جوحان 8:12—59
8 12 بۇدان سوڭ يسا حالىققا تاعى بىلاي دەدى: «مەن وسى دۇنيە ٷشىن جارىقپىن+. ماعان ەرگەن ادام ەشقاشان تۇنەكتە جۇرمەيدى، قايتا، ٶمىر بەرەتىن جارىققا يە بولادى+».
13 سوندا پارىزشىلدار وعان: «سەن ٶزىڭ تۋرالى ٶزىڭ كۋالىك ەتەسىڭ، ٴبىز سەنىڭ كۋالىگىڭە سەنە المايمىز»،— دەدى.
14 يسا بىلاي جاۋاپ بەردى: «مەن ٶزىم تۋرالى كۋالىك ەتسەم دە، مەنىڭ كۋالىگىم شىنايى. سەبەبى مەن قايدان كەلگەنىمدى جانە قايدا باراتىنىمدى بىلەمىن+. ال سەندەر مەنىڭ قايدان كەلگەنىمدى دە، قايدا باراتىنىمدى دا بىلمەيسىڭدەر.
15 سەندەر سىرت كورىنىسكە قاراپ* ۇكىم ايتاسىڭدار+، ال مەن ەشكىمگە ۇكىم ايتپايمىن.
16 ال ۇكىم ايتسام، مەنىڭ ۇكىمىم شىندىققا ساي بولادى، ويتكەنى مەن جالعىز ەمەسپىن، ٶزىمدى جىبەرگەن اكەم مەنىمەن بىرگە+.
17 سونداي-اق وزدەرىڭ ۇستاناتىن مۇسا زاڭىندا «ەكى ادام كۋالىك ەتسە، ٸستىڭ شىنايى بولعانى» دەپ جازىلعان+.
18 مەن ٶزىم تۋرالى كۋالىك ەتەمىن، مەنى جىبەرگەن اكەم دە مەن تۋرالى كۋالىك ەتەدى+».
19 سوندا ولار: «اكەڭ قايدا؟»— دەپ سۇراعاندا، يسا: «سەندەر مەنى دە، اكەمدى دە بىلمەيسىڭدەر+. ەگەر مەنى بىلسەڭدەر، اكەمدى دە بىلەر ەدىڭدەر+»،— دەدى.
20 بۇل سوزدەردى ول عيباداتحاناداعى ساداقا سالاتىن ىدىستار تۇراتىن ماڭدا+ ٴتالىم بەرىپ جاتقاندا ايتتى. ٴبىراق ەشكىم ونى ۇستاپ المادى، سەبەبى ونىڭ ۋاقىتى ٵلى كەلمەگەن ەدى+.
21 ول تاعى بىلاي دەدى: «مەن كەتەمىن. سەندەر مەنى ىزدەيسىڭدەر، ٴبىراق ٴبارىبىر كۇناكار كۇيلەرىڭدە ولەسىڭدەر+. مەن باراتىن جەرگە سەندەر بارا المايسىڭدار+».
22 ياھۋديلەر بولسا: «ول ٶز-ٶزىن ولتىرمەكشى مە؟ «مەن باراتىن جەرگە بارا المايسىڭدار» دەگەنى نەسى؟»— دەستى.
23 يسا مىنانى ايتتى: «سەندەر تومەننەنسىڭدەر، ال مەن جوعارىدانمىن+. سەندەر وسى دۇنيەدەنسىڭدەر، ال مەن بۇل دۇنيەلىك ەمەسپىن.
24 سوندىقتان سەندەرگە «كۇناكار كۇيلەرىڭدە ولەسىڭدەر» دەدىم. ويتكەنى مەنىڭ سول ەكەنىمە سەنبەسەڭدەر، كۇناكار كۇيلەرىڭدە ولەسىڭدەر».
25 ولار: «سەن كىمسىڭ؟»— دەپ سۇراعاندا، يسا: «سەندەرمەن نەسىنە سويلەسىپ تۇرمىن؟
26 سەندەر تۋرالى ايتارىم دا، ايىپتاۋعا سەبەبىم دە كوپ. مەنى جىبەرگەن — حاق، ٵرى مەن سودان ەستىگەندەرىمدى وسى دۇنيەگە ايتىپ ٴجۇرمىن+»،— دەدى.
27 ولار ونىڭ ٶز اكەسى تۋرالى ايتىپ تۇرعانىن تۇسىنبەدى.
28 سوندىقتان يسا بىلاي دەدى: «ادام ۇلىن باعاناعا كوتەرىپ قويعاندارىڭدا+، سەندەر مەنىڭ سول ەكەنىمدى+ جانە ەشتەڭەنى وزدىگىمنەن ىستەمەي+، قايتا، اكەم نە ۇيرەتسە، سونى ايتاتىنىمدى بىلەسىڭدەر.
29 مەنى جىبەرگەن وزىممەن بىرگە. ول مەنى جالعىز قالدىرعان جوق، ويتكەنى مەن ارقاشان وعان ۇنايتىندى ىستەيمىن+».
30 ول وسىنى ايتىپ تۇرعاندا، وعان كوپ ادام سەندى.
31 سوندا ول وزىنە سەنگەن ياھۋديلەرگە: «ەگەر مەنىڭ ٴسوزىمدى ۇستانساڭدار، شىنىمەن مەنىڭ شاكىرتىمسىڭدەر،
32 ٵرى شىندىقتى بىلە تۇسەسىڭدەر+، ال شىندىق سەندەردى ازات ەتەدى+»،— دەدى.
33 وزگەلەرى بولسا: «ٴبىز ىبىرايىمنىڭ ۇرپاعىمىز. ەشقاشان بىرەۋدىڭ قۇلى بولعان ەمەسپىز. قالايشا بىزگە «ازات ەتىلەسىڭدەر» دەيسىڭ؟»— دەدى.
34 يسا بىلاي جاۋاپ بەردى: «سەندەرگە ناعىز شىندىقتى ايتامىن، كۇنا جاسايتىن ادام — كۇنانىڭ قۇلى+.
35 قۇل قوجايىنىنىڭ ۇيىندە ماڭگىگە قالمايدى، ال ۇلى ماڭگىگە قالادى.
36 سوندىقتان ۇل سەندەردى ازات ەتسە، شىنىمەن ازات بولاسىڭدار.
37 ىبىرايىمنىڭ ۇرپاعى ەكەندەرىڭدى بىلەمىن. ٴبىراق سەندەر مەنى ولتىرگىلەرىڭ كەلەدى، سەبەبى ٴتالىمىمدى قابىلدامايسىڭدار.
38 مەن اكەممەن بىرگە بولعاندا كورگەنىمدى ايتامىن+، ال سەندەر ٶز اكەلەرىڭنەن ەستىگەندەرىڭدى ىستەيسىڭدەر».
39 ولار: «ٴبىزدىڭ اكەمىز* — ىبىرايىم»،— دەدى. بۇعان يسا بىلاي دەدى: «ىبىرايىمنىڭ بالالارى بولساڭدار+، ىبىرايىم سياقتى ارەكەت ەتەر ەدىڭدەر.
40 ال سەندەر مەنى، وزدەرىڭە قۇدايدان ەستىگەن شىندىقتى ايتقان ادامدى+، ولتىرگىلەرىڭ كەلەدى. ىبىرايىم بۇلاي ەتپەگەن.
41 سەندەر ٶز اكەلەرىڭنىڭ ٸسىن ىستەيسىڭدەر». سوندا ولار: «ٴبىز نەكەسىز* تۋىلعان بالالار ەمەسپىز. ٴبىزدىڭ ٴبىر عانا اكەمىز بار. ول — قۇداي»،— دەدى.
42 يسا مىنانى ايتتى: «اكەلەرىڭ قۇداي بولسا، مەنى جاقسى كورەر ەدىڭدەر+. ويتكەنى قۇداي جىبەرگەندىكتەن مەن وسىندامىن. مەن ٶز بەتىمشە كەلگەن جوقپىن، مەنى جىبەرگەن — سول+.
43 ايتىپ تۇرعانىمدى نەگە تۇسىنبەيسىڭدەر؟ سەبەبى ٴسوزىمدى قابىلداعىلارىڭ كەلمەيدى.
44 سەندەردىڭ اكەلەرىڭ — ٸبىلىس، سونىڭ قالاۋلارىن ورىنداعىلارىڭ كەلەدى+. ول اۋەل باستان كىسى ٶلتىرۋشى بولعان+ جانە شىندىقتان تايىپ كەتتى، ويتكەنى وندا شىندىق جوق. وتىرىك ايتقاندا، ونى ٶز بولمىسىنا ساي ايتادى، سەبەبى ول — وتىرىكشى ٵرى وتىرىكتىڭ اكەسى+.
45 ال مەن شىندىقتى ايتاتىندىقتان ماعان سەنبەيسىڭدەر.
46 قايسىسىڭ مەنى كۇنا جاسادى دەپ اشكەرەلەي الاسىڭ؟ ال شىندىقتى ايتسام، وندا نەگە سەنبەيسىڭدەر؟
47 كىم قۇدايدان بولسا، سول ونىڭ سوزدەرىن تىڭدايدى+. سەندەر قۇدايدان ەمەسسىڭدەر، سوندىقتان دا مەنى تىڭدامايسىڭدار+».
48 الگى ياھۋديلەر وعان: «ساعان «ساماريالىقسىڭ+، بويىڭدا جىن بار+» دەپ دۇرىس ايتتىق ەمەس پە؟»— دەدى.
49 يسا: «بويىمدا جىن جوق! مەن اكەمدى قۇرمەتتەيمىن، ال سەندەر مەنى قورلايسىڭدار.
50 مەن وزىمە داڭق ىزدەمەيمىن+، مۇنى ىستەيتىن دە، تورەلىك ەتەتىن دە اكەم.
51 سەندەرگە ناعىز شىندىقتى ايتامىن، مەنىڭ ٴسوزىمدى ۇستاناتىن ادام ەشقاشان ٶلىمدى كورمەيدى+»،— دەدى.
52 ولار بىلاي دەدى: «بويىڭدا جىن بار ەكەنىنە كوزىمىز جەتتى. ىبىرايىم دا، پايعامبارلار دا ولگەن، ال سەن «مەنىڭ ٴسوزىمدى ۇستانعان ادام ەشقاشان ولمەيدى» دەيسىڭ.
53 الدە قايتىس بولعان بابامىز ىبىرايىمنان دا ۇلىسىڭ با؟ پايعامبارلار دا قايتىس بولعان. ٶزىڭدى كىممىن دەپ تۇرسىڭ؟»
54 يسا: «مەن ٶزىمدى داڭقتاسام، داڭقىم تۇككە دە تۇرمايدى. مەنى داڭقتايتىن — اكەم+. سەندەر ونى قۇدايىمىز دەيسىڭدەر.
55 ٴبىراق ونى بىلمەيسىڭدەر+، ال مەن بىلەمىن+. ەگەر ونى بىلمەيمىن دەسەم، سەندەر سياقتى وتىرىكشى بولار ەدىم. الايدا مەن ونى بىلەمىن، ٵرى ونىڭ ٴسوزىن ۇستانامىن.
56 بابالارىڭ ىبىرايىم مەنىڭ كۇنىمدى كورەمىن دەپ، قاتتى قۋاندى. ول ونى كورىپ، قۋاندى دا+»،— دەپ جاۋاپ بەردى.
57 ال ولار: «سەن ٵلى 50 گە دە كەلگەن جوقسىڭ، سوندا دا ىبىرايىمدى كوردىڭ بە؟»— دەگەندە،
58 يسا: «سەندەرگە ناعىز شىندىقتى ايتامىن، ىبىرايىم تۋىلماي تۇرىپ، مەن بار بولعانمىن»+،— دەدى.
59 سوندا ولار يساعا لاقتىرماق بولىپ جەردەن تاس الدى، ٴبىراق ول جاسىرىنىپ، عيباداتحانادان شىعىپ كەتتى.
سىلتەمەلەر
^ نەمەسە «ادامدار قوياتىن تالاپتارعا ساي».
^ نەمەسە «بابامىز».
^ نەمەسە «ازعىندىقتان». گرەكشە «پورنيا». تۇسىندىرمەنى قاراڭىز.
