ANDŨ ETHĨ MORAGIA
Hihi Ngomanio cia Arũme kwa Arũme na Atumia gwa Atumia nĩ Njũru?
“Thĩna ũmwe mũnene ndarĩ naguo ngĩkũra nĩ atĩ ndaiguaga ngĩgucĩrĩrio nĩ anake arĩa angĩ. Ndeciragia atĩ merirĩria macio nĩ mangĩathirire o ũrĩa ndaakũraga, ĩndĩ no ngoragwo namo.”—David, 23.
David nĩ Mũkristiano wendaga gũkenia Ngai. Hihi no ahote gũkenia Ngai o akĩgucagĩrĩrio nĩ anake arĩa angĩ? Ngai aiguaga atĩa igũrũ rĩgiĩ ngomanio cia arũme kwa arũme na atumia gwa atumia?
Bibilia yugaga atĩa?
Andũ a kũndũ gũtiganĩte kana arĩa maatũũraga mahinda matiganĩte no makorũo na mawoni ngũrani megiĩ ngomanio cia arũme kwa arũme na atumia gwa atumia. No Akristiano matihocetie mawoni mao harĩ ũrĩa andũ aingĩ meciragia kana magatwarũo “mwena na mwena nĩ rũhuho o ruothe rwa morutani.” (Aefeso 4:14) Handũ ha ũguo, mawoni mao megiĩ ngomanio cia arũme kwa arũme na atumia gwa atumia na mĩtugo ĩngĩ ta ĩyo, mehocetie harĩ ithimi iria ciigĩtwo nĩ Bibilia.
Bibilia nĩ yarĩtie ũhoro ũcio ĩmwe kwa ĩmwe . Yugĩte ũũ:
“Ndũkanakome na mũndũrũme o ta ũrĩa ũkomaga na mũtumia.”—Maũndũ ma Alawii 18:22.
“Nĩ ũndũ wao kwenda kũrũmĩrĩra merirĩria ma ngoro ciao, . . . Ngai aamarekereirie marũmagĩrĩre merirĩria ma maũndũ ma thoni ma ngomanio, nĩ gũkorũo atumia arĩa maarĩ gatagatĩ-inĩ kao nĩ maagarũrire mũtugo wao wa ndũire makĩambĩrĩria gwĩka maũndũ matarĩ ma ndũire.”—Aroma 1:24, 26.
“Mũtikahĩtithio. Andũ arĩa meingĩragia thĩinĩ wa ngomanio itagĩrĩire, ahoi mĩhianano, arĩa matharagia, arũme arĩa metuaga ta atumia, arũme arĩa makomaga na arũme, aici, andũ akoroku, arĩĩu, arumani, na atunyani matikaagaya Ũthamaki wa Ngai.”—1 Akorintho 6:9, 10.
Ũũma nĩ atĩ, ithimi cia Ngai ciagĩrĩire kũrũmĩrĩrũo nĩ andũ othe, akorũo nĩ arũme arĩa makomanagia na arũme, atumia arĩa makomanagia na atumia, arũme arĩa makomanagia na atumia, kana atumia arĩa makomanagia na arũme. No mũhaka o mũndũ egirĩrĩrie merirĩria matarĩ mega nĩguo akenie Ngai.—Akolosai 3:5.
Hihi ũguo nĩ kuuga atĩ . . . ?
Hihi ũguo nĩ kuuga atĩ Bibilia nĩ ĩnyitaga mbaru rũmena kwerekera arũme arĩa makomanagia na arũme kana atumia arĩa makomanagia na atumia?
Aca. Ma nĩ atĩ, Bibilia ndĩnyitaga mbaru rũmena kwerekera mũndũ o wothe, nginya arũme arĩa makomanagia na arũme kana atumia arĩa makomanagia na atumia. No ĩtwĩraga “[tũthingatage] thayũ na andũ othe,” gũtekũmakania ũrĩa mũtũũrĩre wao ũhaana. (Ahibirania 12:14) Kwoguo nĩ ũũru kũũgita kana gũtharĩkĩra andũ na njĩra o yothe tondũ atĩ nĩ arũme arĩa makomanagia na arũme kana atumia arĩa makomanagia na atumia.
Hihi ũguo nĩ kuuga atĩ Akristiano nĩ magĩrĩirũo gũkararia mawatho marĩa metĩkĩrĩtie ihiko cia arũme kwa arũme kana atumia gwa atumia?
Bibilia yonanagia atĩ Ngai aathondekire kĩhiko gĩkorũo kĩrĩ gatagatĩ ka mũndũrũme na mũtumia. (Mathayo 19:4-6) O na kũrĩ ũguo, ndeereti cia mawatho megiĩ ihiko cia arũme kwa arũme na atumia gwa atumia ihutanĩtie na maũndũ megiĩ ũteti no ti mĩtugo. Bibilia ĩraga Akristiano matikeingĩrie maũndũ-inĩ ma ũteti. (Johana 18:36) Kwoguo matinyitaga mbaru kana makaregana na mawatho ma thirikari megiĩ ihiko cia arũme kwa arũme na atumia gwa atumia kana mĩtugo ĩyo.
Ĩ angĩkorũo . . . ?
Ĩ angĩkorũo mũndũ nĩ eingĩranagia na ngomanio cia arũme kwa arũme kana atumia gwa atumia? Hihi no acenjie?
Ĩĩ. Ma nĩ atĩ, andũ amwe a karine ya mbere nĩ maahotire gũcenjia! Thutha wa Bibilia kuuga atĩ arĩa meingĩranagia na ngomanio cia arũme kwa arũme kana atumia gwa atumia matikaagaya Ũthamaki wa Ngai, ĩcokaga ĩkoiga: “Ũguo nĩguo amwe anyu mwatariĩ.”—1 Akorintho 6:11.
Hihi ũguo nĩ kuuga atĩ arĩa maatigire ngomanio cia arũme kwa arũme kana atumia gwa atumia maticokaga kũgĩa na merirĩria macio rĩngĩ? Aca. Bibilia yugaga ũũ: “Mwĩhumbe ũmũndũ mwerũ, ũrĩa ũratuwo mwerũ kũgerera ũmenyo wa ma.” (Akolosai 3:10) No mũhaka tũthiĩ na mbere kwagagĩria ũmũndũ witũ.
Ĩ angĩkorũo mũndũ nĩ arenda kũrũmĩrĩra ithimi cia Ngai no arĩ o na merirĩria ma ngomanio cia arũme kwa arũme kana atumia gwa atumia?
O ta merirĩria marĩa mangĩ moru, mũndũ no athuure kũmahingia kana kũmeheria meciria-inĩ make. Nĩ kĩĩ kĩngĩmũteithia kwaga kũmahingia? Bibilia yugaga: “Tũũrai mũthiaga na roho na mũtirĩhingagia merirĩria ma mwĩrĩ o na hanini.”—Agalatia 5:16.
Rora wone atĩ mũhari ũcio ndũroiga atĩ mũndũ ndarĩkoragwo na merirĩria o mothe ma mwĩrĩ. No mũndũ angĩkoragwo na mũtaratara mwega wa kwĩruta Bibilia na kũhoya, nĩ arĩkoragwo na hinya wa kũregana na merirĩria macio.
David, ũrĩa ũkũgwetetwo kĩambĩrĩria-inĩ, nĩ oonire ũndũ ũcio ũrĩ wa ma makĩria rĩrĩa aarĩrĩirie na aciari ake Akristiano ũndũ ũrĩa aahiũranagia naguo. Ooigire ũũ: “Ndaiguire ndehererio mũrigo mũritũ na no gũkorũo nĩ ingĩakeneire mĩaka yakwa ya ũtinĩnja makĩria korũo nĩ ndarĩtie nao gatene.”
Hingo ciothe nĩ tũrĩkoragwo na gĩkeno makĩria rĩrĩa twarũmĩrĩra ithimi cia Ngai. Twĩ na ma atĩ mawatho macio “ma ũthingu, matũmaga ngoro ĩkene” na atĩ “kũmarũmĩrĩra nĩ kũrĩ kĩrathimo kĩnene.”—Thaburi 19:8, 11.
