តើការជ្រមុជទឹកជាអ្វី?
ចម្លើយពីគម្ពីរ
ការជ្រមុជទឹកសំដៅលើការពន្លិចរូបកាយទៅក្នុងទឹក រួចងើបចេញពីទឹកវិញ។ a នេះជាមូលហេតុដែលលោកយេស៊ូបានទទួលការជ្រមុជទឹកនៅក្នុងទន្លេមួយ។ (ម៉ាថាយ ៣:១៣, ១៦) ស្រដៀងគ្នាដែរ បុរសជនជាតិអេត្យូពីម្នាក់បានសុំទទួលការជ្រមុជទឹក នៅពេលគាត់ទៅដល់«កន្លែងមួយមានទឹកច្រើន»។—សកម្មភាព ៨:៣៦-៤០
អត្ថន័យនៃការជ្រមុជទឹក
គម្ពីរបានប្រដូចការជ្រមុជទឹកទៅនឹងការបញ្ចុះសព។ (រ៉ូម ៦:៤; កូឡុស ២:១២) ការជ្រមុជទឹកជានិមិត្តរូបដែលបង្ហាញថា បុគ្គលម្នាក់ស្លាប់ពីគន្លងជីវិតចាស់របស់គាត់ឬលែងពេញចិត្តនឹងរបៀបរស់នៅដែលគាត់ធ្លាប់មានពីមុន ហើយចាប់ផ្ដើមជីវិតថ្មីក្នុងនាមជាគ្រិស្តសាសនិកដែលបានប្រគល់ខ្លួនជូនព្រះ។ ការជ្រមុជទឹកនិងជំហានផ្សេងៗដែលនាំទៅដល់ការជ្រមុជទឹក គឺជាការរៀបចំពីព្រះសម្រាប់អ្នកដែលចង់មានសមត្ថភាពវិនិច្ឆ័យដែលមិនផ្ដន្ទាទោស ដោយផ្អែកលើជំនឿរបស់គាត់ចំពោះការបូជាជីវិតរបស់លោកយេស៊ូគ្រិស្ត។ (ពេត្រុសទី១ ៣:២១) ម្ល៉ោះហើយ លោកយេស៊ូបានបង្រៀនថាពួកអ្នកកាន់តាមលោកត្រូវទទួលការជ្រមុជទឹក។—ម៉ាថាយ ២៨:១៩, ២០
តើការជ្រមុជទឹកជាការលាងសម្អាតភាពខុសឆ្គងឬទេ?
មិនមែនទេ! គម្ពីរបង្រៀនថា វិធីតែមួយគត់ដែលអាចសម្អាតភាពខុសឆ្គងរបស់យើងបាន គឺតាមរយៈឈាមរបស់លោកយេស៊ូ។ (រ៉ូម ៥:៨, ៩; យ៉ូហានទី១ ១:៧) ប៉ុន្តែ បើអ្នកណាចង់ទទួលប្រយោជន៍ពីគ្រឿងបូជាលោះរបស់លោកយេស៊ូ អ្នកនោះត្រូវបង្ហាញជំនឿលើលោក ហើយកែប្រែរបៀបរស់នៅរបស់ខ្លួនឲ្យស្របតាមសេចក្ដីបង្រៀនរបស់លោក រួចមកទទួលការជ្រមុជទឹក។—សកម្មភាព ២:៣៨; ៣:១៩
តើគម្ពីរបង្រៀនអំពីការជ្រមុជទឹកឲ្យទារកឬទេ?
គម្ពីរមិនបានបង្រៀនអំពីរឿងនេះទេ។ ប៉ុន្តែ វិហារខ្លះបានធ្វើពិធី«ជ្រមុជទឹក»ឲ្យទារក (ដោយប្រោះទឹកឬចាក់ទឹកលើក្បាល) រួចមកដាក់ឈ្មោះឲ្យទារក។ ផ្ទុយទៅវិញ ការជ្រមុជទឹករបស់គ្រិស្តសាសនិក គឺសម្រាប់អ្នកដែលមានអាយុគ្រប់គ្រាន់ល្មមដើម្បីយល់និងជឿ«ដំណឹងល្អអំពីរាជាណាចក្រព្រះ»។ (សកម្មភាព ៨:១២) គម្ពីរបង្រៀនថាអស់អ្នកដែលចង់ទទួលការជ្រមុជទឹក ដំបូងត្រូវរៀនអំពីបណ្ដាំរបស់ព្រះ បន្ទាប់មកទទួលយកសេចក្ដីបង្រៀននោះ រួចប្រែចិត្ត។ ប៉ុន្តែ ទារកមិនអាចធ្វើដូច្នេះទេ។—សកម្មភាព ២:២២, ៣៨, ៤១
ម្យ៉ាងទៀត គម្ពីរបង្ហាញថាព្រះចាត់ទុកកូនរបស់គ្រិស្តសាសនិកថាបរិសុទ្ធឬស្អាតស្អំ ដោយសារឪពុកម្ដាយរបស់ពួកគេស្មោះត្រង់ចំពោះលោក។ (កូរិនថូសទី១ ៧:១៤) ក៏ប៉ុន្តែ បើទារកទទួលការជ្រមុជទឹកមានប្រយោជន៍ នោះទារកមិនមែនចាត់ទុកថាបរិសុទ្ធដោយសារឪពុកម្ដាយស្មោះត្រង់នោះទេ។ b
ការយល់ច្រឡំអំពីការជ្រមុជទឹកជាគ្រិស្តសាសនិក
ការយល់ច្រឡំ: មនុស្សខ្លះយល់ថាការចាក់ទឹកឬប្រោះទឹកលើបុគ្គលណាម្នាក់ គឺជំនួសការពន្លិចខ្លួនទៅក្នុងទឹក។
ការពិត: ការជ្រមុជទឹកដែលបានរៀបរាប់ក្នុងគម្ពីរ គឺជាការពន្លិចខ្លួនទាំងមូលទៅក្នុងទឹក។ ជាឧទាហរណ៍ ពេលភីលីពដែលជាអ្នកកាន់តាមគ្រិស្ត ជ្រមុជទឹកឲ្យមន្ត្រីជនជាតិអេត្យូពីម្នាក់ គឺពួកគាត់បាន«ចុះទៅក្នុងទឹក»ដើម្បីទទួលការជ្រមុជទឹក រួច«ពួកគាត់ឡើងពីទឹកមក»វិញ។—សកម្មភាព ៨:៣៦-៣៩ c
ការយល់ច្រឡំ: ក្នុងគម្ពីរនិយាយថា ពួកអ្នកផ្ទះទាំងអស់បានទទួលការជ្រមុជទឹក នេះធ្វើឲ្យមនុស្សខ្លះយល់ថាពាក្យនោះក៏រួមបញ្ចូលទារកដែរ។ ជាឧទាហរណ៍ គម្ពីរចែងអំពីឆ្មាំគុកនៅក្រុងភីលីពថា៖«គាត់និងពួកអ្នកផ្ទះទាំងអស់របស់គាត់បានទទួលការជ្រមុជទឹក»។—សកម្មភាព ១៦:៣១-៣៤
ការពិត: កំណត់ហេតុគម្ពីរអំពីឆ្មាំគុកនិងពួកអ្នកផ្ទះរបស់គាត់ដែលទទួលការជ្រមុជទឹក បញ្ជាក់ថាពួកគាត់គ្រប់គ្នាបានយល់«បណ្ដាំរបស់ព្រះយេហូវ៉ា» ហើយថាពួកគាត់«ត្រេកអរជាខ្លាំង»។ (សកម្មភាព ១៦:៣២, ៣៤) ដូច្នេះហើយយើងអាចយល់ថា ទារកដែលនៅក្នុងផ្ទះរបស់ឆ្មាំគុកមិនរាប់បញ្ចូលក្នុងចំណោមពួកអ្នកផ្ទះរបស់ឆ្មាំគុកដែលបានទទួលការជ្រមុជទឹកទេ ពីព្រោះទារកមិនអាចយល់បណ្ដាំរបស់ព្រះយេហូវ៉ាបានឡើយ។
ការយល់ច្រឡំ: ដោយសារលោកយេស៊ូមានប្រសាសន៍ថា រាជាណាចក្រស្ថានសួគ៌ជារបស់កូនក្មេង ដូច្នេះធ្វើឲ្យមនុស្សខ្លះយល់ថាកូនក្មេងឬទារកក៏អាចទទួលការជ្រមុជទឹកបានដែរ។—ម៉ាថាយ ១៩:១៣-១៥; ម៉ាកុស ១០:១៣-១៦
ការពិត: ពេលលោកយេស៊ូមានប្រសាសន៍អំពីពាក្យទាំងនេះ លោកមិនបានសំដៅទៅលើការជ្រមុជទឹកទេ។ ប៉ុន្តែ លោកកំពុងពន្យល់ថាអ្នកដែលអាចចូលក្នុងរាជាណាចក្រព្រះ ត្រូវមានលក្ខណៈដូចកូនក្មេង ពោលគឺត្រូវមានចិត្តរាបទាបនិងព្រមទទួលយកសេចក្ដីបង្រៀន។—ម៉ាថាយ ១៨:៤; លូកា ១៨:១៦, ១៧
a ពាក្យភាសាក្រិចដែលបានត្រូវបកប្រែថា«ជ្រមុជ»មកពីឫសគល់នៃពាក្យមួយដែលមានន័យថា«ពន្លិចទៅក្នុង» (សូមមើលសៀវភៅTheological Dictionary of the New Testament ក្បាលទី១ ទំព័រ៥២៩)។
b សព្វវចនាធិប្បាយមួយចែងថា៖«គ្មានកន្លែងណាមួយក្នុងសញ្ញាថ្មីដែលនិយាយអំពីការជ្រមុជទឹកឲ្យទារកទេ»។ សព្វវចនាធិប្បាយនោះក៏ចែងដែរថា ទំនៀមទម្លាប់នេះផ្ដើមចេញពី«ការយល់ច្រឡំនិងការសន្និដ្ឋានទុកជាមុនអំពីរឿងនេះ» ពោលគឺគេយល់ថាការជ្រមុជទឹកអាចលាងសម្អាតភាពខុសឆ្គងទាំងអស់បាន (The International Standard Bible Encyclopedia ក្បាលទី១ ទំព័រ៤១៦-៤១៧)។
c ក្រោមចំណងជើងថា«ការជ្រមុជទឹក(ក្នុងគម្ពីរ)» នៅក្នុងសព្វវចនាធិប្បាយកាតូលិកមួយបានសរសេរថា៖«មានភ័ស្តុតាងច្បាស់លាស់បញ្ជាក់ថា ក្រុមជំនុំដំបូងបានទទួលការជ្រមុជទឹក ដោយពន្លិចខ្លួនទាំងមូលទៅក្នុងទឹក» (New Catholic Encyclopedia states ក្បាលទី២ ទំព័រ៥៩)។