O ta ũrĩa wonete thĩinĩ wa kabuku gaka, Bibilia ĩrĩ na motaaro maingĩ mangĩgũteithia wee, na famĩlĩ yaku. Jehova endaga ũkorũo na gĩkeno. Oigĩte atĩ ũngĩiga ũthathaiya wake mbere, ‘indo icio ingĩ ciothe nĩ ũrĩkĩragĩrĩrio.’ (Mathayo 6:33) Nĩ arenda mũno ũtuĩke mũrata wake. Hũthĩra mweke o wothe ũrĩa ũngĩoneka kũrĩmĩra ũrata waku hamwe na Ngai. Ũcio nĩguo ũndũ ũrĩa wa bata mũno mũndũ angĩkorũo naguo.—Mathayo 22:37, 38.

ŨRĨA BIBILIA YUGAGA: “Nĩngũtuĩka Ithe wanyu, O na inyuĩ mũtuĩke ariũ akwa na aarĩ akwa, ũguo nĩguo Mwathani Mwene-hinya-wothe oiga.” (2 Akorintho 6:18) Ngai arenda ũtuĩke mũrata wake wa hakuhĩ. Njĩra ĩmwe ya gwĩka ũguo nĩ kũgerera mahoya. Jehova akwĩraga ‘ũhoyage ũtegũtigithĩria.’ (1 Athesalonike 5:17) Nĩ eriragĩria kũigua kĩrĩa kĩ ngoro-inĩ yaku na kĩrĩa kĩragũtanga meciria. (Afilipi 4:6) Mwahoya hamwe na famĩlĩ yaku, o nao nĩ marĩonaga wega ũrĩa wĩhokete Ngai.

Makĩria ma kwaranĩria na Ngai, nĩ ũrabatara kũmũthikĩrĩria. No ũthikĩrĩrie Ngai na njĩra ya gũthoma Kiugo gĩake na mabuku marĩa mataaragĩria Bibilia. (Thaburi 1:1, 2) Wĩcũranagie maũndũ marĩa weruta. (Thaburi 77:11, 12) Gũthiĩ mĩcemanio ya Gĩkristiano ũtegũtĩrĩria nĩ njĩra ĩngĩ ya gũthikĩrĩria Ngai.—Thaburi 122:1-4.

Kũhunjĩria arĩa angĩ nĩ njĩra ĩngĩ ya bata mũno ya gwĩkĩra hinya ũrata waku hamwe na Jehova. O ũrĩa ũgũthiĩ na mbere kũhunjia, noguo ũrĩiguaga arĩ mũrata waku.—Mathayo 28:19, 20.

ŨRĨA ŨNGĨKA:

• Caria kahinda o mũthenya ga gũthoma Bibilia na kũhoya

• Mũrĩ ta famĩlĩ, igai maũndũ ma kĩĩroho mbere ya maũndũ ma gwĩkenia na kũhurũka

ŨRĨA BIBILIA YUGAGA: ‘Kuhĩrĩriai Ngai, nake nĩ ekũmũkuhĩrĩria inyuĩ.’ (Jakubu 4:8) Bangai na mũrũmĩrĩre mũtegũtĩrĩria mũtaratara wa ũthathaiya wa famĩlĩ. (Kĩambĩrĩria 18:19) No nĩ harĩ maũndũ mangĩ marabatarania. No mũhaka mũigage Ngai mbere ũtũũro-inĩ wanyu wa o mũthenya. Ĩkĩra hinya ũrata wa famĩlĩ yaku hamwe na Ngai na njĩra ya kwaria nao ũhoro wake “hĩndĩ ĩrĩa ũikarĩte nyũmba yaku thĩinĩ, na hĩndĩ ĩrĩa ũgũthiĩ na njĩra, na hĩndĩ ĩrĩa ũkomete, o na rĩrĩa ũũkĩrĩte.” (Gũcokerithia Maathani 6:6, 7) Wĩrutanĩrie kwĩgerekania na Joshua ũrĩa woigire ũũ: “Ha ũhoro wakwa niĩ mwene, na nyũmba yakwa-rĩ, tũrĩtungatagĩra Jehova.”—Joshua 24:15.

ŨRĨA ŨNGĨKA:

• Koragwo na mũtaratara mwega ũtegũtĩrĩria wa kũruta famĩlĩ yaku, na mũkaragĩrĩria mabataro ma o mũndũ thĩinĩ wa famĩlĩ