Apostoloowaa Tʋma Labʋ 15:1-41
-
Nɔɔhɔnɖɛ sɔsɔɖɛ lɩ Antɩyɔɔsɩ pɛlɩtʋ yɔɔ (1, 2)
-
Powoni tɔm Yeruzalɛm (3-5)
-
Ɛzʋtʋyaa nɛ apostoloowaa pekpeɣlaa (6-21)
-
Takayaɣ ŋga kalɩnɩ nɔɔɖɛyaa ɛgbɛyɛ cɔlɔ yɔ (22-29)
-
Pɩwɛɛ se pekizi calɩm (28, 29)
-
-
Patɩŋnɩ takayaɣ ŋga pamawa yɔ kɔ-yɔɔ nɛ pakpazɩ agbaa ɖoŋ (30-35)
-
Pɔɔlɩ nɛ Barnaabaasɩ paya ɖama (36-41)
15 Nɛ ɛyaa nabɛyɛ lɩɩnɩ Yuudee nɛ pɔkɔɔ nɛ papaɣzɩ koobiya wɩlʋʋ se: «Ye patɩpɛlɩ-mɩ ɛzɩ pɩpɔzʋʋ Moyizi sɔnzɩ taa yɔ,+ ɩɩpɩzɩɣ nɛ ihiɣ ñʋʋ yabʋ.»
2 Ɛlɛ ɖama kɩɩnɩnʋʋ nɛ nɔɔhɔnɖɛ sɔsɔɖɛ naɖɩyɛ kɔm pa nɛ Pɔɔlɩ nɛ Barnaabaasɩ pɛ-hɛkʋ taa lɛ, pala ɖʋtʋ se Pɔɔlɩ, Barnaabaasɩ nɛ pa-taa nabɛyɛ pakpa apostoloowaa nɛ ɛzʋtʋyaa cɔlɔ Yeruzalɛm+ tɔm ndʋ* tɩ-yɔɔ.
3 Nɛ ɛgbɛyɛ sɩ-wɛ pazɩ lɛ, powolo pa-nʋmɔʋ yɔɔ nɛ patɩŋnɩ Fenisii nɛ Samaarii, nɛ pɛkɛdɩɣ ɛzɩma ajɛɛ taa mba pɩsɩ pa-laŋa yɔ pɩ-tɔm tete nɛ pɩhaɣ koobiya tɩŋa taa leleŋ sɔsɔŋ.
4 Patalɩ Yeruzalɛm lɛ, ɛgbɛyɛ nɛ apostoloowaa nɛ ɛzʋtʋyaa pamʋ-wɛ camɩyɛ, nɛ pɛkɛdɩ mbʋ payɩ Ɛsɔ tɩŋnɩ pɔ-yɔɔ nɛ ɛla yɔ.
5 Ɛlɛ Farɩsɩ mba kɩjaʋ yɔɔ ɛgbɛyɛ taa ñɩma nabɛyɛ, mba pɔkɔm nɛ petisi Yesu yɔɔ yɔ, pakʋyɩ pe-kpelisi yɔɔ nɛ pasɩŋ nɛ pɔyɔɔdɩ se: «Pɩcɛyaa se pɛpɛlɩ-wɛ nɛ paɖʋ-wɛ paɣtʋ se pɔɖɔ Moyizi Paɣtʋ yɔɔ.»+
6 Peeɖe apostoloowaa nɛ ɛzʋtʋyaa pekpeɣlaa se pɔcɔnɩ tɔm ndʋ ti-ɖeɖe.
7 Patazɩ tɔm taa siŋŋ* nɛ pɩtɛ lɛ, Pɩyɛɛrɩ kʋyɩ nɛ eheyi-wɛ se: «Koobiya, ɩsɩm camɩyɛ se kpaɣnɩ kajalaɣ kɩyakɩŋ taa lɛ, Ɛsɔ lɩzɩ-m mɩ-taa se pɩtɩŋnɩ mɔ-nɔɔ taa tɔm yɔɔ nɛ ajɛɛ taa mba nɩɩ tɔm kɩbandʋ nɛ pɛwɛɛnɩ tisuu.+
8 Nɛ Ɛsɔ weyi ɛsɩm ɛyʋ laŋɩyɛ yɔ,+ ɛlɩzɩ aseɣɖe alɩwaatʋ ndʋ ɛha-wɛ fezuu kiɖeɖeu,+ ɛzɩ ɛhaʋ-ɖʋ kʋ ɖɔɖɔ yɔ.
9 Nɛ ɛtɩɖʋ tʋkaɣ nakɛyɛ ɖa nɛ wɛ ɖɛ-hɛkʋ taa kaaʋ,+ ɛlɛ ɛtɩŋnɩ tisuu yɔɔ nɛ ɛñalɩ pa-laŋa nɛ awɛɛ kele kele.+
10 Ye mbʋ, ɛbɛ yɔɔ ɩtakɩɣ Ɛsɔ lɛɛlɛɛyɔ nɛ ɩsʋkɩ tɔmkpɛlɩkɩyaa sʋʋtʋ*+ ndʋ ɖa nɛ ɖɔ-cɔzɔnaa ɖɩtɩpɩzɩ nɛ ɖɩsɩɣlɩ yɔ?+
11 Ɛlɛ ɖɩwɛnɩ tisuu se pɩtɩŋnɩ Kɩbaɣlʋ Yesu lootiye yɔɔ lɛ,+ ɖihiɣ ñʋʋ yabʋ ɛzɩ mba yɔ.»+
12 Ðɩnɛ ɛlɛ, samaɣ tɩŋa su ɖiɣ ɖiɣ nɛ kapaɣzɩ welisinuu Barnaabaasɩ nɛ Pɔɔlɩ, nɛ paba kɛdɩ-kɛ yʋsasɩ nɛ piti lakasɩ sakɩyɛ nzɩ Ɛsɔ tɩŋnɩ pɔ-yɔɔ nɛ ɛla ajɛɛ taa yɔ.
13 Pɛtɛm yɔɔdʋʋ lɛ, Yakubu tɔ se: «Koobiya, iwelisini-m.
14 Siimeyɔɔnɩ+ kɛdɩ tete ɛzɩma Ɛsɔ kɛzɩ ɛ-lɩmaɣza nɛ ajɛɛ yɔɔ kajalaɣ ɖeɖe se ɛlɩzɩ a-taa samaɣ nakɛyɛ nɛ payaa-kɛ nɛ ɛ-hɩɖɛ yɔ.+
15 Nɛ Nayaa tɔm lakɩ nɔɔ kʋɖʋmaɣ nɛ tɔm ndʋ, ɛzɩ pamaʋ yɔ se:
16 “Pʋwayɩ lɛ, mankaɣ pɩsʋʋ nɛ manɖaɣnɩ kʋsʋʋ Daviid kizinziku* ŋgʋ kɩtɔlaa yɔ; mankaɣ tasʋʋ maʋ kɩ-njaa nɛ mankʋsɩ-kʋ,
17 se pɩsa nɛ ɛyaa mba pakazaa yɔ, papɩzɩ nɛ pañɩnɩ Yehowa* siŋŋ, pa nɛ ajɛɛ tɩŋa taa mba, mba paya-wɛ nɛ ma-hɩɖɛ yɔ, Yehowa* yɔɔdʋʋna, ɛnʋ weyi eɖiɣni labʋ lakasɩ nzɩ yɔ,+
18 nzɩ paasɩm-sɩ ɖooo caanaʋ taa yɔ.”+
19 Ye mbʋ, ma-lɩmaɣzɩyɛ lɛ se* pɩfɛyɩ se ɖɩcaa tɔm ajɛɛ taa ñɩma mba pɛwɛɛ nɛ papɩsɩɣnɩ Ɛsɔ yɔɔ yɔ,+
20 ɛlɛ ɖɩma-wɛ se pekizi mbʋ sɩʋ kpelisi pisi-pʋ yɔ,+ kʋzʋʋ kɩdɛkɛdʋʋ,*+ kpɩna wena patam a-liŋ tɛɛ yɔ,* nɛ calɩm.+
21 Mbʋ pʋyɔɔ yɔ kpaɣnɩ caanaʋ taa, Moyizi kaawɛnɩ ɛyaa mba posusaɣ tɔm ndʋ ɛmawa yɔ tɛtʋ ndɩ ndɩ taa; mbʋ pʋyɔɔ yɔ pakalaɣ-tʋ nɛ nɔɔ kɩkʋyaɣ sinaagɔɔgɩwaa taa paa sabaatɩ ŋgʋ.»+
22 Ðɩnɛ ɛlɛ apostoloowaa nɛ ɛzʋtʋyaa, pa nɛ ɛgbɛyɛ tɩŋa, pakpaɣ lɩmaɣzɩyɛ se palɩzɩɣ ɛyaa nabɛyɛ pɛ-hɛkʋ taa nɛ petiyi-wɛ Antɩyɔɔsɩ, pa nɛ Pɔɔlɩ nɛ Barnaabaasɩ; petiyi Yudaasɩ weyi payaɣ se Barsaabaasɩ yɔ nɛ Silaasɩ,+ mba ɖɛɣaɣnɩ nɔɔ koobiya hɛkʋ taa.
23 Pama tɔm tʋnɛ nɛ paɖʋzɩ-tʋ pe-nesi taa nɛ petiyina:
«Mi-koobiya apostoloowaa nɛ ɛzʋtʋyaa maɣnɩ tɔm tʋnɛ koobiya mba pɛwɛ Antɩyɔɔsɩ,+ Siirii, nɛ Siliisii nɛ pɛkɛ ajɛɛ taa mba yɔ: Ðɩsɛ-mɩ!
24 Ðɩnɩwa se nabɛyɛ lɩnɩ ɖɛ-hɛkʋ taa nɛ pɔyɔɔdɩ tɔm ndʋ tɩkɔnɩ-mɩ kaɖɛ yɔ,+ pañɩnaɣ se paɖʋzɩ-mɩ,* ŋgʋ ɖɩtɩɖʋ-wɛ paɣtʋ natʋyʋ, pʋyɔɔ lɛ,
25 ɖɩnɩnɩ ɖama ɖa-tɩŋa nɛ ɖɩkpaɣ lɩmaɣzɩyɛ se ɖɩlɩzɩɣ ɛyaa nabɛyɛ nɛ ɖitiyini-mɩ, pa nɛ ɖa-kʋsɔɔlaa Barnaabaasɩ nɛ Pɔɔlɩ,
26 ɛyaa mba pɛcɛlɩ pe-weziŋ* ɖa-Kɩbaɣlʋ Yesu Krɩstʋ hɩɖɛ yɔɔ yɔ.+
27 Mbʋ yebina nɛ ɖitiyiɣ Yudaasɩ nɛ Silaasɩ, se papɩzɩ ɖɔɖɔ nɛ pɛkɛdɩ-mɩ tɔm kʋɖʋmtʋ ndʋ nɛ pɔ-nɔɔ.+
28 Mbʋ pʋyɔɔ yɔ pɩkɛdɩnɩ fezuu kiɖeɖeu+ nɛ ɖa-maɣmaɣ se ɖɩtaasɔzɩ-mɩ sʋʋtʋ natʋyʋ nɛ pɩtasɩnɩ tɔm kɩcɛyɩtʋ tʋnɛ:
29 se ɩsɔ* mbʋ pala sɩɩnaa yɔɔ yɔ,+ calɩm,+ kpɩna wena patam a-liŋ tɛɛ yɔ,*+ nɛ kʋzʋʋ kɩdɛkɛdʋʋ.*+ Ye ɩkpa mɩ-tɩ camɩyɛ nɛ lakasɩ nzɩ yɔ, pɩkaɣ-mɩ ɖenuu. Ɩcaɣ camɩyɛ!»*
30 Nɛ peyebi ɛyaa mba nɛ pɛɖɛɛ lɛ, paba tii Antɩyɔɔsɩ, nɛ pekpeɣli koobiya tɩŋa nɛ pɛcɛlɩ-wɛ takayaɣ ŋga.
31 Pɛtɛm-kɛ kalʋʋ lɛ, pa-taa la leleŋ nɛ ɛzɩma ka-taa tɔm kpazɩ-wɛ ɖoŋ yɔ.
32 Nɛ Yudaasɩ nɛ Silaasɩ paakɛ nayaa ɖɔɖɔ, nɛ pʋyɔɔ lɛ pɔyɔɔdɩ tɔm sakɩyɛ nɛ peseɣti koobiya nɛ pakpazɩ-wɛ ɖoŋ.+
33 Pacaɣ pɔ-cɔlɔ alɩwaatʋ cabɩ lɛ, koobiya yele-wɛ nɛ papɩsɩnɩ laŋhɛzɩyɛ mba paatiyi-wɛ yɔ pɔ-cɔlɔ.
34 *——
35 Ɛlɛ Pɔɔlɩ nɛ Barnaabaasɩ pacaɣ Antɩyɔɔsɩ, nɛ pa nɛ ɛyaa lalaa sakɩyɛ pɛwɛɛ nɛ pawɩlɩɣ tɔm nɛ posusuu Yehowa* tɔm kɩbandʋ.
36 Pɩlabɩ kɩyakɩŋ nɩɩyɩ lɛ, Pɔɔlɩ heyi Barnaabaasɩ se: «Lɛɛlɛɛyɔ, ɖɩpɩsɩ* nɛ ɖikilimi koobiya yɔɔ tɛtʋ ndʋ tɩ-taa payɩ ɖiisusi Yehowa* tɔm yɔ, nɛ ɖɩna se pɛwɛ ɛzɩma.»+
37 Barnaabaasɩ kaaɖʋ ɛ-taa se ɛkpɛndɩɣnɩ Yohanɛɛsɩ, weyi payaɣ se Maarɩkɩ yɔ.+
38 Ɛlɛ pɩtaakɛdɩnɩ Pɔɔlɩ se pɛkpɛndɩnɩ-ɩ, mbʋ pʋyɔɔ yɔ eeyebi-wɛ Pamfiilii nɛ ɛtɩtɩŋ-wɛ tʋmɩyɛ taa.+
39 Peeɖe pɔkɔ ɖama nɛ pana siŋŋ nɛ pɩsaa miŋ kpem, nɛ halɩ paya ɖama; nɛ Barnaabaasɩ+ kpaɣ Maarɩkɩ nɛ pasʋʋ mɛlɛ nɛ powolo Siiprɩ.
40 Pɔɔlɩ ñakpaɣ Silaasɩ, nɛ koobiya tɛmɩ-ɩ ɖʋzʋʋ Yehowa* lootiye tɛɛ lɛ, ɛ nɛ ɩ pɛɖɛɛ.+
41 Ɛtɩŋnɩ Siirii nɛ Siliisii nɛ ɛkpazɩɣ agbaa ɖoŋ.
Pɩ-tɛɛ tɔm
^ Yaa «nɔɔhɔnɖɛ nɖɩ.»
^ Yaa «Pɔhɔmnɩ ɖama tɔm siŋŋ.»
^ Yaa «nɛ ɩtɩnɩɣ tɔmkpɛlɩkɩyaa pondone yɔɔ sʋʋtʋ ɖaʋ.»
^ Yaa «cokiye; ɖɩɣa.»
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Yaa «ma-naʋ taa yɔ.»
^ Yaa «kpɩna wena pakʋwa nɛ a-calɩm tikpe yɔ.»
^ Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «paɖʋzɩ mɩ-kalɩzasɩ.»
^ Yaa «pa-kalɩzasɩ.»
^ Yaa «Pɩlaba.»
^ Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «kpɩna wena pakʋwa nɛ a-calɩm tikpe yɔ.»
^ Yaa «ikizi.»
^ Cɔnɩ Tɔm kɩsɔzɩtʋ A3.
^ Cɔnɩ Tɔm kɩsɔzɩtʋ A5.
^ Pɩpɩzɩɣ pɩkɛ, «ɖɩñaɣ pana siŋŋ nɛ ɖɩpɩsɩ.»
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
