• “Allaanngilaq uiga allasioqat­taartartoq.”

• “Nikanarsar­neqartutut, kajungerineqan­ngitsutut naleqan­ngitsutullu misigivunga.”

• “Allanut oqaloqatigiis­sutigisin­naanngilara. Nipaatsumik naalliuppunga.”

• “Misigivunga Jehovap soqutigin­ngikkaanga.”

Qulaani allassimasut ersersippaat nuliaasoq qanoq naalliutsigisartoq uini pornografiimik isiginnaaraangat. Uiusoq qaammatini ukiuniluunniit arlalinni isertorluni taamaalior­tarsimappat misigilersinnaavoq tatigisin­naanagu. Nuliaasoq ima oqarsimavoq: “Misigivunga uiga ilisarisimanagu. Allamik aamma isertuus­saqarpa?”

Una allaaserisaq pornografiimik isiginnaar­tartumik uilimmut allataavoq. a Biibilimi najoqqutassiat tuppallersaataasut sammineqassapput. Taakkulu aqqutigalugit paasissavaa Jehovap asagaani aamma misigis­sutsikkut anersaakkullu ikiorusukkaani. b

Uiit qanoq iliussanersoq pinngitsaalisin­naanngik­kaluarlugu ernumaval­laarunnaar­nissannut eqqissisimaan­narnissannullu iliuuseqarsin­naavutit. Tulliuttut eqqarsaatigikkit.

Imminut pisuutin­naveersaarit. Imaassinnaavoq nuliaasoq uimi pornografiimik isiginnaar­tarneranut imminut pisuutittoq. Alice c arnatut atorsin­naanngitsutut misigaaq. Ima eqqarsarpoq: ‘Sooq uima arnat allat isigerusunneruai uanga pinnanga?’ Arnat ilaat qisuariapiloornertik pissutigalugu imminut pisuutittarput eqqarsarlutillu pissutsinik ajornerulersitsiin­narlutik. Danielle ima oqarpoq: “Narrassimasutut kamattarnera pissutigalugu aappariittut aserorterisutut misigaanga.”

Illit taamatut misigiguit ilisimassavat Jehovap akisussaatin­ngimmatit. Jaaku 1:14-imi allassimavoq: “[Kinaluunniit] pileris­sutsiminit kajungilersin­neqarnikkut usserneqar­nikkullu misilin­neqartarpoq.” (Rom 14:12; Flp 2:12) Jehovap pisuutinnak  taassumunnga ilumoorfigin­ninnerit pingaartippaa. – Nal 2. 16:9.

Aamma iluaqutaassaaq paasissallugu uiusoq pornografiimik isiginnaartarmat imaanngitsoq nuliaasoq uiminut kajunger­narunnaarsimasoq. Immikkut ilisimasallit oqarput kialluunniit naammas­sisinnaan­ngisaanik pornografii kinguaas­siuutitigut pileris­suseqalersitsisartoq.

Isumakulup­pallaar­naveersaarit. Catherine oqarpoq uimi pornografiimik isiginnaar­tarnera kisiat eqqarsaatigisarlugu. Frances oqarpoq: “Uiga tammaaleraangakku ullup ilarsua ernumasarpunga.” Nuliaasut ilaat oqaluttuarput uppeqatitik uimik ajornar­torsiutaannik ilisimasaqarunartut akornan­niileraangamik kanngusut­tarlutik. Allat oqartarput allanit paasineqarsin­naanngitsutut misigisaramik kisimiittutut misigisarlutik.

Taamatut misigineq pissusis­samisoorpoq. Eqqarsaatigiin­nartarukkilli ernumaleralut­tuinnassaatit. Taamaaliornak Jehovamut attaveqarnerit pingaarnertut eqqarsaatigisaruk. Tamannami nukittorsaatigissavat. – Tuss 62:3; Ef 6:10.

Arnat Biibilimi oqaluttuarineqartut ajornar­torsiutitik pillugit Jehovamut qinunikkut saaffigin­ninnermikkut tuppallersar­neqartut atuartarukkit eqqarsaatigeq­qissaar­tarukkillu iluaqutigissavat. Ajornar­torsiutaat ingerlaannaq iluarsiivigin­ngikkaluarlugit eqqissinermik tunisarpai. Assersuutigalugu Hanna ajornar­torsiutini pillugit ‘isumatsaq­qarujus­suarpoq’. ‘Sivisuumilli qinoreerluni’ eqqissineq misigaa, naak ajornar­torsiutini aaqqinneqas­sanersut ilisiman­ngikkaluarlugu. – Sam 1. 1:10, 12, 18; Kor 2. 1:3, 4.

Ilagiinni utoqqaanertanut ikiortis­sarsiorit. Taakku tassaapput “anorersuarmut oqquiffik sialussuarmullu oqqiffik”. (Es 32:2) Imaassinnaavoq taakkua qatanngummut arnamut ammaffigilersin­naasannut tatigilersin­naasannullu innersuuk­kaatsit. – Uss 17:17.

Imaassinnaavoq uippit pornografiimik isiginnaar­tarnermik ajornar­torsiutaata qaanger­nissaanut ikiorsinnaagit. Biibilimi allassimavoq ajornar­torsiummik imaluunniit akiukkamik qaangiiniarnermi ‘marluugaanni ataasiin­naanermit pitsaanerusoq’. (Oqal 4:9-12) Ilisimatuut paasisimavaat aappariit suleqatigiin­nermikkut uiusup  pornografiimik isiginnaar­tarneranik ajornar­torsiutini qaangersinnaagaa nuliatalu tatigeq­qilersinnaagaa.

Soorunami apeqqutaavoq aappat ilungersorluni pornografiimik isiginnaar­tarunnaarusunnersoq. Nukissaqaq­qulluni Jehovamut kimigiiserluni utoqqaanertanut ikiortis­sarsiorpa? (Kor 2. 4:7; Jaak 5:14, 15) Pornografiimik isiginnaan­ngilluin­narnissaminut imminut malittarisassiorpa? Assersuutigalugu atortoris­saarutit elektroniskiusut atornissaat killilersorpaa? Allallu ussernar­torsior­titsisinnaasut ingalas­simaniarpai? (Uss 27:12) Ilinnit ikiortik­kusuppa, unneqqarif­figerusup­paatillu? Taamaappat ikiorsin­naassagunarpat.

Qanoq taamaaliorsinnaavit? Assersuuteqariarta. Feliciap Ethan inuusut­tuaraallunili pornografiimik isiginnaar­tarnerminik pinngitsuuisin­naajunnaarsimasoq uitaaraa. Felicia oqaloqatigiuminar­tuunissani sulissutigimmagu Ethanip pornografiimik isiginnaar­nissaminut ussernar­torsiuleraangami nuliaminut saaffigin­ninnissani ajornan­nginnerutittarpaa. Ethan ima oqaluttuarpoq: “Nuliara ammasumik unneqqaril­lungalu oqaloqatigisarpara. Asannilluni ussernar­torsiulin­nginnissannut ikiortarpaanga aperisarlungalu qanoq innersunga. Aamma internetimik killilimmik atuinissannut ikiortarpaanga.” Soorunami Ethanip pornografiimut kajungernera Feliciap aliasuutigaa. Ima oqarpoq: “Ileqqupalaamut tamatumunnga qaangiiniarnerani kamannera aliasuutigin­ninneralu iluaqutaanavian­ngillat. Ajornar­torsiutai eqqartoreeraangatsigit uanga aliasuutinnik tuppallersar­tarpaanga.”

Oqaloqatigiinnerit taamaattut uiusup pornografiimik ingalas­simannin­nerminut iluaqutigiin­nassanngilai, aamma nuliata uimi tatigeq­qilernissaanut iluaqutigissavai. Uiusup ajornar­torsiutini sammisar­takkanilu aamma sumiinnini isertuut­tanngik­kunigit nuliata aamma tatiginerulissavaa.

Uiit ikiorsin­naasoraajuk? Soormi una allaaserisaq atuarlugulu eqqartorussiuk? Uivit pornografiimik isiginnaar­tarnini unitsin­niarlugu imminullu tatigin­nilerseq­qinniarlutit anguniagarissavaa. Ajornar­torsiut eqqartorusullugu oqarfigigukku kamaatigis­sanngilaa, paasinias­savaalu ajornar­torsiut ilinnut qanoq sunniuteqar­tarnersoq. Illit ileqqupalaaqarun­naarnissaanik tapersersor­tariaqarpat aamma tatigin­neqqilis­sutigisannik iliuuseqar­nissaanut periarfis­sillugu. Marluullusi paasisariaqarparsi sooq inuit pornografiimik isiginnaar­nissaminut nakkaan­nartarnersut ajornar­torsiullu qanoq qaanger­neqarsinnaasoq. d

 Ajornar­torsiut pillugu oqqatiler­nissarsi annilaan­ngatigigukku utoqqaanertaq tatigisarsi aperisin­naavarsi oqaloqatigiin­nissinni najuuttarsin­naanersoq. Eqqumaffigiuk aappavit pornografiimik pinngitsuuisin­naajunnaarsimanini qaangersimagaluarpaguluunniit tatigin­neqqilernissaq sivisusinnaasoq. Tunniutiin­naqinak. Aappariil­luarnissamut alloriar­nimininnguit maluginiartakkit. Naammagit­tarussi piffissap ingerlanerani aappariil­luaqqiler­nissarsi angusin­naavarsi. – Oqal 7:8; Kor 1. 13:4.

Nakkaqqikkunimi? Isumaqarpa iliuutsini peqqissimis­sutigin­ngikkai imaluunniit qaangiisin­naanngil­luinnartoq? Taamaat­tariaqanngilaq. Pinngitsuuisin­naajunnaarsimasup isiginnaan­ngilluin­narnissani inuunermi sinnerani akiugas­sarisimassavaa. Allaat ukiorpassuarni ingalas­simagaluarlugu nakkaqqis­sinnaavoq. Ussernartumut nakkaqqis­sanngikkuni suli imminut killilersor­tariaqarpoq, qaangersimarpasik­kaluaruniul­luunniit. (Uss 28:14; Mat 5:29; Kor 1. 10:12) ‘Eqqarsar­taatsini nutaanngorsar­tuartariaqarpaa’ ‘ajortullu uumiginissaa’ ilinniarlugu – tassa pornografii iliuutsillu minguttuun­ngortitsisartut, soorlu imminut inertittarneq. (Ef 4:23; Tuss 97:10; Rom 12:9) Taamaalior­nissaminut piumassuseqarpa? Taamaappat unitsil­luinnarsinnaavaa. e

Ajornar­torsiutinimi akiuinnarusun­ngikkuniuk? Paasinarpoq pakatsil­lutillu kamallutillu ilumoorfigineqan­ngitsutut misigiguit. Qamuuna eqqissisimaan­narumallutit isumakuluutitit tamaasa Jehovamut miloriukkit. (Pet 1. 5:7) Misissueq­qissaar­tarnikkut, qinusarnikkut eqqarsaatigin­neqqissaar­tarnikkullu Jehovamut qanittuarit. Taamaalioruit qularutigis­sanngilat Jehova aamma ilinnut qanilliumaartoq. Jehovap nuannaaq­qilernissat kissaatigigamiuk Esaja 57:15-imi allassimasutut ‘sequmisitaasuni anersaakkullu nikallorsimasuni’ ineqarpoq. Kristumiutut pissuserisassat sulissutigiuakkit. Utoqqaanertanut ikiortis­sarsiorit. Neriuutigiuarullu uiit piffissap ingerlanerani ilumoorluni allannguiumaartoq. – Rom 2:4; Pet 2. 3:9.