OVANYASHA TAVA PULA
Omolwashike alushe handi popi oinima ya puka?
James okwa ti: “Omafimbo amwe ohandi dulu okupangela elaka lange, ashike peemhito dimwe ohandi popi oinima inai diladilwa nawa.”
Marie okwa ti: “Ngeenge nda tila ohandi popi inandi diladila nawa, nongeenge nda hafa ohandi popi oinima ihapu. Efimbo keshe ohandi popi ashike oinima ihe na omutwe nandunge.”
Ombiibeli oya ti: ‘Elaka olo omundilo, nohandje hai xwike ofuka inene!’ (Jakob 3:5, 6) Mbela osho ho popi luhapu ohashi ku etele oupyakadi? Ngeenge osho, oshitukulwa eshi otashi dulu oku ku kwafela.
Omolwashike handi popi oinima ya puka?
Okuhawanenena. Ombiibeli oya ti: “Fye atushe ohatu puka luhapu. Ngeenge ope na ou iha puka meendjovo, oye omulumenhu a wanenena.” (Jakob 3:2) Molwaashi otu li ovalunde, ihatu nyono ashike moilonga, ndele ohatu nyono yo ngeenge hatu popi oinima ya puka.
Anna okwa ti: “Molwaashi inandi wanenena, otashi ka kala sha nyika oulai kwaame okutya ohandi dulu okulipangela filufilu.”
Okupopya unene. Ombiibeli oya ti: “Apa pe neendjovo dihapu, etauluko itali pumbulukwa po.” (Omayeletumbulo 10:19) Ovanhu ovo hava popi unene noihava pwilikine nawa otashi dulika va popye oinima ya puka oyo tai udifa vamwe nai.
Julia okwa ti: “Ovanaendunge haalushe hava popyaana. Jesus oye omunaendunge a shiya ko, ashike omafimbo amwe okwa li ha kala a mwena.”
Okusheka. Ombiibeli oya ti: “Omunhu ta tu neendjovo ngaashi eongamukonda.” (Omayeletumbulo 12:18) Okusheka vamwe oku li oshinima osho hashi yahameke. Ovanhu ovo hava shekwa otashi dulika va tye, “Onda li ashike handi ningi omashendjo.” Okuudifa vamwe nai kashi fi oshinima shi yolifa. Ombiibeli oye tu lombwela tu kale ‘kokule nowii keshe.’ — Ovaefeso 4:31.
Oksana okwa ti: “Ondi li shii oukavandje, nondi hole okuninga oiyolifa, omaukwatya oo haa ningifa nge ndi kale handi sheke, naluhapu ohashi tulifa nge moupyakadi.”
Ngaashi ashike ito dulu okushunifa omuti wokomayoo mokaima omo wa dja, naave ngeenge owa popi oshinima shonhumba ito dulu oku shi kelela
Pangela elaka loye
Otashi dulika shi kale shidjuu okupangela elaka loye, ashike omafinamhango Ombiibeli otaa dulu oku ku kwafela. Tala koihopaenenwa tai shikula.
“Popyeni momitima deni momitala deni nokulimwenenena.” — Epsalme 4:4.
Omafimbo amwe oshiwa okukala wa mwena. Laura okwa ti: “Onghedi oyo handi kala ndi udite ngeenge nda handuka, hasho handi kala ngeenge nda handukuluka. Shimha nda handukuluka ohandi kala nda hafa ngeenge inandi popya osho nda li nda hala okutya.” Nokuli nokumwena ashike okafimbo kanini otaku dulu oku ku kwafela uha popye oinima ya puka.
“Hakutwi ngeno haku dimbulukwa eendjovo nondakona hai udu eendja?” — Job 12:11.
Oto ke likaleka kokule nowii ngeenge owa kendabala okulipula omapulo aa eshi wa handuka:
Mbela oshoshili? Mbela oshi li ngoo pahole? Mbela osha pumbiwa ngoo? — Ovaroma 14:19.
Ohandi ka kala ndi udite ngahelipi ngeenge umwe okwa ula nge ngaho? — Mateus 7:12.
Mbela ohandi ka ulika ngoo kutya onda fimaneka etaleko laumwe? — Ovaroma 12:10.
Mbela oshi li ngoo mondjila okupopya ngaho? — Omuudifi 3:7.
“Omelininipiko keshe umwe na tale omukwao e li komesho yaye mwene.” — Ovafilippi 2:3.
Omayele oo otae ke ku kwafela u kale ho diladilile vamwe mouwa, naasho otashi ke ku kwafela u kale ho pangele elaka loye ofimbo ino popya. Nokuli nonande owa hangwa wa popya nale oshinima sha puka, elininipiko otali ke ku kwafela u yandje ombili diva ngaashi tashi dulika. (Mateus 5:23, 24) Onghee hano, kendabala okukala ho pangele elaka loye.
Otashi dulika yo u hafele oikundafanwa ei
OUVIDIO VOKOUPELENDE
Kaume kashili olyelye?
Ookaume ovanaihelele ova pu okumonika, ndele ongahelipi to dulu okumona kaume kashili?
OVANYASHA TAVA PULA
Omolwashike ndi na okuyandja ombili?
Tala omatomheno atatu mawa e na sha nokuyandja ‘ombili’ nonande haave auke u na ondjo.
