Apostoloowaa Tʋma Labʋ 3:1-26
3 Pɩyɛɛrɩ nɛ Yohanɛɛsɩ pakpaɣaɣ templo taa adɩma ñɩɣyʋʋ yɔɔ, wɩsɩ wɛlʋʋ ñɩɣtʋ 3 yɔɔ mbʋ yɔ,*
2 nɛ ɛyaa sɩɣlɩ abalʋ nɔɔyʋ, paalʋlɩ-ɩ kaakalaɣ. Paa kɩyakʋ ŋgʋ lɛ, pasɩɣaɣ-ɩ templo nɔnɔɔ ŋga payaɣ se Ðeu yɔ ka-taa, se pɩsa nɛ ɛsʋlʋmʋʋ pʋtɔdɩyɛ naʋ kʋjɔŋ mba pasʋʋ templo taa yɔ pɔ-cɔlɔ.
3 Ɛna Pɩyɛɛrɩ nɛ Yohanɛɛsɩ pacaɣaɣ sʋʋ templo taa lɛ, ɛpaɣzɩ sʋlʋmʋʋ pʋtɔdɩyɛ naʋ kʋjɔŋ.
4 Ɛlɛ Pɩyɛɛrɩ nɛ Yohanɛɛsɩ pɔcɔnɩ-ɩ cuɖuɖu, nɛ Pɩyɛɛrɩ heyi-i se: «Cɔnɩ-ɖʋ.»
5 Nɛ ɛkpazɩ-wɛ nɛ ɛsa, ɛɛɖaŋaa se paha-ɩ nabʋyʋ.
6 Ɛlɛ Pɩyɛɛrɩ heyi-i se: «Mɛnfɛyɩnɩ liidiye nɛ sika, ɛlɛ mbʋ mɛwɛna yɔ, mbʋ mahaɣ-ŋ. Yesu Krɩstʋ Nazarɛɛtɩ tʋ hɩɖɛ taa lɛ, meheyiɣ-ŋ se, ɖɔ!»+
7 Ɛyɔɔdɩ mbʋ lɛ, ɛɖɔkɩ ɛ-nɩwaŋ nesi nɛ ɛkʋsɩ-ɩ.+ Kpaagbaa mbʋ lɛ, ɛ-naataŋ nɛ ɛ-nɩŋgbanzɩ ajɔɔ taa kpa ɖoŋ;+
8 nɛ ɛkʋyɩ ɛmaa ɛ-nɩŋgbanzɩ yɔɔ+ nɛ ɛpaɣzɩ ɖɔm, nɛ ɛtɩŋ-wɛ nɛ ɛsʋʋ templo taa, ɛɖɔŋ nɛ ɛmaɣ nɛ ɛsaŋ Ɛsɔ.
9 Nɛ ɛyaa kpeekpe na-ɩ eɖiɣni ɖɔm nɛ ɛsaŋ Ɛsɔ.
10 Nɛ peɖiɣzina se ɛnʋ kaakɛnɩ abalʋ weyi ɛcakaɣ templo Nɔnɔɔ Ðeu Ñɩŋga+ taa nɛ ɛsʋlʋmʋʋ pʋtɔdɩyɛ naʋ kʋjɔŋ yɔ, nɛ pana mbʋ pɩtalɩ-ɩ yɔ lɛ, pɩɖɩɣzɩ-wɛ kpem.
11 Abalʋ ɛnʋ, ɛwɛɛ nɛ ɛñɔʋnɩ Pɩyɛɛrɩ nɛ Yohanɛɛsɩ mbʋ lɛ, ɛyaa kpeekpe se nɛ powolo pɔ-cɔlɔ lone nɖɩ payaɣ se Salomɔɔ Kʋjɔŋ+ yɔ ɖɩ-taa, nɛ pɩɩɖɩɣzɩ-wɛ siŋŋ.
12 Pɩyɛɛrɩ na mbʋ lɛ, ɛpɔzɩ ɛyaa se: «Izrayɛɛlɩ ɛyaa mɩ, ɛbɛ yɔɔ pʋnɛ pɩɖɩɣzɩ-mɩ kpem mbʋ? Nɛ ɛbɛ yɔɔ ɩwɛɛ nɛ ɩcɔŋnɩ-ɖʋ ɛzɩ ɖa-maɣmaɣ ɖo-ɖoŋ taa yaa ɖɛ-Ɛsɔ ñɔnʋʋ yɔɔ ɖɩlaba nɛ ɛpaɣzɩ ɖɔm?
13 Abraham nɛ Izaakɩ nɛ Yakɔɔb pɛ-Ɛsɔ,+ ɖɔ-cɔzɔnaa tɛ Ɛsɔ sam ɛ-Lɩmɖʋyʋ+ Yesu,+ weyi ɩkpa-ɩ nɛ ɩcɛlɩ+ nɛ ikizi-i Pilaatɩ ɛsɩndaa yɔ, ŋgʋ ɛlɛ kaaɖʋwa se eyeki-i.
14 Ɛɛɛ, ikizi ɛyʋ kiɖeɖeu nɛ siɣsiɣ tʋ ɛnʋ, nɛ ɩpɔzɩ se pɛcɛlɩ-mɩ ɛyaa kʋyʋ,+
15 piyele nɛ ɩkʋ Ðiyiyu Sɔsɔ weyi palɩzaa se ɛha wezuu yɔ.+ Ɛlɛ Ɛsɔ fezi-i nɛ sɩɖaa taa, nɛ ɖɩkɛ pɩ-tɛ aseɣɖe tɩnaa.+
16 Nɛ ɛ-hɩɖɛ taa, nɛ tisuu mbʋ ɖɩwɛnɩ ɛ-hɩɖɛ yɔɔ yɔ, pʋyɔɔ abalʋ weyi ɩnaɣ nɛ ɩsɩmɩ-ɩ yɔ, ɛkpa ɖoŋ. Tisuu mbʋ ɖɩwɛnɩ ɛ-yɔɔ yɔ, mbʋ yebina nɛ abalʋ ɛnɛ ɛ-yɔɔ cɛ cɩɖɩ cɩɖɩ mɩ-tɩŋa mɩ-ɛsɩndaa.
17 Nɛ lɛɛlɛɛyɔ lɛ, koobiya, manawa se kɩɩsɩŋɩyɩtʋ taa ɩlabɩ mbʋ,+ ɛzɩ mɩ-ñʋndɩnaa ɖɔɖɔ labʋ yɔ.+
18 Ɛlɛ Ɛsɔ tɩŋnɩ nʋmɔʋ ŋgʋ kɩ-yɔɔ nɛ eyele nɛ tɔm ndʋ ɛɛtɩŋnɩ nayaa kpeekpe yɔɔ nɛ ɛyɔɔdɩ ɖooo lɔŋ se pɩɩwɛɛ se ɛ-tɛ Krɩstʋ ɛtɔɔ kʋñɔŋ yɔ, tɩla.+
19 «Pʋyɔɔ lɛ ikpiɖi mɩ-kɩwɛɛkɩm yɔɔ,+ nɛ ɩpɩsɩ+ nɛ pɩsa nɛ pahɩzɩ mɩ-kɩwɛɛkɩm,+ nɛ Yehowa* maɣmaɣ kɔnɩ-mɩ laŋɩyɛ hɛzʋʋ alɩwaatʋ*
20 nɛ etiyini-mɩ Krɩstʋ weyi ɛlɩzɩ-ɩ mɩ-yɔɔ yɔ, Yesu.
21 Pɩwɛɛ se ɛwɛɛ ɛsɔdaa nɛ pɩkɔɔ pɩtalɩ wondu tɩŋa ñɔɔzʋʋ alɩwaatʋ ndʋ tɩ-tɔm Ɛsɔ tɩŋnɩ ɛ-nayaa kiɖeɖema yɔɔ caanaʋ taa nɛ ɛyɔɔdɩ yɔ.
22 Toovenim taa lɛ, Moyizi kaayɔɔdaa se: “Mɩ-Ɛsɔ Yehowa* kaɣ-mɩ kʋsʋʋ nayʋ nɔɔyʋ ɛzɩ ma yɔ mi-koobiya hɛkʋ taa.+ Pɩwɛɛ se iwelisi tɔm ndʋ payɩ eheyiɣ-mɩ yɔ.+
23 Toovenim taa lɛ, weyi* eewelisiɣni Nayʋ ɛnʋ yɔ, pakaɣ-ɩ ɖɩzʋʋ caɣ caɣ samaɣ taa.”+
24 Nɛ nayaa kpeekpe, kpaɣnɩ Samɩyɛɛlɩ nɛ mba patɩŋ ɛ-wayɩ yɔ, mba payɩ pɔyɔɔdaa yɔ, posusi ɖɔɖɔ kɩyakɩŋ ɛnɩ ɩ-tɔm kpayɩ kpayɩ.+
25 Mɩkɛnɩnɩ nayaa pɩyalaa nɛ ɛgbɛyɛ nɖɩ Ɛsɔ ɖʋnɩ mɩ-cɔzɔnaa yɔ ɖɩ-pɩyalaa;+ eeheyi Abraham se: “Pɩtɩŋnɩ ña-lʋlʋʋ taa tʋ* yɔɔ lɛ, pakaɣ wazʋʋ tɛtʋ yɔɔ hɔŋ tɩŋa.”+
26 Ɛsɔ kʋsɩ ɛ-Lɩmɖʋyʋ lɛ, mɩ ɛcalɩ-ɩ tiyinuu+ se ɛwazɩ-mɩ nɛ ɛla nɛ mɩ-taa paa weyi lɛ, ɛha siɣye ɛ-lakasɩ kɩdɛkɛdɩsɩ.»
Pɩ-tɛɛ tɔm
^ Piye piye, «ñɩɣyʋʋ 9 ñɩŋgʋ yɔɔ.»
^ Cɔnɩ Tɔm kɩsɔzɩtʋ A5.
^ Piye piye, «nɛ laŋɩyɛ hɛzʋʋ alɩwaatʋ lɩɩnɩ Yehowa ɛsɩndaa nɛ tɩkɔɔ.»
^ Cɔnɩ Tɔm kɩsɔzɩtʋ A5.
^ Yaa «kalɩzaɣ ŋga.»
^ Piye piye, «ño-ɖomaɣ.»
