Omayeletumbulo 10:1-32
10 Omayeletumbulo aSalomo.
Omonamati omunaendunge ota hafifa xe,Ashike omonamati elai ota nyikifa ina oluhodi.
2 Omamona a likolwa moukolokoshi itaa eta ouwa washa,Ashike ouyuki oo tau xupifa mefyo.
3 Jehova ita efa omuyuki* a fye ondjala,Ndele ita ka pa omukolokoshi osho a hala.
4 Omake omukwandede otaa eta oluhepo,Ndele omake aao ha longo noudiinini otaa eta oupuna.
5 Omonamati, oo ha katuka pandunge, oha ongele oikunomwa pefimbo leteyo,Ashike omonamati, oo ehe na eendunge, oha kala a kofa pefimbo leteyo.
6 Omuyuki ota ka nangekwa noupuna,Ndele okanya komukolokoshi otaka holeke owii.
7 Omuyuki ota ka dimbulukiwa nokunangekwa noupuna,Ndele edina lomukolokoshi otali ka dimbiwa.
8 Omunaendunge oha tambula ko omayele,*Ndele oo ha popi oulai ota ka mona oixuna.
9 Oo ta kanyatele oudiinini ota ka kala meameno,Ashike oo ta kanifa oikoti meendjila daye ota ka hololwa.
10 Oo ha fiikile vamwe omesho ota etifa oluhodi,Naao ha popi oulai ota ka mona oixuna.
11 Okanya komuyuki oko odjo yomwenyo,Ndele okanya komukolokoshi otaka holeke owii.
12 Outondwe oo hau eta eemhata,Ndele ohole ohai tuvikile omatauluko aeshe.
13 Ounongo ou li komilungu daao e na eendunge dokuyoolola,Ndele oshimwati oshi li kombuda yaao ehe na eendunge.
14 Ovanaendunge otave lituvikilile eshiivo,Ndele okanya kelai otaka eta ehanauno.
15 Emona* loshipuna olo oshilando shaye sha dingililwa komakuma a pama.
Ehanauno lomufyoona olo oluhepo lavo.
16 Oilonga yomuyuki otai twala komwenyo,Ndele oilonga yomukolokoshi otai twala moulunde.
17 Ou ta tambula ko outekuduliko oku li elila lomwenyo,*Ndele ou ita tambula ko epukululo ota pundukifa vakwao.
18 Ou ta holeke outondwe waye ota popi oipupulu,Naau ta tandavelifa omahokololo oipupulu* elai.
19 Ngeenge eendjovo odihapu, omatauluko nao otaa kala mahapu,Ndele ou ta pangele omilungu daye ota katuka pandunge.
20 Elaka lomunaendunge oli li ngaashi oshisilveri shiwa elela,Ndele omutima womukolokoshi kau na eshi tau eta po.
21 Omilungu domuyuki otadi etele ouwa* vahapu,Ndele elai otali fi omolwokuhe na eendunge.
22 Enangeko noupuna laJehova olo tali punapalifa omunhu,Noiha weda ko ouyahame* kulo.
23 Okukufa ombinga melihumbato lififa ohoni oku li ngaashi oudano kelai,Ndele oo e na eendunge dokuyoolola oku na ounongo.
24 Omukolokoshi ota ka hangwa kwaasho a tila,Ndele omuyuki ota ka pewa osho a hala.
25 Ngeenge oshikungulu sha piti po, omukolokoshi ita ka kala po vali,Ndele ovayuki ove li ngaashi ekanghameno, olo tali kala po fiyo alushe.
26 Ngaashi o-vinegar* komayoo nosho yo omwifi momesho,Omukwandede osho ta kala kwaao e mu tuma.*
27 Okutila Jehova otaku lelepeke onghalamwenyo,Ndele omido domukolokoshi otadi ka ninipikwa.
28 Eteelelo lomuyuki otali eta ehafo,Ndele eteelelo lomukolokoshi otali ka kana po.
29 Ondjila yaJehova oi li eameno kwaavo vehe na ondjo,Ndele oi li ehanauno kwaavo hava longo owii.
30 Ovayuki itava ka pundukifwa nandenande,Ndele ovakolokoshi itava ka kala ko vali kombada yedu.
31 Okanya komuyuki otaka popi eendjovo* dounongo,Ndele elaka tali pukifa otali ka hanaunwa po.
32 Omilungu domuyuki odi shii osho tashi hafifa,Ndele okanya komukolokoshi otaka pukifa.
Eshangelo lopedu
^ Ile “omwenyo womuyuki.”
^ Eln., “oipango.”
^ Ile “Oshinima shi na ongushu.”
^ Ile tashi dulika, “e li melila lomwenyo.”
^ Ile “omitotolombo.”
^ Ile “wilike.”
^ Ile “oluhodi; oudjuu.”
^ Ile “oasaina.”
^ Ile “komuyandji waye woilonga.”
^ Ile “imike oiimati.”
