គន្លឹះសុភមង្គលគ្រួសារ
ការប្រដៅអប់រំកូន
តារា: * មុនឪពុកម្ដាយដាក់ទោសខ្ញុំពេលខ្ញុំធ្វើអ្វីខុសមួយ ពួកគាត់ខំយល់ពីរឿងដែលបានកើតឡើង ហើយពីមូលហេតុដែលខ្ញុំធ្វើខុស។ ដូច្នេះ ខ្ញុំខំប្រព្រឹត្តដូចពួកគាត់ដែរ ពេលដែលខ្ញុំប្រដៅកូនស្រីៗរបស់ខ្ញុំ។ តែចំណែកឪពុកនិងម្ដាយរបស់ប្រពន្ធខ្ញុំឈ្មោះបុប្ផា ពួកគាត់ដាក់ទោសកូនភ្លាមៗ។ តាមមើលទៅ ពួកគាត់ធ្លាប់ដាក់ទោសកូនដោយមិនចាប់អារម្មណ៍ចង់ដឹងអំពីមូលហេតុដែលកូនបានធ្វើខុស។ ជួនកាលខ្ញុំគិតថា ប្រពន្ធខ្ញុំដាក់ទោសកូនដោយឥតត្រាប្រណីស្រដៀងនឹងឪពុកម្ដាយគាត់ដែរ។
ពិសី: ឪពុកខ្ញុំបានបោះបង់ចោលក្រុមគ្រួសារយើងតាំងពីខ្ញុំអាយុប្រាំឆ្នាំម្ល៉េះ។ គាត់មិនដែលគិតអំពីខ្ញុំនិងបងប្អូនបីនាក់របស់ខ្ញុំសោះ។ ម្ដាយខ្ញុំខំធ្វើការទាំងនឿយហត់ដើម្បីចិញ្ចឹមយើង ហើយខ្ញុំក៏បានទទួលបន្ទុកមួយចំណែកធំដើម្បីជួយថែរក្សាប្អូនស្រីៗរបស់ខ្ញុំ។ ខ្ញុំមិនអាចសប្បាយដូចក្មេងឯទៀតទេ ព្រោះខ្ញុំត្រូវបំពេញតួនាទីជាម្ដាយ។ រហូតមកដល់សព្វថ្ងៃនេះ ខ្ញុំជាមនុស្សម៉ឺងម៉ាត់ច្រើនជាងចេះលេងសើច។ ពេលខ្ញុំត្រូវប្រដៅកូនខ្ញុំ ខ្ញុំចេះតែយកកំហុសរបស់ពួកគេមកគិតហើយគិតទៀត។ ខ្ញុំចង់ដឹងអំពីអ្វីដែលបានបណ្ដាលឲ្យពួកគេធ្វើខុស ក៏ចង់ដឹងថាពួកគេគិតដូចម្ដេចបានជានឹកឃើញធ្វើដូច្នោះ។ ក៏ប៉ុន្តែប្ដីខ្ញុំឈ្មោះសារិន មិនខ្វល់ខ្វាយហួសហេតុពេកទេ។ ឪពុកគាត់ម៉ឺងម៉ាត់ តែរមែងប្រព្រឹត្តដោយសេចក្ដីស្រឡាញ់ ក៏បានយកចិត្តទុកដាក់យ៉ាងស្មោះនឹងប្រពន្ធ។ ពេលកូនយើងធ្វើខុស ប្ដីខ្ញុំឆាប់ដោះស្រាយបញ្ហានោះ។ គាត់ខំយល់អំពីបញ្ហាឲ្យបានសព្វគ្រប់ ក៏ដោះស្រាយរឿងរ៉ាវនោះ រួចមិនយកមកគិតទៀតទេ។
បទពិសោធន៍របស់តារានិងពិសីបង្ហាញថា របៀបឪពុកម្ដាយរបស់អ្នកបានប្រដៅអប់រំរូបអ្នក អាចជះឥទ្ធិពលខ្លាំងទៅលើរបៀបដែលអ្នកប្រដៅអប់រំកូន។ បើប្ដីនិងប្រពន្ធបានទទួលការបង្ហាត់បង្រៀនខុសគ្នាពីឪពុកម្ដាយរបស់ពួកគាត់ នោះពួកគាត់ទំនងជាមានគំនិតផ្សេងគ្នាស្តីអំពីរបៀបអប់រំកូន។ ជួនកាលការខ្វែងគំនិតគ្នានេះ ធ្វើឲ្យទំនាក់ទំនងរវាងប្ដីប្រពន្ធមានភាពតានតឹង។
ពេលដែលពួកគាត់ល្វើយអស់កម្លាំង នោះអាចធ្វើឲ្យមានភាពតានតឹងច្រើនជាងមុន។ ពេលកូនដំបូងកើតមក ឪពុកម្ដាយដឹងយ៉ាងឆាប់ថា ការប្រដៅអប់រំកូនជាកិច្ចការពេញពេលដែលនាំឲ្យនឿយហត់ណាស់។ គន្ធានិងប្ដីរបស់គាត់ឈ្មោះវិទូបានចិញ្ចឹមកូនស្រីពីរនាក់។ គន្ធាប្រាប់ថា៖ «ខ្ញុំស្រឡាញ់កូនស្រីរបស់ខ្ញុំណាស់ តែកម្រណាស់ដែលពួកគេចង់ចូលគេងពេលខ្ញុំចង់ឲ្យគេគេង។ ម្យ៉ាងទៀត ពួកគេក៏ភ្ញាក់ពីគេងខុសពេល។ ពេលខ្ញុំខំនិយាយជាមួយអ្នកណាម្នាក់ ពួកគេក៏រំខានខ្ញុំ។ ពួកគេមិនយកស្បែកជើង ខោអាវ ប្រដាប់ប្រដាក្មេងលេង ឬម្ហូបទៅទុកនៅកន្លែងដើមទេ»។
បុរសម្នាក់ឈ្មោះសម្បត្ដិមានប្រពន្ធកើតជំងឺធ្លាក់ទឹកចិត្តបន្ទាប់ពីកើតកូនទី២។ សម្បត្ដិប្រាប់ថា៖ «ច្រើនដង ខ្ញុំចេញពីកន្លែងធ្វើការត្រឡប់មកផ្ទះវិញដោយនឿយហត់។ ពេលទៅដល់ផ្ទះ ខ្ញុំត្រូវអត់ងងុយរហូតដល់កណ្ដាលអធ្រាត្រជួយថែរក្សាកូនង៉ែតរបស់យើង។ នេះធ្វើឲ្យខ្ញុំពិបាក ហើយនាំឲ្យខ្ញុំប្រដៅអប់រំកូនស្រីច្បងមិនទៀងទេ។ កូនស្រីច្បងបែរជាច្រណែនដោយសារយើងត្រូវចែករំលែកក្ដីស្រឡាញ់ដល់កូនពៅដែរ»។
ពេលដែលឪពុកម្ដាយអស់កម្លាំងហើយមានការខ្វែងគំនិតគ្នាអំពីរបៀបអប់រំកូន នោះជម្លោះអំពីរឿងតូចតាចអាចប្រែក្លាយទៅជាការប្រកែកគ្នាយ៉ាងដាច់អហង្ការ។ បើមិនដោះស្រាយការខ្វែងគំនិតគ្នា នោះអាចធ្វើឲ្យទំនាក់ទំនងប្ដីប្រពន្ធប្រេះឆា ហើយអាចនាំឲ្យកូនដឹងចិត្តឪពុកម្ដាយ។ ក្នុងគម្ពីរ តើមានគោលការណ៍អ្វីខ្លះដែលអាចជួយប្ដីប្រពន្ធឲ្យមានភាពស្និទ្ធស្នាលជានិច្ចក្នុងជីវិតអាពាហ៍ពិពាហ៍ ព្រមទាំងអប់រំកូនបានល្អ?
ប្ដីប្រពន្ធត្រូវចំណាយពេលជាមួយគ្នា
ព្រះចង់ឲ្យមនុស្សរៀបអាពាហ៍ពិពាហ៍មុនដែលមានកូន ហើយចង់ឲ្យអាពាហ៍ពិពាហ៍នោះស្ថិតស្ថេរជារៀងរហូតក្រោយពីកូនបែកផ្ទះ។ ស្តីអំពីចំណងអាពាហ៍ពិពាហ៍ គម្ពីរចែងថា៖ «កុំឲ្យអ្នកណាពង្រាត់គូដែលព្រះបានផ្សំផ្គុំឡើយ»។ (ម៉ាថាយ ១៩:៦) តែចំណែកកូនវិញ ជំពូកដដែលនោះចែងថា ព្រះមានបំណងឲ្យកូន«ចាកចេញពីឪពុកនិងម្ដាយខ្លួន»។ (ម៉ាថាយ ១៩:៥) ដូច្នេះ ការចិញ្ចឹមអប់រំកូនគ្រាន់តែជាផ្នែកតូចមួយនៃជីវិតអាពាហ៍ពិពាហ៍ មិនមែនជាគន្លឹះដែលធ្វើឲ្យអាពាហ៍ពិពាហ៍ស្ថិតស្ថេរឡើយ។ ពិតមែនតែឪពុកម្ដាយត្រូវចំណាយពេលអប់រំកូន ប៉ុន្តែពួកគាត់គួរចងចាំថា ដើម្បីអប់រំកូនបានល្អ ចំណងអាពាហ៍ពិពាហ៍របស់ពួកគាត់គួរតែមានភាពស្និទ្ធស្នាល។
តើអ្វីជាវិធីមួយដែលប្ដីប្រពន្ធអាចមានភាពស្និទ្ធស្នាលជានិច្ចក្នុងអំឡុងពេលកូននៅក្នុងបន្ទុក? បើអាចធ្វើបាន សូមលៃពេលជាទៀងទាត់ដើម្បីនៅជាមួយគ្នាតែពីរនាក់។ បើធ្វើដូច្នេះអ្នកនឹងមានឱកាសពិភាក្សាអំពីរឿងសំខាន់ៗដែលទាក់ទងនឹងក្រុមគ្រួសារ ហើយសប្បាយជាមួយគ្នា។ តែការចំណាយពេលជាមួយគ្នាតែពីរនាក់គឺមិនងាយស្រួលទេ។ បុប្ផា ជាម្ដាយដែលបានត្រូវរៀបរាប់ខាងលើបាននិយាយថា៖ «ពេលណាខ្ញុំគិតថាអាចចំណាយពេលជាមួយគ្នាតែពីរនាក់ប្ដីខ្ញុំ ស្រាប់តែកូនពៅយើងទាមទារការយកចិត្តទុកដាក់ ឬកូនស្រីអាយុ៦ឆ្នាំមានបញ្ហាមួយ ដូចជាមិនអាចរកឃើញខ្មៅដៃ»។
គន្ធានិងវិទូ ជាប្ដីប្រពន្ធដែលបានពណ៌នាខាងលើ បានលៃយកពេលដោយកំណត់ម៉ោងដែលកូនត្រូវចូលគេង ហើយតម្រូវឲ្យធ្វើតាមកាលវិភាគនោះ។ គន្ធាប្រាប់ថា៖ «យើងកំណត់ម៉ោងឲ្យកូនចូលគេង ហើយកូនដឹងថាពេលដល់ម៉ោងនោះ ពួកគេត្រូវនៅលើគ្រែដើម្បីឲ្យយើងបិទភ្លើង ហើយចូលគេង។ ធ្វើដូច្នោះ ខ្ញុំនិងវិទូមានពេលសម្រាកហើយនិយាយគ្នា»។
ដោយរៀបចំឲ្យកូនមានទម្លាប់ចូលគេងយ៉ាងទៀងទាត់ នោះប្ដីប្រពន្ធមិនគ្រាន់តែអាចចំណាយពេលជាមួយគ្នាប៉ុណ្ណោះទេ តែក៏ជួយកូនមិនឲ្យ«គិតថាខ្លួនមានតម្លៃលើសពីអ្វីដែលត្រូវគិត»ផងដែរ។ (រ៉ូម ១២:៣) នៅទីបំផុត កូនដែលបានត្រូវបង្ហាត់បង្រៀនឲ្យគោរពម៉ោងចូលគេងអាចកត់សម្គាល់ថា ទោះជាពួកគេជាផ្នែកសំខាន់ក្នុងគ្រួសារក៏ពិតមែន តែក៏មានអ្នកឯទៀតក្នុងគ្រួសារដែលសំខាន់ដែរ។ ម្យ៉ាងទៀត ពួកគេត្រូវធ្វើតាមទម្លាប់របស់គ្រួសារ ជាជាងសង្ឃឹមឲ្យគ្រួសារកែប្រែទម្លាប់តាមចិត្តរបស់ពួកគេវិញ។
សូមសាកវិធីនេះ: សូមកំណត់ម៉ោងឲ្យកូនចូលគេងឲ្យបានទៀងទាត់ ហើយធ្វើតាមកាលវិភាគនោះរាល់ដង។ បើកូនប្រាប់ពីមូលហេតុដែលគេចង់នៅយូរបន្ដិចមិនទាន់ចូលគេង ដូចជាចង់ផឹកទឹក អ្នកអាចធ្វើតាមសំណូមពរមួយរបស់គេ។ ប៉ុន្តែកុំឲ្យកូនយកលេសនៅយូរដោយលើកឡើងសំណូមពរពីមួយទៅមួយមិនចេះចប់។ បើកូនសុំនៅប្រាំនាទីលើសម៉ោងចូលគេង ហើយអ្នកចង់ធ្វើតាមសំណូមពររបស់កូន នោះសូមដាក់នាឡិកាឲ្យរោទ៍ប្រាំនាទីក្រោយមក។ ពេលនាឡិការោទ៍ នោះឲ្យកូនចូលគេងដោយមិនធ្វើតាមសំណូមពរឯទៀតរបស់កូន។ ដូច្នេះ សូមរក្សាពាក្យសម្ដីរបស់អ្នក «បើថា‹មែន› គឺមែន បើថា‹ទេ› គឺទេ»។—ម៉ាថាយ ៥:៣៧
ជៀសវាងប្រកែកគ្នានៅមុខកូន
សុភាសិតដ៏ល្អមួយចែងថា៖ «កូនអើយ! ចូរស្ដាប់ពាក្យប្រៀនប្រដៅរបស់ឪពុកចុះ កុំឲ្យកូនបោះបង់ចោលសេចក្ដីដំបូន្មានរបស់ម្ដាយឯងឡើយ»។ (សុភាសិត ១:៨) បទគម្ពីរនេះបញ្ជាក់ថាទាំងឪពុកទាំងម្ដាយមានសិទ្ធិអំណាចលើកូន។ យ៉ាងណាក៏ដោយ ប្ដីប្រពន្ធដែលមានការចិញ្ចឹមអប់រំស្រដៀងគ្នាក៏ប្រហែលជាមិនយល់ស្របគ្នាអំពីវិធីអប់រំកូន ហើយត្រូវប្រើច្បាប់គ្រួសារមួយណាក្នុងកាលៈទេសៈផ្សេងៗ។ តើឪពុកម្ដាយអាចធ្វើយ៉ាងណាដើម្បីមានជោគជ័យក្នុងកាលៈទេសៈនោះ?
តារាដែលបានរៀបរាប់នៅដើមអត្ថបទ គាត់ថ្លែងថា៖ «ខ្ញុំគិតថាគឺសំខាន់មិនឲ្យយើងប្រកែកគ្នានៅមុខកូន»។ ប៉ុន្តែ គាត់សារភាពថាការធ្វើដូច្នេះគឺពិបាកណាស់។ គាត់បន្ថែមថា៖ «កូនពូកែសង្កេតមើលណាស់។ កូនអាចដឹងបើយើងខ្វែងគំនិតគ្នា សូម្បីតែយើងមិននិយាយក៏ដោយ»។
តើតារានិងបុប្ផាបានយកឈ្នះបញ្ហានេះយ៉ាងដូចម្ដេច? បុប្ផានិយាយថា៖ «ប្រសិនបើខ្ញុំមិនឯកភាពនឹងវិធីដែលប្ដីខ្ញុំប្រដៅកូនស្រី នោះខ្ញុំចាំរហូតដល់កូនទៅកន្លែងដែលមិនអាចឮយើងនិយាយគ្នា មុនប្រាប់ប្ដីអំពីមតិរបស់ខ្ញុំ។ ខ្ញុំមិនចង់ឲ្យកូនដឹងចិត្តយើង។ បើកូនដឹងថាយើងខ្វែងគំនិតគ្នា ខ្ញុំប្រាប់កូនថាសមាជិកម្នាក់ៗក្នុងក្រុមគ្រួសារត្រូវធ្វើតាមការរៀបចំរបស់ព្រះយេហូវ៉ា ហើយខ្ញុំស្ម័គ្រចិត្តចុះចូលតាមការដឹកនាំរបស់ឪពុកកូន ដូចជាកូនត្រូវចុះចូលនឹងការដឹកនាំរបស់យើងជាឪពុកម្ដាយផងដែរ»។ (កូរិនថូសទី១ ១១:៣; អេភេសូរ ៦:១-៣) តារាពោលថា៖ «ពេលដែលយើងនៅជាមួយគ្នាជាគ្រួសារ ធម្មតាខ្ញុំជាអ្នកដែលប្រដៅកូន។ ប៉ុន្តែបើបុប្ផាដឹងពីរឿងរ៉ាវនោះច្រើនជាង ខ្ញុំឲ្យគាត់ប្រដៅកូន ហើយខ្ញុំគាំទ្រយោបល់គាត់។ បើខ្ញុំមិនយល់ស្របនឹងអ្វីមួយ ខ្ញុំនឹងនិយាយជាមួយគាត់ពេលកូនមិននៅទីនោះ»។
ការខ្វែងគំនិតគ្នាអំពីការអប់រំកូនអាចនាំឲ្យប្ដីប្រពន្ធខឹងគ្នា ហើយជាលទ្ធផល ធ្វើឲ្យកូនមិនសូវគោរពឪពុកម្ដាយ។ ដូច្នេះ តើអ្នកអាចបង្ការបញ្ហានេះយ៉ាងដូចម្ដេច?
សូមសាកវិធីនេះ: សូមកំណត់ម៉ោងយ៉ាងទៀងទាត់រាល់សប្ដាហ៍ដើម្បីនិយាយអំពីរឿងប្រដៅអប់រំកូន ហើយបើមានការខ្វែងគំនិតគ្នា សូមនិយាយគ្នាដោយឥតលាក់លៀម។ សូមព្យាយាមយល់ទស្សនៈរបស់គូខ្លួន ហើយទទួលស្គាល់ការពិតដែលថា ទំនាក់ទំនងរវាងម្ដាយនិងកូនគឺខុសគ្នាពីទំនាក់ទំនងរវាងឪពុកនិងកូន។
បង្កើនភាពស្និទ្ធស្នាលរវាងប្ដីនិងប្រពន្ធ
គ្មានការសង្ស័យសោះឡើយថា ការអប់រំកូនគឺជាកិច្ចការដ៏លំបាកមួយ។ ជួនកាល មើលទៅកិច្ចការនេះស៊ីកម្លាំងរបស់អ្នកច្រើនណាស់។ ប៉ុន្តែមិនយូរមិនឆាប់ កូននឹងបែកផ្ទះ ហើយអ្នកទាំងពីរនឹងក្លាយជាប្ដីប្រពន្ធដូចដើម។ តើការចិញ្ចឹមអប់រំកូននឹងធ្វើឲ្យប្ដីប្រពន្ធមានភាពជិតស្និទ្ធខ្លាំងជាងឬមិនជិតស្និទ្ធដូចដើម? ចម្លើយចំពោះសំណួរនេះគឺផ្អែកទៅលើរបៀបដែលអ្នកអនុវត្តតាមគោលការណ៍នេះបានល្អប៉ុណ្ណាដែលមាននៅក្នុងសៀវភៅសាស្ដា ៤:៩, ១០ ដែលថា៖ «មានគ្នា២នាក់ នោះវិសេសជាងនៅតែឯង ពីព្រោះគេមានរង្វាន់យ៉ាងល្អកើតពីការនឿយហត់របស់ខ្លួន។ ដ្បិតបើដួល នោះម្នាក់នឹងជ្រោងគ្នាឡើងវិញ»។
ពេលឪពុកម្ដាយជួយជ្រោងជ្រែងគ្នា នោះអាចទទួលលទ្ធផលដែលនាំឲ្យពេញចិត្ត។ ពិសីដែលបានរៀបរាប់នៅខាងលើ បញ្ជាក់ពីអារម្មណ៍របស់គាត់ដោយនិយាយថា៖ «ខ្ញុំដឹងថាប្ដីខ្ញុំមានគុណសម្បត្ដិល្អជាច្រើន តែតាមរយៈការចិញ្ចឹមអប់រំកូន នោះខ្ញុំបានឃើញគុណសម្បត្ដិល្អៗឯទៀតដែលខ្ញុំមិនធ្លាប់ដឹងពីមុន។ ពេលដែលខ្ញុំឃើញរបៀបដែលគាត់ថែរក្សាកូនដោយក្ដីស្រឡាញ់ នោះខ្ញុំស្រឡាញ់និងគោរពគាត់កាន់តែច្រើន»។ តារាបាននិយាយអំពីបុប្ផាថា៖ «ការឃើញរបៀបដែលប្រពន្ធខ្ញុំបានក្លាយទៅជាម្ដាយដែលចេះយកចិត្តទុកដាក់ចំពោះកូន នោះបានធ្វើឲ្យខ្ញុំកោតសរសើរនិងស្រឡាញ់គាត់យ៉ាងជ្រាលជ្រៅ»។
ប្រសិនបើអ្នកចំណាយពេលជាមួយគូរបស់អ្នក ហើយរួមសហការគ្នាចិញ្ចឹមអប់រំកូនក្នុងអំឡុងពេលកូននៅក្នុងបន្ទុក នោះចំណងអាពាហ៍ពិពាហ៍របស់អ្នកនឹងកាន់តែរឹងមាំកាលដែលកូនធំពេញវ័យ។ ដោយឪពុកម្ដាយធ្វើដូច្នោះ នោះជាគំរូដ៏ល្អបំផុតសម្រាប់កូន។
^ វគ្គ 3 ឈ្មោះបានត្រូវផ្លាស់ប្ដូរ។
សូមសួរខ្លួនឯងថា . . .
-
រាល់សប្ដាហ៍ តើខ្ញុំចំណាយពេលប៉ុន្មានតែពីរនាក់ជាមួយប្ដីឬប្រពន្ធខ្ញុំ?
-
ពេលគូខ្ញុំប្រដៅអប់រំកូន តើខ្ញុំបានគាំទ្រគាត់តាមវិធីណាខ្លះ?
លោកអ្នកក៏ប្រហែលជាចូលចិត្តដែរ
ក្រុមគ្រួសារលោកអ្នកអាចមានសុភមង្គលបាន!
តើ
ការ
ចូរធ្វើជាមិត្តសម្លាញ់ព្រះយេហូវ៉ា
ស្ដាប់បង្គាប់ឪពុកម្ដាយ
ហេតុអ្វីជាការសំខាន់ដែលប្អូនស្ដាប់បង្គាប់ឪពុកម្ដាយ? សូមទស្សនាវីដេអូគំនូរជីវចលនេះ ហើយរកចម្លើយជាមួយនឹងសុខលាភ។