“Biibili qanoq atuassanerlugu nalornissutigigaanni pik­kunaappasis­sinnaa­voq”, Will inuusut­tuaraasoq oqarpoq.

 Biibilimik atuarneq qanoq pis­san­ganar­tun­ngor­tin­neqarsin­naaner­soq paaserusuppiuk? Allaaserisaq una iluaqutigisin­naavat.

•  Takorlooruminarnerulersikkit

•  Misissueqqissaarit

•  Inuusuttoqativit isumaat

 Atuakkatit takorluukkit. Imaaliorsinnaavutit:

1.   Biibilimi oqaluttuaq atuaq­qis­saarusutat toqqaruk. Assersuutigalugu iivangkiiliuni oqaluttuamik imaluunniit jw.org-imi pis­san­ganarsaaril­luni Biibilimik atuaanermit toqqaasinnaavutit.

2.   Oqaluttuaq atuaruk. Kisimiillutit atuarsinnaavat imaluunniit ikinngutitit ilaqut­tatil­luunniit ilagalugit nipituumik atuarsinnaavarsi. Arlarsi oqalut­tuartuusin­naavoq ilaalu inut­taasuus­saarsin­naapput.

3.   Siunnersuutit uku misilikkit:

   •   Oqaluttuami pisut titartakkit. Imaluunniit tulleriiaarneri malillugit titartaagit qanorlu pisoqartoq oqaasertalernerisigut allallugit.

   •   Upperluartoq pillugu atuaraangakku taassuma pissusii iliuusiilu qanorlu Guutimit ajun­ngisaarfigineqarnera allakkit.

   •   Oqaluttuaq tusagas­sianngor­tiguk. Pisoq assigiinngitsuniit isigalugulusooq oqaluttuariuk, inuttarineqartullu pingaarnerusut “takunnittuusullu” apersukkit.

   •   Oqaluttuarineqartut ilaat aalajangiinerlut­toq silatusaartumik aalajangiisuuppat qanoq kin­guneqas­sagaluar­toq eqqarsaatigiuk, assersuutigalugu Petrusip Jiisusimik miserratiginninnera. (Markusi 14:66-72) Petrusi tatineqarnermini qanoq ajun­nginnerusumik qisuariarsin­naagaluarpa?

   •   Nutaaliorneq nuannarigukku Biibilimi oqaluttuaq isigin­naagas­sianngor­tissin­naavat. Oqaluttuap qanoq ilinniar­figineqarsin­naanera ilannguguk. – Romamiut 15:4.

 Oqaluttuap annikitsualuttortai misissoq­qissaaruk­kit “erlinnartuutit” nanisinnaavatit. Oqaluttuami oqaaseq ataasiinnaq mar­lulluun­niit imalerujus­suusin­naapput.

 Assersuutigalugu Matthæusi 28:7 Markusi 16:7-imut naleqqiuguk.

•   Jiisusip ajoqersukkaminut takutik­kumaar­nera Markusip allaatigigamiuk sooq ‘Petrusi’ taallugu ilannguppaa?

•  Paasissutissat: Markusi pisunik takun­nittuun­ngilaq, Petrusimilli paasitinneqarunarpoq.

•  Erlinnartuut nassaarisassaq: Sooq Jiisusip takoqqikkusukkaani Petrusimut nuan­naarutaasimas­sava? (Markusi 14:66-72) Jiisusip qanoq takutippaa Petrusimut ikinngutaal­luarluni? Jiisusi ilaarlugu qanoq allanut ikinngutaal­luarsinnaavit?

 Biibilimi oqaluttuat takor­looruminar­nerulersin­nerisigut annikit­sualut­tortaallu misissoq­qissaarnerisigut Biibilimik atuarneq pis­sanganar­tunngor­tissin­naavat!