Rĩrĩa andũ mahikanĩtie magĩa mwana, nĩ makenaga, na rĩmwe makaigua maritũhĩirũo. Mũrĩ aciari erũ, mwahota kũmaka mũno kuona atĩ rĩu mũrahũthĩra mahinda na hinya wanyu mũingĩ kũrũmbũiya mwana. Kwaga toro na kwerekeria ngoro cianyu harĩ mwana no kũrehe moritũ kĩhiko-inĩ kĩanyu. Wee na ũrĩa mũhikanĩtie nake no nginya mwĩke mogarũrũku nĩguo mũhote kũrũmbũiya mwana na mũrũmie kĩhiko kĩanyu. Ũtaaro wa Bibilia ũngĩmũteithia atĩa kũhiũrania na ũndũ ũcio?

ŨRĨA BIBILIA YUGAGA: “Wendani ndũrĩ ũiru.” Na ningĩ “ndũcaragia ũrĩa ũngĩĩguna guo mwene, o na ndũrĩ marakara.” (1 Akorintho 13:4, 5) Ũrĩ mũtumia, nĩ ũndũ wa ndũire gwĩkora atĩ ũrahũthĩra mahinda maku maingĩ harĩ mwana. O na kũrĩ ũguo, mũthuri waku no aigue atiganĩirio, kwoguo ndũkariganĩrũo atĩ o nake nĩ arabatara mahinda maku. Ũrĩ na ngumo ya wetereri na ũtugi, no ũmũteithĩrĩrie kuona atĩ o nake nĩ wa bata na arĩ na itemi harĩ kũrũmbũiya mwana.

“Inyuĩ athuri, tũũraniai na atumia anyu kũringana na ũrĩa mũũĩ arĩ wega.” (1 Petero 3:7) Menya atĩ mũtumia waku nĩ arĩhũthagĩra hinya wake mũingĩ harĩ mwana. Tondũ ũcio nĩ wĩra mwerũ harĩ we, no aigue anogete meciria na mwĩrĩ, kana athuthĩkĩte ngoro. Rĩmwe no akũrakarĩre, no geragia kũhorera, tondũ mũndũ “ũrĩa ũtahiũhaga kũrakara nĩ mwega kũrĩ njamba.” (Thimo 16:32) Onania atĩ nĩ ũrataũkĩrũo nĩ maũndũ marĩa aragerera, na ũmũhe ũteithio ũrĩa arabatara.—Thimo 14:29.

ŨRĨA ŨNGĨKA:

• Athuri: Teithagia mũtumia waku kũrũmbũiya mwana, nginya mathaa ma ũtukũ. Nyihanyihia mathaa marĩa ũhũthagĩra maũndũ-inĩ mangĩ nĩguo ũkorũo na ihinda rĩa kũigana hamwe na mũtumia waku na mwana

• Atumia: Mũthuri waku angĩkwĩra nĩ arenda gũgũteithia kũrora mwana, ndũkarege. Angĩaga gwĩka ũndũ na njĩra ĩrĩa yagĩrĩire, muonie na njĩra ya wendo ũrĩa angĩka, handũ ha kũmũruta mahĩtia

ŨRĨA BIBILIA YUGAGA: Nĩ ‘magatuĩka mwĩrĩ ũmwe.’ (Kĩambĩrĩria 2:24) O na gũtuĩka nĩ mũgĩte na mũndũ ũngĩ thĩinĩ wa famĩlĩ yanyu, ririkanai atĩ mũrĩ o “mwĩrĩ ũmwe.” Geriai ũrĩa wothe mũngĩhota gwĩkĩra kĩhiko kĩanyu hinya.

Inyuĩ atumia, cokagĩriai athuri anyu ngatho nĩ ũndũ wa ũteithio ũrĩa mamũheaga. Ciugo cianyu cia kuonania ngatho no ‘imahooragĩrie.’ (Thimo 12:18, The Holy Bible in Gĩkũyũ Language) Na inyuĩ athuri, ĩragai atumia anyu ũrĩa mũmendete na mũkamona marĩ a bata. Magathagĩrĩriei nĩ ũndũ wa ũrĩa marũmbũyagia famĩlĩ.—Thimo 31:10, 28.

“Mũndũ nĩatigage gwĩcarĩria o maũndũ ma kwĩguna we mwene, tiga o marĩa mangĩguna mũndũ ũrĩa maikaraga nake.” (1 Akorintho 10:24) Hingo ciothe ĩkagĩra ũrĩa mũhikanĩtie nake maũndũ marĩa mega biũ. Gĩagai na mahinda ma kwaranĩria, kwĩrana maũndũ mega marĩa o mũndũ ekaga, na gũthikanĩrĩria. Mũtikagĩe na mwĩyendo maũndũ-inĩ megiĩ ngomanio. Wĩciragie mabataro ma ũrĩa mũhikanĩtie nake. Bibilia yugaga ũũ: “Tigagai kũimana, thengia rĩrĩa mũngĩkorũo mũrĩkanĩire.” (1 Akorintho 7:3-5) Kwoguo, aragĩrĩriai ũndũ ũcio mumĩranĩtie ngoro. Ũtaũku wanyu na ũkirĩrĩria nĩ ũgwĩkĩra kĩhiko kĩanyu hinya.

ŨRĨA ŨNGĨKA:

• Ndũkanariganĩrũo nĩ gwetha ihinda rĩa gũkorũo mũrĩ o inyuerĩ

• Ĩkaga tũũndũ tũnini tũnini tũrĩa tũtũmaga ũrĩa mũhikanĩtie nake aigue endetwo, hihi ta kũmũtũmĩra ndũmĩrĩri kana kũmũhe kĩheo

ŨRĨA BIBILIA YUGAGA: “Gwata hĩndĩ ĩrĩa warĩ kaana, ũtũire ũmenyete Maandĩko marĩa matheru, o marĩa mahotaga gũkũũhĩgia, nĩguo ũkahonokio.” (2 Timotheo 3:15) Bangai ũrĩa mũrĩkaga nĩguo mũrute mwana wanyu. Mwana akoragwo na ũhoti mũnene wa kwĩruta, o na atanaciarũo. Na arĩ o nda ya nyina, no ahote gũkũũrana mũgambo wa mũciari, na no amenye rĩrĩa akenete, kana rĩrĩa arakarĩte. Mũthomagĩrei mabuku kuuma arĩ o gakenge. O na gũtuĩka no age gũtaũkĩrũo nĩ maũndũ marĩa mũramũthomera, ũndũ ũcio no ũmũteithie gũkagĩa na wendi wa gũthoma aneneha.

Gũtirĩ hĩndĩ mwana angĩrũo nĩ mũnini ũũ atĩ ndangĩrutwo ũhoro wĩgiĩ Ngai. Reke aiguage mũkĩhoya Jehova. (Gũcokerithia Maathani 11:19) O na rĩrĩa mũrathaka nake, mwĩragei ũhoro wa indo iria Ngai ombĩte. (Thaburi 78:3, 4) O ũrĩa mwana wanyu egũthiĩ agĩkũraga, nĩ arĩonaga ũrĩa mwendete Jehova na o nake nĩ arĩĩrutaga kũmwenda.

ŨRĨA ŨNGĨKA:

• Hoya Ngai akũhe ũũgĩ wa kũruta mwana waku

• Mũcokagĩre maũndũ marĩa ũngĩenda anyite, na nĩ ekwambĩrĩria kwĩruta kuuma arĩ o mũnyinyi