពីស្ថានសួគ៌ មករួមដំណេកជាមួយនឹងស្ត្រី។ កូនរបស់ទេវតាទាំងនោះបានត្រូវហៅថាពួកនីហ្វីលីម ជាពួកអ្នកដែលធ្វើទុក្ខយ៉ាងខ្លាំងដល់មនុស្សនៅគ្រានោះ។ (ដើមកំណើត ៦:១, ២, ៤) ព្រះបានបំផ្លាញមនុស្សអាក្រក់ ហើយអនុញ្ញាតឲ្យមនុស្សល្អមានសាជាថ្មីដោយគ្មានឥទ្ធិពលអាក្រក់។—ដើមកំណើត ៦:៦, ៧, ១៧
តើមនុស្សបានដឹងថាទឹកជំនន់នឹងមកឬទេ?
ពួកគេពិតជាដឹងមែន ព្រោះព្រះបានប្រាប់ណូអេនូវអ្វីដែលនឹងកើតឡើង ហើយលោកបានណែនាំគាត់ឲ្យសង់ទូកធំដើម្បីសង្គ្រោះក្រុមគ្រួសារគាត់ និងសត្វទាំងឡាយ។ (ដើមកំណើត ៦:១៣, ១៤; ៧:១-៤) ណូអេបានព្រមានមនុស្សអំពីការបំផ្លាញដែលនឹងកើតឡើងនៅថ្ងៃខាងមុខ តែពួកគេមិនស្ដាប់តាមការព្រមានរបស់គាត់ទេ។ (ពេត្រុសទី២ ២:៥) គម្ពីរចែងថា«ពួកគេមិនបានយកចិត្តទុកដាក់សោះ រហូតដល់ទឹកជន់ឡើង កញ្ឆក់យកគេទាំងអស់គ្នាទៅ»។—ម៉ាថាយ ២៤:៣៧-៣៩
តើទូកធំដែលណូអេបានសង់មានរាងដូចម្ដេច?
ទូកធំនោះមានរាងជាប្រអប់ធំបួនជ្រុង បណ្ដោយប្រវែងប្រហែល១៣៣ម៉ែត្រ ទទឹង២២ម៉ែត្រ និងកម្ពស់១៣ម៉ែត្រ។ a ទូកធំនោះបានត្រូវធ្វើពីឈើម៉ៃសាក់ ហើយបានត្រូវលាបជ័រទាំងក្នុងទាំងក្រៅ។ ទូកធំនោះមានបីជាន់ ហើយមានបន្ទប់មួយចំនួន។ មានទ្វារមួយនៅចំហៀងទូក ហើយតាមមើលទៅមានបង្អួចជុំវិញនៅផ្នែកខាងលើ។ ដំបូលទូកនោះទំនងជាខ្ពស់កណ្ដាល ហើយមានជម្រាលសងខាងដើម្បីឲ្យទឹកស្រួលហូរចុះ។—ដើមកំណើត ៦:១៤-១៦
តើណូអេចំណាយពេលសង់ទូកធំនោះអស់រយៈពេលប៉ុន្មាន?
គម្ពីរមិនបានចែងថាណូអេចំណាយពេលប៉ុន្មានដើម្បីសង់ទូកធំនោះទេ តែតាមមើលទៅគាត់បានចំណាយពេលបួនប្រាំទសវត្សរ៍ក្នុងការសង់ទូកនោះ។ ពេលកូនច្បងរបស់ណូអេកើតមក គាត់មានអាយុជាង៥០០ឆ្នាំ ហើយពេលមានទឹកជំនន់ គាត់មានអាយុ៦០០ឆ្នាំ។ b—ដើមកំណើត ៥:៣២; ៧:៦
ព្រះបានប្រាប់ណូអេឲ្យសង់ទូក ក្រោយពីកូនបីនាក់របស់គាត់បានធំឡើង ហើយរៀបការ។ រយៈពេលនោះអាចជា៥០ឬ៦០ឆ្នាំ។ (ដើមកំណើត ៦:១៤, ១៨) បើនោះជាការពិតមែន គឺសមហេតុផលឲ្យយើងសន្និដ្ឋានថាទូកនោះអាចត្រូវចំណាយពេលប្រហែល៤០ឬ៥០ឆ្នាំដើម្បីសង់រួច។
a គម្ពីររៀបរាប់អំពីទំហំរបស់ទូកនោះគិតជាហត្ថ។ «ខ្នាតហេប្រឺ១ហត្ថ ស្មើនឹង៤៤,៤៥សង់ទីម៉ែត្រ(១៧,៥អ៊ីង)»។—The Illustrated Bible Dictionary កំណែថ្មីភាគ៣ ទំព័រ១៦៣៥
b ស្តីអំពីអាយុកាលដ៏វែងរបស់មនុស្ស ដូចជាអាយុណូអេជាដើម សូមមើលក្នុងទស្សនាវដ្ដីប៉មយាម ជាភាសាអង់គ្លេស ថ្ងៃទី១ ខែធ្នូ ឆ្នាំ២០១០ អត្ថបទចំណងជើងថា«តើមនុស្សនៅសម័យគម្ពីរពិតជាមានអាយុវែងមែនឬ?»។