Ombuze ombwa i za ku Jehova, Mukuru omunauṋingandu, ngu vanga kutja omaṱunḓu ye kare nouṋingandu. (1 Timoteus 1:11, EEP) Eye ongwa zikamisa orukupo. Orukupo rwokotjiveta orunahepero orondu ovanatje ve kurira mondjeverero ombwa. Ovakriste ve sokutenga ozoveta zehi mu va tura nḓu maze tjama nomatjangisiro worukupo.​—Lesa Lukas 2:1, 4, 5.

Mukuru orukupo u ru vara vi? Eye u vanga kutja ru rire oupanga oukarerere pokati komurumendu nomukazendu. Jehova u vanga kutja omurumendu nomukazendu mba kupasana ve karasane nouṱakame. (Ovaheberi 13:4) Eye wa tonda omateyero wotukupo. (Maleaki 2:16) Posi yokutja eye u yandjera ovandu okuteya orukupo nokukakupa omundu warwe indu umwe wovakupasane tja tjiti oruvakiro.​—Lesa Mateus 19:3-6, 9.

Jehova wa mema omurumendu nomukazendu kutja ve vaterasane morukupo. (Genesis 2:18) Otjotjiuru tjomukazendu we, omurumendu ma sokuhongorera eṱunḓu re mokuvepa mbi mave hepa nokuvehonga ohunga na Mukuru. Eye ma sokusuvera omukazendu we tjinene okukapita ozonḓero ze omuini. Ovakupasane mave sokusuverasana nokutengasana. Mena rokutja ovarumendu novakazendu avehe kavandu ohomonena, owo mave sokurihonga okuisirasana tji mave vanga ouṋingandu morukupo rwawo.​—Lesa Ovaefese 4:31, 32; 5:22-25, 33; 1 Petrus 3:7.

Indu tji mu nouzeu morukupo rweṋu, eṋe amuyevari mamu sokukondja okutjindasana norusuvero. (1 Ovakorinte 13:4, 5) Embo raMukuru kari tunduuza ovandu okuhaṋika otjomuano wokuisapo omauzeu morukupo.​—Lesa 1 Ovakorinte 7:10-13.

Jehova u vanga kutja u rire omuṋingandu. Eye u ku pa omaronga omasembasemba ohunga nomuano wokukara nouṋingandu moumutanda woye. Eye u vanga kutja u mune ouwa okuza kounongo nondjiviro yovanene voye. (Ovakolose 3:20) Jehova wina u vanga kutja u rimunine omuini ondjoroka ndji za mokutjita imbi mbi tjata kOmuute woye nOmuna we.​—Lesa Omuzuvarise 11:9–12:1; Mateus 19:13-15; 21:15, 16.

Ove mo sokuungura nomasa kokutja u yenene okuyandja ovikurya, nomaturiro nozombanda kovanatje voye. (1 Timoteus 5:8) Posi yokutja, tji mo vanga kutja ovanatje voye ve rire ovaṋingandu, ove wina mo sokuvehonga okusuvera Mukuru nokurihongera ku ye. (Ovaefese 6:4) Omuano mbu u raisa orusuvero ku Mukuru mau yenene okuṱuna komutima womuatje woye tjinene. Omaronga ngu mo yandja tji ya zikamene kEmbo raMukuru, maye yenene okuṱuna omeripuriro womuatje woye momuano omuwa.​—Lesa Deuteronomium 6:4-7; Omiano 22:6.

Otjiṋa otjiwa kovanatje indu ove tji mo ve tunduuza nokuvetanga tji va tjiti oviṋa oviwa. Owo wina ve hepa okurongwa nokuvyurwa tji mave zunḓa. Omarongerisiro otja ingo ye ve tjevera kozongaro zomeritjindiro nḓu mape ya aze tjiti kutja ave ha rire ovaṋingandu. (Omiano 22:15) Posi yokutja, omavyuriro kaye sokuyandjwa nombeze poo noutwe.​—Lesa Ovakolose 3:21.

Ovahongonone vaJehova ve pitisa omambo omengi nge vatera ovanene novanatje. Omambo nga ya zikamena kOmbeibela.​—Lesa Epsalme 19:7, 11.