INUUSUTTUT APERIPPUT
Qanoq nikallornartumik eqqarsarnaveersaarsinnaavunga?
Imminut qanoq isumaqarfigivit?
Neriulluartoq
“Sapinngisamik nuannaarniartarlungalu eqqissisimaniartuusarpunga. Ullut tamaasa qungujulasuuniartarpunga.” – Valerie.
Isumalluanngitsoq
“Ajunngitsumik pisoqaraangat ingerlaannaq eqqarsartarpunga ilumoorsinnaanngitsoq.” – Rebecca.
Piviusorsiortoq
“Neriulluartuuneq pakatsisitsisarpoq isumalluanngitsuunerlu nikallortitsisarluni. Piviusorsiortuuneq pissutsinik piviusunik paasinninnissamut iluaqutigisarpara.” – Anna.
Sooq pingaaruteqarpa?
Biibilimi allassimavoq: “Qiimasaarnerup ullut tamaasa nalliussivinngortittarpai.” (Ussatit 15:15) Ersarippoq inuit pisariaqanngitsumik nikallornartumik eqqarsarnaveersaartartut inuunerullu ajunngitsortaanik isiginninniarnerusartut nuannaarnerusut. Aamma ikinngutitaarnissaat ilimanarnerusarpoq. Inuimmi aliasuttuartut isumalluanngitsullu ilagineqarusuppallaarneq ajorput.
Isumalluarniartuugaluarlutilli inuuninni erloqinartunik nalaataqarsinnaavutit. Assersuutigalugu:
Sorsuttut, peqqarniisaarniartut pinerluttullu nutaarsiassani tusartuarpavut.
Immaqa ilaquttanni ajornartorsiuteqarpusi.
Qularnanngitsumik kukkusarlutillu sanngiissuteqarputit akiortariaqakkannik.
Ikinngutinnit ajuallatsinneqarsimasinnaavutit.
Ajornartorsiutit taakku soqutiginngitsuusaaginnarnagit imaluunniit eqqarsaatigiuaannarnagit piviusorsiortumik isiginiartakkit. Piviusorsiortumik isiginnittaaseqarneq nikallornartunik eqqarsaateqarpallaannginnissamut inuunermilu atugarineqartut ingasattumik nikalluutiginnginnissaannut iluaqutaasinnaavoq.
Qanoq iliorsinnaasutit
Kukkussutitit piviusorsiortumik isiginnittaaseqarfigikkit.
Biibilimi allassimavoq: “Nunami ima iluassuseqartigisumik inoqanngilaq ajunngitsuliuinnavilluni ajortuliunngisaannarlunilu inuusumik.” (Oqaluussisartup oqaasii 7:20) Kukkusarninnit naammalluinnanngitsuuninnillu inuinnaanerit, imaanngitsoq naleqannginnerit, takuneqarsinnaavoq.
Qanoq piviusorsiortuusinnaasutit: Kukkussutitit aaqqinniartakkit, naammalluinnartuunissalli naatsorsuutigeqinagu. “Nikallunnginniassagama kukkussutikka eqqarsaatigivallaarnaveersaartarpakka”, taama angut inuusuttoq Caleb oqarpoq. “Paarlattuanik pikkorinnerulerniassagama ilinniutiginiartarpakka.”
Imminut allanut sanillersuuteqinak.
Biibilimi allassimavoq: “Immitsinnut angisuusoreqinata, kamassaaqinata sinngaateqinatalu.” (Galatiamiut 5:26) Pisuni qaaqqusaaffigisimanngisanni assilisat internetikkut attaveqaqatigiittarfinni ikkunneqarsimasut isiginnaarnerat pakatsissutigisinnaavat. Aamma misigilersinnaavutit ikinngutivit nuannarinngikkaatsit.
Qanoq piviusorsiortuusinnaasutit: Sunut tamanorluinnaq qaaqqusaanaviannginnerit akueriuk. Internetikkut attaveqaqatigiittarfinni inuup inuunerani pisut tamarmik takuneqarsinnaaneq ajorput. “Internetikkut attaveqaqatigiittarfinni inuit inuuneranni pisut pissanganarnerpaat taamaallaat takuneqarsinnaasarput”, taama inuusuttuaraq Alexis oqaluttuarpoq. “Inuit ulluinnarni misigisartakkatik amerlanertigut takutinneq ajorpaat.”
Eqqisseqatigiissitsisuugit – pingaartumik ilaquttanni.
Biibilimi allassimavoq: “Ajornanngippat – ilissi aalajangiisuusinnaagussi – inuit tamaasa eqqisseqatiginiarsigit.” (Romamiut 12:18) Allat iliuusii aqussinnaanngilatit, qisuariarnerilli aqussinnaavat. Eqqissisimaniarlutit aalajangersinnaavutit.
Qanoq piviusorsiortuusinnaasutit: Ilaquttanni ajornartorsiutit ajornerulersinnagit ikinngutinnut pissuseqartarnittut eqqissisimaniartuugit. “Tamatta naammalluinnanngitsuugatta immitsinnut ajuallatsittoortarpugut”, taama inuusuttuaraq Melinda oqarpoq. “Qanoq qisuariarnerluta – eqqissisimaniarnerluta akeqqersimaarniarnerlutaluunniit – nammineq aalajangertussaavarput.”
Qujamasuttuuneq ilinniaruk.
Biibilimi allassimavoq ‘qujaniartassasugut’. (Kolossemiut 3:15) Qujamasuttuuguit inuuninni nuanninngitsut isiginiarnagit ajunngitsut isiginiarnerussavatit.
Qanoq piviusorsiortuusinnaasutit: Ajornartorsiutitit eqqumaffigikkit, inuuninnili ajunngitsut isiginngitsuusaaqinagit. “Ullut tamaasa nuannersoq ataaseq ullorsiutinnut allattarpara”, arnaq inuusuttoq Rebecca taama oqaluttuarpoq. “Taamaaliortarpunga inuuninni ajornartorsiuteqaraluarlunga nuannersunik tamatigut eqqarsaateqarsinnaaninnik imminut eqqaasinniarlunga.”
Kikkut ikinngutiginiarnerlugit eqqarsaatigiuk.
Biibilimi allassimavoq: “Ikinngutipalaaqarneq ileqqorikkaluartunut aseruutissiisarpoq.” (1 Korinthimiut 15:33) Isornartorsiuisartunik, misigittaatsunik sorraatsunilluunniit ilagisartagaqaruit isiginnittaasiannit sunnertissaatit.
Qanoq piviusorsiortuusinnaasutit: Ikinngutitit artornartunik nalaataqartut imaassinnaavoq aliasulerlutillu isumatsaqqalersut. Taamatut atugaqarneranni tapersersukkit, ajornartorsiutaalli sunnertissutigivallaaqinagit. “Inuit nikallornartumik isiginnittaaseqartut kisiisa ilagisassanngilavut”, taama arnaq inuusuttoq Michelle oqarpoq.
Tamanna pillugu atuagassat allat
Biibili naapertorlugu ‘ulluni atugarliungaarfiusuni’ inuuvugut. (2 Timotheusi 3:1) Silarsuarmi taama ajornartorsiuteqarfiusumi isumalluartuunissat sapernartippiuk? Atuaruk “Sooq Guutip naalliunnartoqarnera akueraa?”