Ũhoro Mwega Ũrĩa Waandĩkirũo nĩ Johana 5:1-47
5 Thutha ũcio, nĩ kwarĩ na gĩathĩ+ kĩa Ayahudi, na Jesu akĩambata agĩthiĩ Jerusalemu.
2 Na rĩrĩ, kũu Jerusalemu Kĩhingo-inĩ kĩa Ng’ondu,+ nĩ kwarĩ na karia geetagwo na Kĩhibirania Bethzatha, na kaarĩ na ithaku ithano.
3 Thĩinĩ wacio nĩ kwarĩ na kĩrĩndĩ kĩnene kĩa andũ maakomete ho arwaru, atumumu, arĩa maathuaga, na angĩ maakuĩte ciĩga.
4 *——
5 No hau nĩ haarĩ mũndũ ũmwe watũũrĩte arĩ mũrwaru mĩaka 38.
6 Rĩrĩa Jesu oonire mũndũ ũcio akomete hau na amenya atĩ aakoretwo arĩ mũrwaru kwa ihinda iraya, akĩmũũria atĩrĩ: “Nĩ ũkwenda kũhona?”+
7 Mũndũ ũcio warĩ mũrwaru akĩmũcokeria: “Mũthuri ũyũ, ndirĩ na mũndũ wa kũndonyia karia-inĩ rĩrĩa maĩ maunjugwo, na rĩrĩa ndathiĩ gũtonya, mũndũ ũngĩ agatonya mbere yakwa.”
8 Jesu akĩmwĩra: “Ũkĩra! Oya mũgeka waku* na wĩtware.”+
9 Na o rĩo mũndũ ũcio akĩhona, akĩoya mũgeka wake* na akĩambĩrĩria gwĩtwara.
Mũthenya ũcio warĩ wa Thabatũ.
10 Nĩ ũndũ ũcio Ayahudi makĩambĩrĩria kwĩra mũndũ ũcio wahonetio atĩrĩ: “Nĩ mũthenya wa Thabatũ, na ndwagĩrĩirũo gũkuua mũgeka ũcio.”*+
11 No we akĩmacokeria: “Mũndũ ũrĩa wahonia nowe wanjĩĩra atĩrĩ, ‘Oya mũgeka waku* na wĩtware.’”
12 Nao makĩmũũria: “Nĩ mũndũ ũrĩkũ ũcio wakwĩra, ‘Oya mũgeka* na wĩtware’?”
13 No we ndaamenyaga nũũ wamũhonetie, tondũ Jesu nĩ eeherete agatonya kĩrĩndĩ-inĩ kĩrĩa kĩarĩ hau.
14 Thutha ũcio Jesu akĩmũkora thĩinĩ wa hekarũ na akĩmwĩra ũũ: “Nĩ ũkuona rĩu ũrĩ mũhonu! Ndũkanehie rĩngĩ, nĩguo ndũgakorũo nĩ ũndũ mũũru makĩria.”
15 Mũndũ ũcio agĩthiĩ na akĩra Ayahudi atĩ nĩ Jesu wamũhonetie.
16 Nĩ ũndũ wa gĩtũmi kĩu, Ayahudi nĩ maanyariraga Jesu, tondũ wa gwĩka maũndũ macio mũthenya wa Thabatũ.
17 No we akĩmacokeria atĩrĩ: “Awa atũire arutaga wĩra o nginya rĩu, o na niĩ ndũire ndutaga wĩra.”+
18 Kĩu nĩkĩo gĩatũmire Ayahudi mambĩrĩrie gũcaria makĩria ũrĩa mangĩmũũraga, tondũ to Thabatũ ooinaga, no ningĩ nĩ eetaga Ngai Awa,+ akeiganania na Ngai.+
19 Nĩ ũndũ ũcio, akĩmacokeria akĩmeera: “Ngũmwĩra atĩrĩ o ma o ma, Mũriũ ndangĩka ũndũ o na ũmwe eĩrĩte we mwene, no ekaga o ũrĩa tu onaga Ithe agĩka.+ Tondũ maũndũ marĩa Ithe ekaga, Mũriũ ekaga maũndũ macio o taguo.
20 Nĩ gũkorũo Ithe nĩ endete Mũriũ+ na nĩ amuonagia maũndũ marĩa mothe we mwene ekaga, na nĩ ekũmuonia maũndũ manene gũkĩra macio, nĩguo inyuĩ mũgege.+
21 Nĩ gũkorũo o ta ũrĩa Ithe ariũkagia arĩa akuũ akamacokia muoyo,+ noguo Mũriũ o nake acokagia muoyo mũndũ o wothe ũrĩa enda gũcokia muoyo.+
22 Nĩ gũkorũo Ithe ndatuagĩra mũndũ o na ũmwe, no ũhoro wothe wa gũtuanĩra ehokeire Mũriũ,+
23 nĩguo andũ othe maheage Mũriũ gĩtĩo o ta ũrĩa maheaga Ithe gĩtĩo. Mũndũ o wothe ũtaheete Mũriũ gĩtĩo ndaheete Ithe ũrĩa wamũtũmire gĩtĩo.+
24 Ngũmwĩra atĩrĩ o ma o ma, mũndũ o wothe ũiguaga ciugo ciakwa na agetĩkia Ũrĩa wandũmire arĩ na muoyo wa tene+ na tene, na ndagaatuĩrũo no nĩ oimĩte gĩkuũ-inĩ agatonya muoyo-inĩ.+
25 “Ngũmwĩra atĩrĩ o ma o ma, ihinda nĩ rĩroka, na rĩu nĩ ikinyu, rĩrĩa arĩa makuĩte makaaigua mũgambo wa Mũrũ wa Ngai, na arĩa mekũũthikĩrĩria nĩ magaatũũra muoyo.
26 Nĩ gũkorũo o ta ũrĩa Ithe arĩ na muoyo thĩinĩ wake,*+ nĩ ahotithĩtie Mũriũ o nake gũkorũo na muoyo thĩinĩ wake.+
27 Na nĩ amũheete wathani wa gũtuanĩra,+ tondũ we nĩwe Mũrũ wa mũndũ.+
28 Mũtikagegio nĩ ũhoro ũcio, nĩ gũkorũo ihinda nĩ rĩroka, rĩrĩa arĩa othe marĩ thĩinĩ wa mbĩrĩra* makaaigua mũgambo wake+
29 na moime kuo, arĩa meekaga maũndũ mega moimĩre iriũkĩro rĩa muoyo, nao arĩa meekaga maũndũ moru moimĩre iriũkĩro rĩa gũtuĩrũo.+
30 Ndingĩka ũndũ o na ũmwe ndĩĩrĩte niĩ mwene. Nduaga ciira kũringana na ũrĩa ndaigua, na ituĩro rĩakwa nĩ rĩa ũthingu+ tondũ ndiĩkaga wendi wakwa, no njĩkaga wendi wa ũrĩa wandũmire.+
31 “Korũo nĩ niĩ nyiki ndutaga ũira igũrũ rĩakwa mwene, ũira wakwa ndũngĩkorũo ũrĩ wa ma.+
32 Nĩ harĩ ũngĩ ũrutaga ũira igũrũ rĩakwa, na nĩ njũĩ atĩ ũira ũrĩa arutaga igũrũ rĩakwa nĩ wa ma.+
33 Inyuĩ nĩ mũtũmĩte andũ kũrĩ Johana, na akaruta ũira igũrũ rĩgiĩ ũhoro ũrĩa wa ma.+
34 O na kũrĩ ũguo-rĩ, ndiĩtĩkagĩra ũira wa kuuma kũrĩ mũndũ, no ndĩroiga maũndũ macio nĩgetha inyuĩ mũhonokio.
35 Mũndũ ũcio aarĩ tawa ũrakana na ũkaruta ũtheri, na kwa ihinda inyinyi nĩ mweriragĩria gũkenera mũno ũtheri wake.+
36 No ũira wakwa nĩ mũnene gũkĩra wa Johana, nĩ gũkorũo mawĩra marĩa Awa aaheire ndute, o maya ndĩraruta, nĩ marutaga ũira atĩ ndũmĩtwo nĩ Awa.+
37 Na Awa ũcio wandũmire nĩ arutĩte ũira igũrũ rĩakwa.+ Inyuĩ gũtirĩ hĩndĩ mũrĩ mwaigua mũgambo wake kana mũkona ũrĩa atariĩ,+
38 na kiugo gĩake gĩtiikaraga thĩinĩ wanyu, tondũ mũtiĩtĩkagia ũrĩa watũmirũo nĩwe.
39 “Inyuĩ mũthuthuragia Maandĩko+ tondũ mwĩciragia nĩ mũkoona muoyo wa tene na tene nĩ ũndũ wamo; na macio nĩmo* marutaga ũira igũrũ rĩakwa.+
40 Ĩndĩ mũtiendaga gũka kũrĩ niĩ+ nĩguo mũgĩe na muoyo.
41 Niĩ ndiĩtĩkagĩra rũgooco kuuma kũrĩ andũ,
42 no nĩ njũĩ wega atĩ mũtirĩ na wendo kwerekera Ngai thĩinĩ wanyu.
43 Njũkĩte na rĩĩtwa rĩa Awa, no mũtinjĩtĩkagĩra. No mũndũ ũngĩ angĩũka na rĩĩtwa rĩake mwene, ũcio no mũmwĩtĩkĩre.
44 Mũngĩgĩtĩkia atĩa na mwĩtĩkagĩra kũgoocana inyuĩ ene, na mũticaragia rũgooco rũrĩa ruumaga kũrĩ Ngai ũrĩa ũmwe?+
45 Mũtigecirie atĩ nĩ ngũmũthitanga kũrĩ Awa; nĩ harĩ ũrĩa ũmũthitangaga, nĩwe Musa,+ ũrĩa inyuĩ mũkoragwo mũigĩte mwĩhoko wanyu harĩ we.
46 Korũo nĩ mwĩtĩkĩtie Musa, o na niĩ mwanjĩtĩkia, nĩ gũkorũo nĩ aandĩkire ũhoro wakwa.+
47 No angĩkorũo mũtiĩtĩkĩtie ũhoro ũrĩa aandĩkire-rĩ, mũngĩgĩtĩkia atĩa ũrĩa njugaga?”
Tũũhoro twa magũrũ-inĩ
^ Rora Ũhoro Muongerere A3.
^ Kana “karĩrĩ gaku.”
^ Kana “karĩrĩ gake.”
^ Kana “karĩrĩ kau.”
^ Kana “karĩrĩ gaku.”
^ Kana “karĩrĩ.”
^ Kana “arĩ na kĩheo kĩa muoyo thĩinĩ wake.”
^ Ũkk., “mbĩrĩra cia kĩririkano.”
^ Maandĩko macio.
