“NGAI nĩ roho,” kwoguo tũtingĩhota kũmuona na maitho. (Johana 4:24) O na kũrĩ ũguo, Bibilia nĩ yugĩte atĩ andũ amwe nĩ ta moonire Ngai. (Ahibirania 11:27) Ũndũ ũcio ũngĩhoteka atĩa? Hihi no tũhote kuona Ngai “o we ũtonekaga”?—Akolosai 1:15.

Ta reke twĩringithanie na mũndũ waciarirũo atarĩ na ũhoti wa kuona. Hihi no tuuge atĩ tondũ ndarona ndangĩhota kũmenya kĩrĩa kĩ hakuhĩ nake, kana maũndũ marĩa marekĩka? Tũtingĩtua ũguo. Mũndũ ũtarona ahũthagĩra njĩra itiganĩte kũmenya andũ, indo, kana maũndũ marĩa mamũthiũrũrũkĩirie. Mũndũ ũmwe ũtonaga oigire ũũ: “Ũhoti wa kuona ndũkoragwo maitho-inĩ, ũkoragwo meciria-inĩ.”

No taguo na ithuĩ, o na gũtuĩka tũtingĩhota kuona Ngai na maitho, no tũmuone na ‘maitho maitũ ma ngoro.’ (Aefeso 1:18) Ta wĩcirie ũhoro wa njĩra ici ithatũ iria ingĩtũteithia kũmenya maũndũ megiĩ Ngai.

Mũndũ ũtonaga nĩ arĩ ũhoti mũnene wa kũigua na wa kũhutia, ũrĩa ahũthagĩra gũkũũrana maũndũ marĩa atangĩhota kuona. O na ithuĩ, tũngĩhũthĩra ũhoti ũrĩa tũrĩ naguo gwĩciria ũhoro wa indo iria ciũmbĩtwo, no tũhote kũmenya wega Ngai ũrĩa waciũmbire. “Gwata hĩndĩ ĩrĩa thĩ yombirũo, maũndũ make marĩa matonekaga . . . nĩmonagwo wega tondũ wa ũrĩa makũũranĩkaga nĩ ũndũ wa indo iria ciombirũo.”—Aroma 1:20.

Kwa mũhiano ta wĩcirie ũhoro wa thĩ. Yũmbĩtwo na njĩra ya mwanya mũno nĩ getha andũ makenagĩre ũtũũro, no to maikarage kuo tu. Nĩ tũkenaga mũno rĩrĩa twoima nja twahũrũo nĩ karũhuho, tuota riũa, twakenera cama wa itunda, kana twaigua nyoni ikĩgamba wega. Githĩ maũndũ macio matitũguũragĩria ũtana, na wega wa Mũũmbi witũ, na magatuonia atĩ nĩ atwĩciragia?

Hihi nĩ maũndũ marĩkũ tũngĩĩruta megiĩ Ngai tweciria ũrĩa igũrũ rĩũmbĩtwo? Ũndũ ũmwe nĩ atĩ, igũrũ rĩguũragia hinya wa Ngai. Ũthuthuria wa ica ikuhĩ wa gĩsayansi ũronania atĩ, igũrũ rĩrathiĩ rĩaramĩte, na rĩreka ũguo na gĩkĩro kĩnene mũno! Rĩrĩa werorera igũrũ, ta wĩyũrie ũũ: Hinya ũcio ũratũma igũrũ rĩthiĩ rĩaramĩte-rĩ, uumaga kũ? Bibilia ĩtwĩraga ũũ igũrũ rĩgiĩ Mũũmbi witũ: “Hinya wake ũnenehete mũno.” (Isaia 40:26) Ũũmbi ũguũragia atĩ, Ngai nĩ “Mwene-Hinya,” na atĩ “ũhoti wake nĩ mũnene mũno mũno.”—Ayubu 37:23.

Mũtumia ũmwe ũrĩ ciana igĩrĩ itarĩ ũhoti wa kuona, oigire ũũ: “Njĩra ĩrĩa njega mũno ya kũmaruta, nĩ kwaranĩria nao. Ũngĩmeera maũndũ marĩa ũrona na ũkaigua, [nawe] wĩhaarĩrie gũthiĩ na mbere kũmataarĩria kĩrĩa ũrona. Wee nĩwe maitho mao.” Ũndũ ũmwe na ũcio, o na gũtuĩka “gũtirĩ mũndũ ũrĩ ona Ngai,” Mũrũ wa Ngai, Jesu, “ũrĩa wĩ gĩthũri-inĩ gĩa Ithe, nĩwe uumbũrĩte ũhoro wake.” (Johana 1:18) Jesu nĩwe Mũrũ wa mũmwe wa Ngai, na ũrĩa wa mbere kũũmbwo, kwoguo nĩwe “maitho” maitũ ma gũtũteithia kuona kũrĩa igũrũ. No we ũngĩtwĩra wega ũhoro wĩgiĩ Ngai o ũcio ũtonekaga.

Ta wĩcirie ũhoro wa maũndũ mamwe marĩa Jesu, ũrĩa waikaranĩtie na Ithe mĩaka mĩingĩ mũno, oimbũrĩte megiĩ Ngai:

• Ngai atũire arutaga wĩra. “Awa nginya rĩu atũire o arutaga wĩra.”—Johana 5:17.

• Ngai nĩ oĩ mabataro maitũ. “Ithe wanyu nĩoĩ maũndũ marĩa mamũbatairie mũtanamũhoya.”—Mathayo 6:8.

•  Nĩ ũndũ wa wega wake, Ngai nĩ atũhingagĩria mabataro maitũ. “Ithe wanyu ũrĩa wĩ igũrũ . . . nĩatũmaga riũa rĩake rĩrathĩre andũ arĩa oru, o na arĩa ega; ningĩ nĩoiragĩria mbura arĩa athingu, o na arĩa aaganu.”—Mathayo 5:45.

• Ngai nĩ atwĩciragia tũrĩ mũndũ ũmwe ũmwe. “Githĩ tũnyoni twĩrĩ tũtiendagio thendi ĩmwe? Natuo gũtirĩ o na kamwe kangĩgũa thĩ Ithe wanyu atoĩ. Na rĩrĩ, o na njuĩrĩ cianyu cia mũtwe nĩ ndare ciothe. Hakĩrĩ ũguo-rĩ, mũtikanetigĩre; inyuĩ mũrĩ bata gũkĩra tũnyoni tũingĩ.”—Mathayo 10:29-31.

Kaingĩ andũ arĩa matonaga, mataũkagĩrũo nĩ maũndũ na njĩra ngũrani mũno na arĩa makoragwo na ũhoti wa kuona. Mũndũ ũtarĩ ũhoti wa kuona ndataũkagĩrũo nĩ kĩĩruru ta arĩ handũ he na nduma hatarĩ na ũtheri wa riũa, no ahota kuona ta arĩ handũ hega hagitĩre kuumana na ũrugarĩ wa riũa. O ta ũrĩa mũndũ ũtonaga atangĩhota kuona kĩĩruru kana ũtheri wa riũa, tũtingĩhota gũtaũkĩrũo nĩ Jehova tũtateithĩrĩirio. Nĩ ũndũ ũcio, Jehova nĩ aatũheire mũndũ wahotire kuonania wega ngumo ta ciake.

Mũndũ ũcio nĩ Jesu. (Afilipi 2:7) Makĩrĩa ma Jesu kwaragia ũhoro wĩgiĩ Ithe, nĩ aatuonirie ũrĩa Ngai atariĩ. Filipu, eerire Jesu ũũ: “Tuonie Ithe witũ.” Jesu akĩmũcokeria: “Mũndũ ũnyonete niĩ nĩonete Ithe witũ.” (Johana 14:8, 9) Nĩ maũndũ marĩkũ “tũngĩona” megiĩ Ithe kũgerera maũndũ marĩa Jesu eekire?

Jesu aarĩ mũndũ mwega, mwĩnyihia, na nĩ aakinyĩrĩkaga. (Mathayo 11:28-30) Ngumo iria aarĩ nacio cia gũcanjamũra nĩ ciagucagĩrĩria andũ. Jesu nĩ aaiguagĩra tha arĩa manyamarĩkaga, na agakena na arĩa makenaga. (Luka 10:17, 21; Johana 11:32-35) Ũgĩthikĩrĩria kana ũgĩthoma Bibilia ũhoro wĩgiĩ maũndũ marĩa Jesu eekaga, ta geria kũhũũra mbica na wĩyone ũrĩ hau maũndũ macio magĩkĩka. Ũngĩĩcũũrania ũhoro wa ũrĩa Jesu arũmbũyagia andũ, no ũhote kuona ngumo cia magegania cia Ngai na njĩra njega makĩria na ũhote kũmũkuhĩrĩria.

Mwandĩki ũmwe aandĩkire ũũ ũhoro wĩgiĩ ũrĩa mũndũ ũtonaga amenyaga maũndũ: “Aamũkagĩra ũhoro tũcunjĩ tũcunjĩ kuuma ihumo itiganĩte (na njĩra ta ya kũhutia, kũnungĩra kana kũigua), na agacokanĩrĩria ũhoro ũcio ũrĩ wothe.” Na njĩra o ta ĩyo, ũngĩrora indo iria Ngai ombĩte, ũthome maũndũ marĩa Jesu aarutanire megiĩ Ithe, na wĩcũũranie ũrĩa Jesu onanirie ngumo ta cia Ngai, nĩ ũkũgĩa na mbica njega ya Ngai. Nĩ ũkũmũmenya wega makĩria.

Ayubu, ũrĩa watũũraga tene nĩguo eekire. Mbere-inĩ, aaragia maũndũ ‘atekũmamenya.’ (Ayubu 42:3) No thutha wa gwĩcũũrania ũhoro wa indo cia magegania iria Ngai ombire, Ayubu oigire ũũ: “Ũhoro waku kũigua ndĩraũiguĩte kũigua kũrĩa gwa gũtũ; ĩndĩ rĩu riitho rĩakwa nĩ gũkuona rĩkuonete.”—Ayubu 42:5.

O na we no uuge ciugo ta icio. ‘Ũngĩkorũo nĩ ũrĩrongoragia Jehova, nĩ arĩkwĩonithagia.’ (1 Maũndũ ma Matukũ ma Tene 28:9) Aira a Jehova no magũteithĩrĩrie gũcaria Ngai ũcio ũtonekaga na ũmuone.