តើពួកនីហ្វីលីមជាអ្នកណា?
អ្វីដែលគម្ពីររៀបរាប់
ពួកនីហ្វីលីមជាមនុស្សធំសម្បើមនិងឃោរឃៅ។ ពួកគេជាកូនៗរបស់ពួកទេវតាដែលបានរួមដំណេកជាមួយនឹងស្ត្រីជាមនុស្សនៅសម័យណូអេ។ a
គម្ពីរចែងថា៖«ពួកកូនប្រុសរបស់ព្រះ គេឃើញកូនស្រីរបស់មនុស្សថាជាស្រស់ល្អ»។ (លោកុប្បត្តិ ៦:២) តាមពិត «ពួកកូនប្រុសរបស់ព្រះ»ជាបុគ្គលវិញ្ញាណដែលបានបះបោរប្រឆាំងព្រះ ព្រោះពួកគេ«បានបោះបង់ចោលសភាពដើម»របស់ខ្លួន ហើយកាឡាខ្លួនជាមនុស្ស រួចយកកូនស្រីរបស់មនុស្ស«ធ្វើជាប្រពន្ធតាមតែចិត្ត»។—យូដាស ៦; លោកុប្បត្តិ ៦:២
កូនកាត់ទេវតានិងមនុស្ស មិនមែនជាមនុស្សធម្មតាទេ ដោយសារការដែលទេវតារួមដំណេកជាមួយនឹងមនុស្ស គឺជាអ្វីដែលខុសពីធម្មជាតិ។ (លោកុប្បត្តិ ៦:៤) ពួកនីហ្វីលីមជាមនុស្សមានមាឌធំសម្បើម ហើយពួកគេប្រើអំណាចធ្វើបាបអ្នកឯទៀត។ ពួកគេបង្កឲ្យមានអំពើឃោរឃៅពេញផែនដី។ (លោកុប្បត្តិ ៦:១៣) គម្ពីរពណ៌នាអំពីពួកគេថាជា«មនុស្សខ្លាំងពូកែដែលរស់នៅកាលពីដើម ជាមនុស្សមានល្បីឈ្មោះ»។ (លោកុប្បត្តិ ៦:៤) ក្រោយពួកគេស្លាប់ទៅ មនុស្សចាប់ផ្ដើមប្រព្រឹត្តឃោរឃៅដូចពួកគេដែរ។—លោកុប្បត្តិ ៦:៥; ជនគណនា ១៣:៣៣ b
ការយល់ខុសអំពីពួកនីហ្វីលីម
ការយល់ខុស: ពួកនីហ្វីលីមនៅតែមានរហូតមកដល់សព្វថ្ងៃ។
ការពិត: ព្រះយេហូវ៉ាបានធ្វើឲ្យមានទឹកជំនន់ពេញផែនដី ហើយបំផ្លាញមនុស្សដ៏ឃោរឃៅនៅជំនាន់នោះ។ ពួកនីហ្វីលីមបានត្រូវបំផ្លាញ ព្រមជាមួយនឹងមនុស្សទុច្ចរិតទាំងអស់។ ប៉ុន្តែ ណូអេនិងក្រុមគ្រួសាររបស់គាត់បានទទួលការពេញចិត្តពីព្រះយេហូវ៉ា ហើយមានតែពួកគាត់ប៉ុណ្ណោះដែលបានរួចរស់ជីវិតនៅគ្រានោះ។—លោកុប្បត្តិ ៦:៩; ៧:១២, ១៣, ២៣; ពេត្រុសទី២ ២:៥
ការយល់ខុស: ពួកនីហ្វីលីមមានឪពុកជាមនុស្ស។
ការពិត: ឪពុករបស់ពួកគេបានត្រូវហៅថា«ពួកកូនប្រុសរបស់ព្រះ»។ (លោកុប្បត្តិ ៦:២) គម្ពីរក៏ប្រើឃ្លានេះពេលរៀបរាប់អំពីពួកទេវតាដែរ។ (យ៉ូប ១:៦; ២:១; ៣៨:៧) ទេវតាទាំងនោះបានប្រើឫទ្ធានុភាពដើម្បីកាឡាខ្លួនជាមនុស្ស។ (លោកុប្បត្តិ ១៩:១-៥; យ៉ូស្វេ ៥:១៣-១៥) សាវ័កពេត្រុសបាននិយាយអំពី«ពួកវិញ្ញាណដែលមិនបានស្ដាប់បង្គាប់ ពេលដែលព្រះកំពុងរង់ចាំដោយអត់ធ្មត់នៅសម័យណូអេ»។ (ពេត្រុសទី១ ៣:១៩, ២០) ក្នុងករណីស្រដៀងគ្នានេះដែរ យូដាសជាអ្នកសរសេរគម្ពីរពន្យល់ថា ទេវតាខ្លះ«បានបោះបង់ចោលសភាពដើម និងស្ថានដែលខ្លួនត្រូវនៅ»។—យូដាស ៦
ការយល់ខុស: ពួកនីហ្វីលីមគឺជាពួកទេវតាដែលធ្លាក់ពីស្ថានសួគ៌។
ការពិត: លោកុប្បត្តិ ៦:៤បញ្ជាក់ថាពួកនីហ្វីលីម មិនមែនជាទេវតាទេ តែជាកូនៗកើតពីមនុស្សស្រីដែលបានរួមដំណេកជាមួយនឹងទេវតា។ ក្រោយពីទេវតាទាំងនោះចាប់ផ្ដើមយកស្ត្រីជាមនុស្ស«ធ្វើជាប្រពន្ធតាមតែចិត្ត» ព្រះយេហូវ៉ាបានមានប្រសាសន៍ថា ១២០ឆ្នាំក្រោយលោកនឹងចាត់វិធានការដាក់ទោសមនុស្សដែលឥតកោតខ្លាចព្រះនៅសម័យនោះ។ (លោកុប្បត្តិ ៦:១-៣) កំណត់ហេតុនោះបានបញ្ជាក់ថែមទៀតថា«នៅជំនាន់នោះ» ទេវតាដែលបានកាឡាខ្លួនជាមនុស្សបន្ត«ចូលទៅឯកូនស្រីរបស់មនុស្ស» ហើយបានបង្កើតកូនជា«មនុស្សខ្លាំងពូកែដែលរស់នៅកាលពីដើម» ពោលគឺពួកនីហ្វីលីម។—លោកុប្បត្តិ ៦:៤
a ក្នុងភាសាហេប្រឺ ពាក្យថា«នីហ្វីលីម»ប្រហែលជាមានន័យថា«អ្នកផ្ដួល»។ សៀវភៅWilson’s Old Testament Word Studies ប្រាប់ថាពាក្យនេះសំដៅលើអស់អ្នក«ដែលធ្វើអំពើឃោរឃៅទៅលើមនុស្ស ហើយប្លន់យកទ្រព្យសម្បត្តិរបស់ពួកគេ ព្រមទាំងធ្វើឲ្យពួកគេដួលចុះ»។
b ក្នុងជនគណនា ១៣:៣៣ ពួកអ្នកស៊ើបការណ៍របស់ជនជាតិអ៊ីស្រាអែលបានប្រាប់ថា ពួកគេបានឃើញពួកមនុស្សមានមាឌធំ ហើយនេះបានរំលឹកពួកគេអំពីពួកនីហ្វីលីមដែលបានស្លាប់ប៉ុន្មានសតវត្សរ៍មុន។—លោកុប្បត្តិ ៧:២១-២៣