តើអ្វីនឹងជួយអ្នកឲ្យសម្របខ្លួននឹងក្រុមជំនុំថ្មី?
តើអ្នកធ្លាប់រើទៅក្រុមជំនុំថ្មីឬទេ? បើមែន អ្នកទំនងជាយល់ស្របនឹងបងប្រុសហ្សានឆាល ដែលនិយាយថា៖ «ពេលប្ដូរក្រុមជំនុំ យើងនិងក្រុមគ្រួសារយើងពិបាកសម្របខ្លួន ហើយនៅពេលដំណាលគ្នានោះពិបាកធ្វើឲ្យប្រាកដថាយើងទាំងអស់គ្នាមានចំណងមិត្តភាពរឹងមាំជាមួយនឹងព្រះយេហូវ៉ា»។ ក្រៅពីរកការងារ កន្លែងស្នាក់នៅ និងប្រហែលជាសាលាថ្មីសម្រាប់កូន ពួកអ្នកដែលរើទៅកន្លែងថ្មីប្រហែលជាក៏ត្រូវស៊ាំនឹងអាកាសធាតុថ្មី វប្បធម៌ខុសគ្នា និងតំបន់ផ្សាយថ្មី។
បងប្រុសនីកូឡាសនិងបងស្រីសេលីនបានប្រឈមមុខនឹងការពិបាកផ្សេងទៀត។ ការិយាល័យសាខាបារាំងបានចាត់ពួកគាត់ឲ្យរើទៅក្រុមជំនុំថ្មី។ ពួកគាត់រៀបរាប់ថា៖ «នៅដើមដំបូង យើងពិតជារំភើបចិត្តខ្លាំងណាស់។ ប៉ុន្តែក្រោយមក យើងចាប់ផ្ដើមនឹកមិត្តភក្ដិរបស់ពួកយើង។ ពេលនោះ យើងមិនទាន់ជិតស្និទ្ធជាមួយបងប្អូនក្នុងក្រុមជំនុំថ្មីនៅឡើយទេ»។ ដោយសារការរើទៅក្រុមជំនុំថ្មីអាចមានការពិបាក តើអ្នកអាចសប្បាយនិងធ្វើឲ្យការរើទៅក្រុមជំនុំថ្មីនោះកើតប្រយោជន៍ច្រើនបំផុតយ៉ាងដូចម្ដេច? តើអ្នកឯទៀតអាចជួយអ្នកដែលមកថ្មីយ៉ាងដូចម្ដេច? តើតាមរបៀបណាអ្នកអាចលើកទឹកចិត្តអ្នកឯទៀតនិងទទួលការលើកទឹកចិត្តពីអ្នកឯទៀតនៅក្នុងក្រុមជំនុំថ្មី?
គោលការណ៍បួនដើម្បីជួយអ្នកឲ្យសម្របខ្លួន
ចូរពឹងផ្អែកលើព្រះយេហូវ៉ា
១. ចូរពឹងផ្អែកលើព្រះយេហូវ៉ា។ (ចសព. ៣៧:៥) បងស្រីខាស៊ូមីពីប្រទេសជប៉ុន បានរើចេញពីក្រុមជំនុំដែលគាត់បានបម្រើអស់រយៈពេល២០ឆ្នាំ ពេលប្ដីរបស់គាត់បានត្រូវផ្ទេរការងារ។ តើគាត់«ទុកឲ្យព្រះយេហូវ៉ាបង្ហាញផ្លូវ»គាត់យ៉ាងដូចម្ដេច? គាត់និយាយថា៖ «ម្ដងហើយម្ដងទៀត ខ្ញុំបានប្រាប់ព្រះយេហូវ៉ាអំពីភាពភ័យខ្លាច អារម្មណ៍ឯកា និងកង្វល់ទាំងអស់ដែលខ្ញុំមានក្នុងចិត្ត។ រាល់ដងដែលខ្ញុំធ្វើដូច្នោះ លោកបានផ្ដល់កម្លាំងដែលខ្ញុំត្រូវការ»។
តើអ្នកអាចកាន់តែទុកចិត្តលើព្រះយេហូវ៉ាយ៉ាងដូចម្ដេច? ដូចរុក្ខជាតិត្រូវការទឹកនិងស្រូបជីវជាតិពីដីដើម្បីលូតលាស់ ជំនឿរបស់យើងក៏ត្រូវការទឹកនិងជីវជាតិក្នុងន័យធៀបដើម្បីរឹងមាំដែរ។ បងនីកូឡាសដែលបានត្រូវរៀបរាប់នៅខាងលើបានឃើញថា ការរំពឹងគិតអំពីគំរូរបស់អាប្រាហាំ លោកយេស៊ូ និងប៉ូល ពោលគឺបុរសដែលបានលះបង់យ៉ាងច្រើនដើម្បីធ្វើតាមបំណងប្រាថ្នារបស់ព្រះយេហូវ៉ា បានធ្វើឲ្យគាត់កាន់តែមានទំនុកចិត្តថាព្រះយេហូវ៉ានឹងជួយគាត់។ បើអ្នកសិក្សាគម្ពីរជាទៀងទាត់ នោះនឹងជួយអ្នកឲ្យប្រឈមមុខនឹងការផ្លាស់ប្ដូរណាក៏ដោយក្នុងជីវិតរបស់អ្នក ហើយអ្នកនឹងទាញមេរៀនដែលអាចប្រើដើម្បីលើកទឹកចិត្តអ្នកឯទៀតក្នុងក្រុមជំនុំថ្មី។
ចូរជៀសវាងពីការប្រៀបធៀប
២. ចូរជៀសវាងពីការប្រៀបធៀប។ (អទ. ៧:១០) បងប្រុសជូលត្រូវសម្របខ្លួននឹងវប្បធម៌ដែលខុសគ្នាដាច់ ពេលដែលគាត់រើពីប្រទេសបេណាំងទៅសហរដ្ឋអាម៉េរិក។ គាត់និយាយថា៖ «ខ្ញុំមានអារម្មណ៍ថាខ្ញុំត្រូវរ៉ាយរ៉ាប់ជីវប្រវត្តិរបស់ខ្ញុំដល់បុគ្គលថ្មីៗដែលខ្ញុំជួប»។ ដោយសារនៅតំបន់ថ្មី របៀបគេសួរនាំគឺខុសគ្នាឆ្ងាយពីកន្លែងដែលគាត់ធំឡើង គាត់ចាប់ផ្ដើមគេចពីបងប្អូនក្នុងក្រុមជំនុំ។ ប៉ុន្តែ ក្រោយពីគាត់ស្គាល់បងប្អូនកាន់តែច្បាស់ គាត់បានប្ដូរទស្សនៈរបស់ខ្លួន។ គាត់និយាយថា៖ «ឥឡូវខ្ញុំទទួលស្គាល់ថាមនុស្សទាំងអស់នៅផែនដីគឺដូចគ្នា គ្រាន់តែខុសគ្នាត្រង់ពាក្យសម្ដីនិងការប្រព្រឹត្តប៉ុណ្ណោះ។ គឺសំខាន់ចាំបាច់ឲ្យទទួលយកពួកគេជាពួកគេ»។ ដូច្នេះ ចូរកុំប្រៀបធៀបក្រុមជំនុំចាស់ទៅនឹងក្រុមជំនុំថ្មី។ បងស្រីម្នាក់ដែលជាអ្នកត្រួសត្រាយឈ្មោះអានលីសនិយាយថា៖ «ខ្ញុំរើទៅក្រុមជំនុំថ្មី ដោយសារខ្ញុំចង់រៀនអ្វីថ្មី មិនមែនចង់ឲ្យក្រុមជំនុំថ្មីដូចក្រុមជំនុំចាស់ទេ»។
អ្នកចាស់ទុំក៏ត្រូវជៀសវាងពីការប្រៀបធៀបក្រុមជំនុំថ្មីទៅនឹងក្រុមជំនុំចាស់ដែរ។ ទោះជាបងប្អូននៅក្រុមជំនុំថ្មីរបស់អ្នកធ្វើអ្វីណាមួយតាមរបៀបផ្សេងក្ដី នោះមិនតែងតែមានន័យថាខុសទេ។ គឺជាការឈ្លាសវៃឲ្យស្វែងយល់ថែមទៀតអំពីស្ថានភាពក្នុងតំបន់នោះមុនឲ្យយោបល់។ (អទ. ៣:១, ៧ខ) គឺជាការប្រសើរជាងឲ្យបង្រៀនបងប្អូនតាមរយៈគំរូល្អរបស់អ្នក ជាជាងព្យាយាមបង្ខំពួកគេឲ្យមានគំនិតដូចអ្នក។—២កូ. ១:២៤
ចូរជាប់រវល់
៣. ចូរជាប់រវល់ក្នុងក្រុមជំនុំថ្មី។ (ភី. ១:២៧) ការរើតម្រូវឲ្យចំណាយពេលនិងកម្លាំងជាច្រើន។ ប៉ុន្តែ គឺសំខាន់ចាំបាច់ឲ្យយើងចូលរួមកិច្ចប្រជុំឲ្យបានឆាប់បំផុត ហើយបើអាចធ្វើបានគឺចូលរួមដោយផ្ទាល់។ សូមគិត បើបងប្អូនក្នុងក្រុមជំនុំថ្មីមិនសូវស្គាល់យើងឬកម្រជួបយើង តើពួកគេអាចគាំទ្រយើងយ៉ាងដូចម្ដេចបាន? បងស្រីលូស៊ីនដាដែលបានរើទៅក្រុងធំនាប្រទេសអាហ្វ្រិកខាងត្បូងជាមួយកូនស្រីពីរនាក់ និយាយថា៖ «មិត្តរបស់ខ្ញុំបានលើកទឹកចិត្តខ្ញុំឲ្យខំមានចំណងមិត្តភាពជិតស្និទ្ធជាមួយនឹងបងប្អូនក្នុងក្រុមជំនុំថ្មី ផ្សព្វផ្សាយជាមួយនឹងពួកគេ និងចូលរួមលើកដៃឆ្លើយនៅកិច្ចប្រជុំ។ យើងក៏បានប្រាប់បងប្អូនថាពួកគេអាចប្រើផ្ទះរបស់យើងសម្រាប់កិច្ចប្រជុំផ្សព្វផ្សាយ»។
ការ«តស៊ូ»ក្នុងសកម្មភាពកិច្ចបម្រើព្រះជាមួយនឹងបងប្អូនក្នុងក្រុមជំនុំថ្មីរបស់អ្នក នឹងជួយពង្រឹងអ្នកនិងអ្នកឯទៀត។ បងអានលីសដែលបានត្រូវរៀបរាប់នៅខាងលើ បានទទួលការលើកទឹកចិត្តពីអ្នកចាស់ទុំឲ្យព្យាយាមទៅផ្សព្វផ្សាយជាមួយបងប្អូនទាំងអស់ក្នុងក្រុមជំនុំថ្មីរបស់គាត់។ តើមានលទ្ធផលយ៉ាងណា? គាត់និយាយថា៖ «ភ្លាមៗ ខ្ញុំឃើញថានេះគឺជារបៀបដ៏ល្អមួយដើម្បីមានអារម្មណ៍ជិតស្និទ្ធនឹងក្រុមជំនុំ»។ ម្យ៉ាងទៀត ពេលអ្នកស្ម័គ្រចិត្តធ្វើកិច្ចការផ្សេងៗដូចជា សម្អាតនិងថែទាំសាលប្រជុំ នេះនឹងបង្ហាញដល់បងប្អូនថាអ្នកចាត់ទុកក្រុមជំនុំនេះជាក្រុមជំនុំរបស់អ្នក។ កាលដែលអ្នកកាន់តែជាប់រវល់ក្នុងក្រុមជំនុំថ្មី បងប្អូននឹងកាន់តែមានអារម្មណ៍ស្រួលជាមួយអ្នក ហើយអ្នកនឹងឆាប់មានអារម្មណ៍ថាក្រុមជំនុំថ្មីជាក្រុមគ្រួសាររបស់អ្នក។
ចូរបង្កើតមិត្តភាពថ្មី
៤. ចូរបង្កើតមិត្តភាពថ្មី។ (២កូ. ៦:១១-១៣) ការបង្ហាញការយកចិត្តទុកដាក់ជារបៀបសំខាន់បំផុតដើម្បីមានមិត្តថ្មី ដូច្នេះសូមទុកពេលមុននិងក្រោយកិច្ចប្រជុំដើម្បីនិយាយជាមួយបងប្អូននិងព្យាយាមស្គាល់ពួកគេ។ សូមព្យាយាមស្គាល់ឈ្មោះរបស់ពួកគេ។ ពេលអ្នកចាំឈ្មោះរបស់បងប្អូន រួសរាយរាក់ទាក់ និងស្រួលទាក់ទង ពួកគេនឹងចង់ចូលទៅជិតអ្នក ហើយអ្នកទំនងជានឹងទៅជាមិត្តល្អនឹងគ្នា។
ជាជាងបារម្ភខ្លាចគេមិនពេញចិត្តអ្នក សូមទុកឲ្យបងប្អូនថ្មីស្គាល់អ្នកជាខ្លួនអ្នក។ សូមរៀនពីបងលូស៊ីនដាដែលបាននិយាយថា៖ «ឥឡូវយើងមានមិត្តភក្តិជិតស្និទ្ធដោយសារយើងអញ្ជើញអ្នកឯទៀតឲ្យមកផ្ទះរបស់យើងមុន»។
«ចូរទទួលស្វាគមន៍គ្នាទៅវិញទៅមក»
បុគ្គលខ្លះប្រហែលជាមានអារម្មណ៍ភ័យពេលចូលក្នុងសាលប្រជុំដែលពេញទៅដោយបុគ្គលដែលពួកគេមិនធ្លាប់ស្គាល់។ ដូច្នេះ តើតាមរបៀបណាអ្នកអាចធ្វើឲ្យបុគ្គលថ្មីដែលបានរើមកមានអារម្មណ៍ស្រួលជាង? សាវ័កប៉ូលបានលើកទឹកចិត្តឲ្យ«ទទួលស្វាគមន៍គ្នាទៅវិញទៅមក ដូចគ្រិស្តបានទទួលស្វាគមន៍អ្នករាល់គ្នា»។ (រ៉ូម ១៥:៧) ដោយយកតម្រាប់តាមគ្រិស្ត ពួកអ្នកចាស់ទុំអាចជួយអ្នកថ្មីឲ្យមានអារម្មណ៍កក់ក្ដៅ។ (សូមមើលប្រអប់ដែលមានចំណងជើងថា « តើអ្វីជួយឲ្យការរើដំណើរការយ៉ាងរលូន?») តាមការពិត បងប្អូនទាំងអស់ក្នុងក្រុមជំនុំ រួមទាំងក្មេងៗ អាចរួមចំណែកក្នុងការធ្វើឲ្យអ្នកថ្មីមានអារម្មណ៍ស្រួល។
ការស្វាគមន៍អ្នកឯទៀតរួមបញ្ចូលការទទួលអ្នកឯទៀតដោយរាក់ទាក់ ប៉ុន្តែក៏ប្រហែលជារួមបញ្ចូលការផ្ដល់ជំនួយផងដែរ។ ជាឧទាហរណ៍ បងស្រីម្នាក់បាននាំបងស្រីម្នាក់ទៀតដែលទើបតែរើមកតំបន់របស់គាត់មើលជុំវិញក្រុង ហើយបង្ហាញគាត់អំពីរបៀបប្រើមធ្យោបាយធ្វើដំណើរសាធារណៈ។ ការប្រព្រឹត្តរបស់បងស្រីនោះដក់ជាប់ក្នុងចិត្តរបស់បងស្រីថ្មីនោះ ហើយបានជួយគាត់ឲ្យសម្របខ្លួន។
ឱកាសរីកចម្រើន
កាលដែលកណ្ដូបធំលូតលាស់ វាសកប៉ុន្មានដងមុនវាអាចហើរបាន។ ស្រដៀងគ្នាដែរ ពេលរើទៅក្រុមជំនុំថ្មី អ្នកត្រូវសកឬលះចោលការព្រួយបារម្ភដែលរារាំងអ្នកមិនឲ្យត្រដាងស្លាបហោះហើរក្នុងន័យធៀបនៅក្នុងកិច្ចបម្រើរបស់ព្រះយេហូវ៉ា។ បងនីកូឡាសនិងបងសេលីននិយាយថា៖ «ការរើគឺជាការបង្ហាត់បង្រៀនដ៏ល្អមួយ។ យើងត្រូវតែបណ្ដុះគុណសម្បត្តិថ្មីដើម្បីសម្របខ្លួនជាមួយមនុស្សថ្មីនិងកន្លែងថ្មី»។ បងហ្សានឆាលដែលបានត្រូវរៀបរាប់នៅដើមអត្ថបទនិយាយអំពីប្រយោជន៍ដែលក្រុមគ្រួសាររបស់គាត់បានទទួលថា៖ «ក្នុងក្រុមជំនុំថ្មី កូនៗយើងមានភាពចាស់ទុំជាង ហើយកាន់តែជិតស្និទ្ធនឹងព្រះយេហូវ៉ា។ គ្រាន់តែប៉ុន្មានខែក្រោយពីរើមក កូនស្រីយើងបានចាប់ផ្ដើមមានផ្នែកក្នុងកិច្ចប្រជុំសម្រាប់កិច្ចបម្រើនិងជីវិតជាគ្រិស្តសាសនិក ហើយកូនប្រុសយើងបានទៅជាអ្នកផ្សាយដែលមិនទាន់ទទួលការជ្រមុជទឹក»។
ចុះបើកាលៈទេសៈរបស់អ្នកមិនអនុញ្ញាតឲ្យអ្នករើទៅកន្លែងផ្សេងដូចជាទៅកន្លែងដែលមានសេចក្ដីត្រូវការច្រើនជាង? អ្នកអាចធ្វើឲ្យក្រុមជំនុំបច្ចុប្បន្នរបស់អ្នក ហាក់ដូចជាក្រុមជំនុំថ្មីដោយធ្វើតាមយោបល់ខ្លះៗក្នុងអត្ថបទនេះ។ កាលដែលអ្នកពឹងផ្អែកលើព្រះយេហូវ៉ា សូមជាប់រវល់ក្នុងសកម្មភាពក្រុមជំនុំ ដោយរៀបគម្រោងផ្សព្វផ្សាយជាមួយបងប្អូននិងបង្កើតមិត្តថ្មីឬទៅជាមិត្តជិតស្និទ្ធជាងជាមួយបងប្អូនដែលអ្នកស្គាល់រួចហើយ។ តើអ្នកប្រហែលជាអាចជួយអ្នកថ្មីឬបងប្អូនដែលត្រូវការជំនួយឬទេ? ដោយសារសេចក្ដីស្រឡាញ់ជាសញ្ញាសម្គាល់នៃគ្រិស្តសាសនិកពិត ការជួយអ្នកឯទៀតអាចនាំឲ្យអ្នកចូលកាន់តែជិតព្រះយេហូវ៉ា។ (យ៉ូន. ១៣:៣៥) អ្នកអាចប្រាកដថា«ព្រះពេញចិត្តគ្រឿងបូជាបែបនេះ»។—ហេ. ១៣:១៦
ទោះជាមានការពិបាក គ្រិស្តសាសនិកជាច្រើនបានអរសប្បាយនិងធ្វើឲ្យការរើទៅក្រុមជំនុំថ្មីកើតប្រយោជន៍ច្រើនបំផុត ហើយអ្នកក៏អាចធ្វើដូច្នេះដែរ! បងអានលីសនិយាយថា៖ «ការរើក្រុមជំនុំបានជួយខ្ញុំបើកចិត្តឲ្យទូលាយ»។ ឥឡូវបងខាស៊ូមីជឿជាក់ថា ការរើក្រុមជំនុំអាចជួយយើងឲ្យឃើញថា«ព្រះយេហូវ៉ាជួយគាំទ្រតាមរបៀបដែលមិនធ្លាប់ពិសោធ»។ ចុះយ៉ាងណាបងជូល? គាត់និយាយថា៖ «ចំណងមិត្តភាពថ្មីដែលខ្ញុំមានបានជួយខ្ញុំឲ្យមានអារម្មណ៍ស្រួល ហើយឥឡូវខ្ញុំមានអារម្មណ៍ជិតស្និទ្ធខ្លាំងណាស់ជាមួយនឹងបងប្អូនក្នុងក្រុមជំនុំបានជាខ្ញុំពិបាករើចេញពីក្រុមជំនុំនេះ»។
