EHONGWA 7
Ouhona waMukuru otjikeṋa?
1. Ouhona waMukuru otjikeṋa?
Ovikeṋa mbi tjita kutja Jesus ma pwire okurira Ombara?—MARKUS 1:40-42.
Ouhona waMukuru ohoromende yomeyuru. Oyo mai pingene ozohoromende azehe zarwe nu mai tjiti kutja ombango yaMukuru i tjitwe meyuru na kombanda yehi. Ombuze ohunga nOuhona waMukuru ombuze ombwa, orondu moruyaveze rwopopezu owo mau yenenisa ozonḓero zovandu mbe zera okuhonaparerwa i ohoromende ombwa. Owo mau waneke ovandu avehe kombanda yehi.—Lesa Daniel 2:44; Mateus 6:9, 10; 24:14.
Ouhona ngamwa u hepa ombara. Jehova wa zika Omuna we Jesus Kristus kutja ma rire Ombara yOuhona We.—Lesa Omavandururiro 11:15.
Tarera OKavidio Ouhona waMukuru otjikeṋa?
2. Ongwaye Jesus tje ri ngwa pwa okurira Ombara?
Omuna waMukuru ongwa pwa okurira Ombara orondu eye u notjari nu wa suvera ousemba. (Mateus 11:28-30) Eye wina u nomasa wokuvatera ovandu mena rokutja ma honaparere ehi okuza keyuru. Tja za nokupendurwa movakoke, eye wa ronda keyuru na kaundjira kokunene kwaJehova. (Ovaheberi 10:12, 13) Kombunda Mukuru we mu pa omasa wokuuta okunana.—Lesa Daniel 7:13, 14.
3. Oowaṋi mbu mave kahonapara puna Jesus?
Otjimbumba tji tji isanewa ‘otjiwaṋa tjaNdjambi [“ovayapuke,” NW]’ matji kahonapara puna Jesus meyuru. (Daniel 7:27) Ovandu ovayapuke ovatenga mba toororwa va ri ovaapostele vaJesus ovaṱakame. Jehova okuza koruveze ndwo nga ku nai wa toorora ovarumendu novakazendu ovaṱakame okurira ovayapuke ve. Owo va pendurwa notutu twombepo tjimuna Jesus.—Lesa Johanes 14:1-3; 1 Ovakorinte 15:42-44.
Ovandu vengapi mbu mave i keyuru? Jesus we ve isana ‘okarupanda okaṱiṱi.’ (Lukas 12:32) Korusenina owo mave karira ovandu 144 000. Owo mave kahonaparera ehi puna Jesus.—Lesa Omavandururiro 14:1.
4. Pa tjitwa tjike indu Jesus tja uta okuhonapara?
Ouhona waMukuru wa uta okuhonapara mombura ndji 1914. * Omukambo omutenga Jesus mbwa toora indu tja rira Ombara, owokunakaurira Satan nozondemone ze kombanda yehi. Ihi tja pindikisa Satan tjinene na utu okueta ozombamisiro mouye. (Omavandururiro 12:7-10, 12) Okuza koruveze ndwo omauzeu wovandu ya ririra ko omengi. Ovita, nondjara, nomitjise nomanyinganyingiro wehi, avihe mbi orupa ‘rwotjiraisiro’ tjokutja Ouhona waMukuru moruveze rwatjimanga mau utu okuhonaparera ehi arihe.—Lesa Lukas 21:7, 10, 11, 31.
5. Ouhona waMukuru mau yenenisa tjike?
Okupitira motjiungura tjokuzuvarisa tji tji tjitwa mouye auhe, Ouhona waMukuru wa uta okuwanisa otjimbumba otjinene tjovandu mba za moviwaṋa avihe. Omangete wovandu overisusuparise ve riwisa kehi yOuhona waMukuru mbu honaparerwa po i Jesus. Ouhona mbwi mau ve yama indu tji mau yandeke ouye ourunde mbwi. Okutja ovandu avehe mbu mave vanga okumuna ouwa mOuhona waMukuru mave sokurihonga okukara nonḓuviro nokuriwisa kehi yaJesus.—Lesa Omavandururiro 7:9, 14, 16, 17.
Oure wozombura 1 000, Ouhona waMukuru mau yenenisa ondando Mukuru ndja ri na yo kovandu rutenga. Ehi arihe mari rire oparadisa. Nu korusenina Jesus a yarura otjihavero tjOuhona ku Ihe. (1 Ovakorinte 15:24-26) U nomundu ngu mo tjiwa ngu mo vanga okuraera ohunga nOuhona waMukuru?—Lesa Epsalme 37:10, 11, 29.
^ par. 6 Tji mo vanga okutjiwa ovingi ohunga nomuano Ombeibela mbu ya hunganeka ombura ndji 1914, tara pomukuma 215-218 wembo ndi Ombeibela mai yenene okutuhonga tjike?
