ILINNIAGASSAQ 13
Upperisarsiornerit qanoq pineqassappat?
1. Guutip upperisarsioqatigiit tamaasa akuerai?
Upperisarsioqatigiinni tamani Guutimit iluarisaarusuttunik inoqarpoq. Nuanneqaaq nalunagu Guutip inuit imminit iluarisaarusuttut maluginiartarai soqutigalugillu. Ajoraluartumilli inuit uppertuunerartut ilaat ajorluinnartunik iliuuseqartarput. (2 Korinthimiut 4:3, 4; 11:13-15) Nutaarsiassaqartitsiviit naapertorlugit upperisarsioqatigiit ilaat allaat peqqarniisaarniarnerni, sorsunnerni meeqqanillu atornerluinerni akuusarput. Guutimik ilumoorlutik upperinnittunit tamanna aliasuutigineqangaartarpoq! — Atuakkit Matthæusi 24:3-5, 11, 12.
Upperisarsiorneq ilumoortoq Guutimik naalannarsisitsivoq; upperisarsiorneq eqqunngitsoq Guutimit iluarisaanngilaq. Upperisarsiornermi eqqunngitsumi ajoqersuutit Biibilimik tunngaveqanngitsut, assersuutigalugu Guuti pillugu toqusullu pillugit eqqunngitsut, ilinniartitsissutigineqartarput. Jehovalli kissaatigaa inuit imminut tunngatillugu ilumoortumik paasinninnissaat. — Atuakkit Oqaluussisartup oqaasii 9:5, 10; 1 Timotheusi 2:3-5.
2. Upperisarsiornerit qanoq pineqassappat?
Qujanartumik Guuti upperisarsioqatigiinnit imminik asanninnerartunit Saatanilli silarsuaanik asannittuusunit salloqittagaaneq ajorpoq. (Jaaku 4:4) Guutip oqaasiani upperisarsiorneq eqqunngitsoq ‘Babylonersuarmik’ taaneqarpoq. Itsaq Babyloni illoqarfiuvoq ulersuup Noap nalaani pisup kingorna upperisarsiornerup eqqunngitsup pilerfia. Ungasinngitsukkut Guutip upperisarsioqatigiit inunnik salloqittaasut naqisimannittullu imaaliallaannaq suujunnaarsissavai. — Atuakkit Saqqummersitat 17:1, 2, 5, 16, 17; 18:8.
Silarsuaq tamakkerlugu inuit upperisarsiornermi eqqunngitsumiittut eqqortuliorusuttulli Jehovap puiunngilai. Maanna inuit taakku katersorpai ataasiussuseqalersillugit sallusuissummik ilinniartinnerisigut. — Atuakkit Mika 4:2, 5.
3. Inuit eqqortuliorusuttut qanoq iliortariaqarpat?
Jehovap inuit sallusuissummik paasinnikkusullutillu eqqortuliorusuttut soqutigai. Ilungersorluni kajumissaarpai upperisarsiorneq eqqunngitsoq qimaqqullugu. Inuit Guutimik asannittut taassumannga iluarineqarumallutik inooriaatsiminnik allannguerusussuseqarput. — Atuaruk Saqqummersitat 18:4.
Ukiuni hundredelinni siullerni inuit eqqortuliorusuttut nutaarsiassaq nuannersoq apustilinit tusaramikku nuannaangaalerput. Jehovamit inooriaatsimik allamik pilluarnarnerusumik ilinniartinneqarput. Inuunerat siunertaqarlualerlunilu siunissamut neriuuteqalerput. Uagutsinnut maligassaalluarput, nutaarsiassarmi nuannersoq pillugu ilikkakkatik malillugit inuulerput Jehovamik pingaarnerpaatitsinermikkut. — Atuakkit 1 Thessalonikamiut 1:8, 9; 2:13.
Jehovap upperisarsiornermik eqqunngitsumik qimatsisut imminik pallorfiginnittunut ilaqutariissortaminut tikilluaqqusarpai. Jehovap asannittumik qaaqqusissutaa tamanna qujarukkukku taassumunnga ikinngutaalissaatit, taassuminnga pallorfiginnittunik asannittunik uppeqatitaarlutillu ‘ilaqutartaassaatit’, naassaanngitsumillu inuussaatit. — Atuakkit Markusi 10:29, 30; 2 Korinthimiut 6:17, 18.
4. Guuti qanoq ililluni nunarsuaq tamakkerlugu inunnik nuannaarutissiiumaarpa?
Upperisarsiornerup eqqunngitsup qanittukkut suujunnaarsinneqarnissaa tusagassaavoq nuannersoq. Nunarsuaq tamakkerlugu inuit naqisimaneqarunnaassapput. Qaqugumulluunniit inuit upperisarsiornermit eqqunngitsumit tammartinneqaqqinnatillu avissaartuutitseqqinneqassanngillat. Taamanikkussamut kikkut tamarmik ataasiussuseqarlutik Guutimik ilumoortutuamik pallorfiginnissapput. — Atuakkit Saqqummersitat 18:20, 21; 21:3, 4.