Marũa Kũrĩ Akolosai 1:1-29
1 Nĩ niĩ Paulo, mũtũmwo wa Kristo Jesu kũgerera wendi wa Ngai, hamwe na Timotheo+ mũrũ wa Ithe witũ,
2 kũrĩ arĩa aamũre, ariũ a Ithe witũ ehokeku marĩ na ũiguano na Kristo kũu Kolosai:
Mũrogĩa na ũtugi mũnene na thayũ kuuma kũrĩ Ngai Ithe witũ.
3 Hingo ciothe nĩ tũcokagĩria Ngai ngatho, o we Ithe wa Mwathani witũ Jesu Kristo, rĩrĩa tũkũhoya nĩ ũndũ wanyu,
4 nĩ gũkorũo nĩ twaiguire ũhoro wa wĩtĩkio wanyu harĩ Kristo Jesu na wendo ũrĩa mũkoragwo naguo harĩ arĩa othe aamũre
5 nĩ ũndũ wa kĩĩrĩgĩrĩro kĩrĩa mũigĩirũo igũrũ.+ Nĩ mwaiguĩte o mbere ũhoro wa kĩĩrĩgĩrĩro kĩu kũgerera ndũmĩrĩri ya ũhoro wa ma ya ũhoro ũrĩa mwega
6 ũrĩa ũmũkinyĩire. O ta ũrĩa ũhoro ũrĩa mwega ũragĩa na maciaro na ũkongerereka thĩinĩ wa thĩ yothe-rĩ,+ noguo ũhoro ũcio mwega ũreka thĩinĩ wanyu kuuma o mũthenya ũrĩa mwaiguire na mũkĩmenya wega ma ĩgiĩ ũtugi mũnene wa Ngai.
7 Ũndũ ũcio nĩguo mwĩrutĩte kuuma kũrĩ Epafara,+ ũrĩa twendete na tũtungataga nake, ndungata njĩhokeku ya Kristo handũ-inĩ haitũ.
8 Ningĩ nĩ aatũmenyithirie wendo wanyu ũrĩa uumanĩte na njĩra ya kĩĩroho.*
9 Ningĩ nĩkĩo kuuma o mũthenya ũrĩa twaiguire ũguo, tũtirĩ twatiga kũhoya nĩ ũndũ wanyu+ na gũthaithana atĩ mũiyũrũo nĩ ũmenyo ũrĩa wa ma+ wĩgiĩ wendi wake mũrĩ na ũũgĩ wothe na ũtaũku wa kĩĩroho,+
10 nĩgetha mũthiage na mĩthiĩre ĩrĩa yaganĩrĩire na Jehova* nĩguo mũmũkenagie biũ o mũgĩthiaga na mbere kũgĩa na maciaro wĩra-inĩ wothe mwega na mũkĩongagĩrĩra ũmenyo ũrĩa wa ma wa Ngai;+
11 na mwĩkĩrũo hinya kũgerera ũhoti wothe kũringana na ũhoti wake ũrĩ riri+ nĩguo mũkirĩrĩrie biũ mũrĩ na wetereri na gĩkeno,
12 mũgĩcokagĩria Ithe witũ ngatho, ũrĩa watũmire mwagĩrĩre kũnyitanĩra harĩ igai rĩa arĩa aamũre+ arĩa makoragwo ũtheri-inĩ.
13 We nĩ aatũhonokirie kuuma wathani-inĩ wa nduma+ na agĩtũingĩria ũthamaki-inĩ wa Mũrũwe ũrĩa endete,
14 ũrĩa kũgerera harĩ we tũrekagĩrĩrio kũgerera ũkũũri, tũkoherũo mehia maitũ.+
15 Ũcio nĩwe mũhianĩre wa Ngai ũrĩa ũtonekaga,+ irigithathi harĩ ũũmbi wothe;+
16 tondũ indo iria ingĩ ciothe ciombirũo kũgerera harĩ we, iria irĩ igũrũ na iria irĩ thĩ, iria cionekaga na iria itonekaga,+ o na angĩkorũo nĩ itĩ cia ũnene, kana ũtongoria, kana thirikari, kana wathani. Indo iria ingĩ ciothe ciũmbĩtwo kũgerera harĩ we+ na nĩ ũndũ wake.
17 Ningĩ, aarĩ kuo mbere ya indo iria ingĩ ciothe,+ na kũgerera harĩ we indo iria ingĩ ciothe nĩ ciagĩire kuo,
18 na nĩwe mũtwe wa mwĩrĩ, o guo kĩũngano.+ Nĩwe kĩambĩrĩria, irigithathi kuuma kũrĩ arĩa akuũ,+ nĩguo atuĩke wa mbere maũndũ-inĩ mothe;
19 nĩ gũkorũo Ngai nĩ oonire arĩ wega atĩ ũiyũru wothe ũikare thĩinĩ wake,+
20 na kũgerera harĩ we aiguithanie indo iria ingĩ ciothe+ harĩ we mwene na njĩra ya gũthondeka thayũ kũgerera thakame+ ĩrĩa aaitire mũtĩ-inĩ wa kũnyarirĩrũo,* indo iria irĩ thĩ kana iria irĩ igũrũ.
21 Atĩrĩrĩ, inyuĩ arĩa hĩndĩ ĩmwe mwaamũranĩtio na mwarĩ thũ tondũ meciria manyu maarĩ harĩ ciĩko cia waganu-rĩ,
22 rĩu nĩ amũiguithanĩtie nake we mwene kũgerera mwĩrĩ wa nyama wa ũcio wakuire, nĩguo amũneane mũrĩ atheru na mũtarĩ na kameni, na mũtarĩ na ũndũ mũngĩcukĩrũo mbere yake+—
23 angĩkorũo hatarĩ nganja nĩ mũgũthiĩ na mbere thĩinĩ wa wĩtĩkio,+ mũhandĩtwo mũthingi-inĩ+ na mũrũmĩtio,+ mũtekweherio kuuma harĩ kĩĩrĩgĩrĩro kĩa ũhoro ũcio mwega mwaiguire na ũrĩa wahunjirio kũrĩ ũũmbi wothe mũhuro wa riũa.+ Niĩ Paulo, ndatuĩkire ndungata ya ũhoro ũcio mwega.+
24 Rĩu nĩ gũkena ndĩrakena ngĩnyamarĩka nĩ ũndũ wanyu,+ na nĩ ndĩragerera mathĩna ma Kristo marĩa mwĩrĩ wakwa ũtigairie handũ-inĩ ha mwĩrĩ wake,+ o guo kĩũngano.+
25 Ndatuĩkire ndungata harĩ kĩũngano kĩu kũringana na ũramati+ ũrĩa ndaheirũo nĩ Ngai nĩ ũndũ wanyu nĩguo hunjie kiugo kĩa Ngai biũ,
26 hitho ĩrĩa theru+ yahithĩtwo kuuma hĩndĩ ya mĩtabarĩre ya maũndũ ĩrĩa mĩhĩtũku*+ na kuuma hĩndĩ ya njiarũa iria hĩtũku. No rĩu nĩ ĩguũrĩirio arĩa ake aamũre,+
27 arĩa Ngai onete kwagĩrĩire amamenyithie gatagatĩ-inĩ ka ndũrĩrĩ ũtonga ũrĩ na riri wa hitho ĩyo theru,+ na nĩyo Kristo arĩ na ũiguano hamwe na inyuĩ, kĩĩrĩgĩrĩro kĩa riri wake.+
28 Ũcio nĩwe tũramenyithania ũhoro wake, tũgĩtaaraga andũ othe na tũkĩrutaga andũ othe na ũũgĩ wothe, nĩguo tũneane o mũndũ arĩ mũgima na arĩ na ũiguano na Kristo.+
29 Nĩ ũndũ ũcio, nĩ ndĩraruta wĩra na kĩyo, ngĩĩrutanagĩria mũno kũgerera hinya wake ũrĩa ũraruta wĩra na njĩra nene thĩinĩ wakwa.+
Tũũhoro twa magũrũ-inĩ
^ Ũkk., “na roho.”
^ Rora Ũhoro Muongerere A5.
^ Rora Ũthathaũri wa Ciugo.
^ Kana “mahinda marĩa mahĩtũku.” Rora Ũthathaũri wa Ciugo.