12-ساباق
پاتشالىق تۋرالى حاباردى ۋاعىزداۋ ٸسىمىز قالاي ۇيىمداسقان؟
يسا ولەرىنەن از ۋاقىت بۇرىن بىلاي دەگەن: «پاتشالىق جايلى وسى ىزگى حابار بارلىق حالىقتار ەستۋ ٷشىن بۇكىل جەر بەتىندە ۋاعىزدالادى. سودان كەيىن وسى زاماننىڭ سوڭى كەلەدى» (ماتاي 24:14). ٴبىراق بۇل ىزگى حابار بۇكىل دۇنيەجۇزىنە قالاي ۋاعىزدالماق ەدى؟ يسا جەردە ٶمىر سۇرگەن كەزىندە مۇنى قالاي ىستەۋ كەرەكتىگىن كورسەتىپ، ۇلگى قالدىرعان (لۇقا 8:1).
ٴبىز ادامدارعا ۇيلەرىنە بارىپ ۋاعىزدايمىز. يسا ٶزىنىڭ شاكىرتتەرىنە ىزگى حاباردى ۇيمە-ٷي ٴجۇرىپ ۋاعىزداۋدى ۇيرەتكەن (ماتاي 10:11—13؛ ەلشىلەردىڭ ىستەرى 5:42؛ 20:20). ٴبىرىنشى عاسىردا ٶمىر سۇرگەن وسى ۋاعىزداۋشىلار ىزگى حاباردى قاي جەردە جاريالاۋ كەرەكتىگىنە قاتىستى ناقتى نۇسقاۋلار العان بولاتىن (ماتاي 10:5، 6؛ قورىنتتىقتارعا 2-حات 10:13). ٴبىزدىڭ كۇنىمىزدە دە ۋاعىز ٸسى ۇيىمداسقان تۇردە اتقارىلادى جانە ٵر قاۋىم وزىنە تاعايىندالعان اۋماقتا ۋاعىزدايدى. وسىنىڭ ارقاسىندا ٴبىز يسانىڭ بارشا جۇرتقا «تۇبەگەيلى كۋالىك بەرۋ» جايلى نۇسقاۋىن ورىنداي الامىز (ەلشىلەردىڭ ىستەرى 10:42).
ٴبىز ادام بار جەردىڭ بارىندە ۋاعىز ايتۋعا تىرىسامىز. يسا ادام كوپ جينالاتىن جەرلەردە، مىسالى تەڭىز جاعاسىندا نە قۇدىق باسىندا، ۋاعىز ايتۋ ارقىلى دا بىزگە جاقسى ۇلگى قالدىردى (مارقا 4:1؛ جوحان 4:5—15). ٴبىز دە ادامدار بار جەردىڭ بارىندە — كوشەدە، ىسكەرلەر اۋماعىندا، ساياباقتا نە تەلەفون ارقىلى — كيەلى كىتاپ جايلى اڭگىمە باستاۋعا تىرىسامىز. سونداي-اق ٴبىز مۇمكىندىك بولعان كەزدەرى كورشىلەرىمىزگە، ارىپتەستەرىمىزگە، سىنىپتاستارىمىزعا جانە تۋىستارىمىزعا ۋاعىزدايمىز. ٴبىزدىڭ وسىلاي كۇش سالعانىمىزدىڭ ارقاسىندا دۇنيەنىڭ ٴتورت بۇرىشىنداعى ميلليونداعان ادام قۇتقارىلۋ جايلى ىزگى حاباردى ەستي الدى (ٴزابۇر 96:2).
قۇداي پاتشالىعى تۋرالى ىزگى حاباردى جانە بۇل حاباردىڭ بولاشاعىمىزعا قالاي اسەر ەتەتىنى جايلى كىمگە ايتقىڭىز كەلەر ەدى؟ ٷمىت سيلايتىن وسى حاباردى باسقالارعا ايتۋدان تارتىنباڭىز. ونىمەن ٴبولىسۋدىڭ مۇمكىندىكتەرىن جىبەرمەۋگە تىرىسىڭىز!
-
قانداي «ىزگى حابار» جاريالانۋى كەرەك؟
-
ەحوبا كۋاگەرلەرى ۋاعىز ٸسىن اتقارۋدا يسانى قالاي ۇلگى تۇتادى؟