Abụ Ọma 146:1-10
146 Toonụ Jaa!*+
Ka m jiri obi m niile too Jehova.+
2 M ga-eto Jehova ná ndụ m niile.
M ga-abụku Chineke m abụ otuto n’oge niile m dị ndụ.
3 Unu atụkwasịla ndị isi* obi,Unu atụkwasịkwala nwa nke mmadụ obi, bụ́ onye na-enweghị ike ịzọpụta mmadụ.+
4 Ọ kwụsị iku ume, ọ na-alaghachi n’ájá.+
N’ụbọchị ahụ, ọ na-akwụsị iche echiche.+
5 Onye Chineke Jekọb na-enyere aka na-enwe obi ụtọ,+Bụ́ onye nwere olileanya n’ebe Chineke ya bụ́ Jehova nọ,+
6 Onye kere eluigwe na ụwa,Oké osimiri na ihe niile dị n’ime ha,+Onye e kwesịrị ịtụkwasị obi mgbe niile,+
7 Onye na-ekpechitere ndị a na-erigbu erigbu ọnụ ha,Onye na-enye ndị agụụ na-agụ ihe oriri.+
Jehova na-atọhapụ ndị mkpọrọ.*+
8 Jehova na-emeghe anya ndị ìsì.+
Jehova na-ekulite ndị ike gwụrụ.+
Jehova hụrụ ndị ezi omume n’anya.
9 Jehova na-echebe ndị mbịarambịa.
Ọ na-enyere nwa na-enweghị nna na nwaanyị di ya nwụrụ aka,+Ma ọ na-aghasasị atụmatụ ndị ajọ omume.+
10 Jehova ga-abụ Eze ruo mgbe ebighị ebi,+Zayọn, Chineke gị ga-abụ Eze n’ọgbọ niile.
Toonụ Jaa!*
Ihe E Dere n'Ala Ala Peeji
^ Ma ọ bụ “Haleluja!” “Jaa” bụ mkpọbiri aha Jehova.
^ Ma ọ bụ “ndị a ma ama.”
^ Na Hibru, “ndị e kere agbụ.”
^ Ma ọ bụ “Haleluja!” “Jaa” bụ mkpọbiri aha Jehova.
