Nkunga 103:1-22
Ya Davidi.
103 Bika mono kumisa* Yehowa;Bika nde bima yonso yina kele na kati na mono kukumisa zina na yandi ya santu.
2 Bika mono kumisa* Yehowa;Bika nde mono vila ve ata fioti mambu yonso ya yandi me salaka.+
3 Yandi ke lolulaka bifu na nge yonso+Mpi ke belulaka maladi na nge yonso;+
4 Yandi ke gulusa luzingu na nge na dibulu,*+Mpi ke lwatisa nge zola na yandi ya kwikama mpi mawa na yandi.+
5 Yandi ke pesa nge bima mingi ya mbote+ luzingu na nge ya mvimba,Yo yina kileke na nge ke kuma ya mpa bonso ya ngo-zulu.+
6 Yehowa ke salaka mambu na mutindu ya kusungama+ mpi na lununguSambu na bantu yonso yina bo ke niokula.+
7 Yandi zabisaka banzila na yandi na Moize,+Mpi bisalu na yandi na bana ya Izraele.+
8 Yehowa ke wilaka bantu mawa mpi ke fwilaka bo nkenda.*+Yandi ke waka makasi nswalu ve mpi kele ya kufuluka na zola ya kwikama.*+
9 Yandi ta monisa ve bifu na beto ntangu yonso,+Yandi ta vandaka mpi ve na makasi kimakulu.+
10 Yandi me sadila beto ve mambu na kutadila masumu na beto,+Yandi me vutudila beto mpi ve mambu yina me fwana na bifu na beto.+
11 Sambu mutindu zulu kele ya kunanguka kuluta ntoto,Mutindu mosi, zola na yandi ya kwikama kele nene sambu na bantu yina ke waka yandi boma.+
12 Mutindu kisika yina ntangu ke basikaka kele ntama ti kisika yina ntangu ke dindaka,Mutindu mosi mpi, yandi me tulaka mambu na beto ya mbi ntama ti beto.+
13 Mutindu tata ke wilaka bana na yandi mawa,Yehowa me wilaka bantu yina ke waka yandi boma mawa.+
14 Sambu yandi me zaba mbote mutindu yandi me salaka beto,+Yandi ke yibukaka nde beto kele mfututu.+
15 Kansi muntu, bilumbu na yandi kele bonso bilumbu ya matiti;+Yandi ke yelaka bonso kintuntu ya bilanga.+
16 Kansi ntangu mupepe ke bulaka, yo ke vandaka diaka ve,Bonso nde yo vandaka ve pana.*
17 Kansi zola ya kwikama ya Yehowa kele mvula na mvula*Na bantu yina ke tinaka yandi boma,+Mpi lunungu na yandi na bana ya bana na bo,+
18 Na bantu yina ke taninaka kuwakana na yandi+Mpi bantu yina ke zitisaka mbote-mbote bantuma na yandi.
19 Yehowa me tulaka kiti na yandi ya kimfumu ngolo na zulu;+Mpi kimfumu na yandi ke yalaka bima yonso.+
20 Beno kumisa Yehowa, beno yonso bawanzio na yandi,+ yina kele ngolo mingi kibeni,Yina ke zitisaka ndinga na yandi,+ ke lemfukilaka mungungu na yandi.*
21 Beno kumisa Yehowa, beno makesa na yandi yonso.+Bansadi na yandi yina ke salaka luzolo na yandi.+
22 Beno kumisa Yehowa, beno bisalu na yandi yonso,Na bisika yonso yina yandi ke yalaka.*
Bika nde mono kumisa* Yehowa.
Banoti na nsi ya lutiti
^ To “moyo na mono kukumisa.”
^ To “moyo na mono kukumisa.”
^ To “maziamu.”
^ To “ke sadilaka bo mambu na luzitu yonso.”
^ To “ntima ya mbote.”
^ Na kisina, “Mpi kisika na yo ke zabaka yo diaka ve.”
^ To “katuka mvula na mvula tii mvula na mvula.”
^ Na kisina, “ke waka ndinga (makelele) ya mambu ya yandi ke tubaka.”
^ To “bisika yonso ya luyalu na yandi.”
^ To “moyo na mono kukumisa.”
