Omuute wetu onongo tjinene okukapita eṱe. Otja Tate omunarusuvero eye u rikendera eṱe. Oyo kaya ri ondando ye kutja tu rihongorere ozondjira zetu oveni. (Jeremia 10:23) Okutja otja okanatje tji ke hepa okupewa omuhunga i ovanene va ko, eṱe atuhe wina tu hepa okuhongorerwa i Mukuru. (Jesaja 48:17, 18) Mukuru u tu pa omirari vyOmbeibela okutuhongorera.​—Lesa 2 Timoteus 3:16.

Omatwako nomirari vyaJehova vi tu honga omuano omusemba wokuhupa nai, nu vi tu raisira kutja matu yenene vi okumuna omuinyo waaruhe moruyaveze. Mena rokutja Mukuru ongwe tu mema, okutja ohepero ku eṱe okuṱakamisa omirari vye.​—Lesa Epsalme 19:7, 11; Omavandururiro 4:11.

Omirari vyOmbeibela vi tjama nouatjiri mbu ri mOmbeibela nu mbu tu raisira kutja Mukuru u vanga kutja tu tjite vi mozongaro pekepeke. Nungwari, ozoveta ze tjaera oviṋa ongahukiro. (Deuteronomium 22:8) Okutja matu sokuungurisa ounongo kutja tu tji we nawa omuano wokuṱakamisa omirari vyOmbeibela mozongaro tjiva. (Omiano 2:10-12) Okutara kotjihorera, Ombeibela i honga kutja omuinyo otjiyandjewa okuza ku Mukuru. Omurari mbwo mau yenene okutuhongorera moviungura, ponganda, na tji tu ri mouyenda. Okutjiwa kutja omuinyo otjiyandjewa okuza ku Mukuru ku tu vatera kutja atu ha twa omiinyo vyetu oveni poo vyovandu varwe moumba.​—Lesa Oviungura 17:28.

Jesus wa hungira ohunga nomirari vivari vyOmbeibela ovinanḓengu  tjinene. Omurari omutenga u raisa ondando yehupo rovandu, okutjiwa Mukuru, okumusuvera, nokumukarera nouṱakame. Omurari omutenga mbwi matu sokuripurirako mozondando zetu azehe. (Omiano 3:6) Imba mbe ṱakamisa omurari mbwi mave kara noupanga ouwa kuna Mukuru nouṋingandu watjiri nu mave munu omuinyo waaruhe.​—Lesa Mateus 22:36-38.

Omurari omutjavari mau yenene okutuvatera okukara noupanga ouwa ku novakwetu. (1 Ovakorinte 13:4-7) Okuṱakamisa omurari omutjavari mbwi ku kamburiramo okuhorera omuano Mukuru mbwe tjinda ovandu.​—Lesa Mateus 7:12; 22:39, 40.

Omirari vyOmbeibela vi honga ovandu kutja ve kare norusuvero meṱunḓu. (Ovakolose 3:12-14) Embo raMukuru wina ri vatera omaṱunḓu mokuvehonga omurari warwe mbu yenena okuvehongorera kutja ve karasane nouṱakame morukupo.​—Lesa Genesis 2:24.

Tji twa ṱakamisa omirari vyOmbeibela, ovyo vi tu vatera kutja tu kare nehupo ewa nu vi tu yama kozombameno. Okutara kotjihorera, ovayandjaviungura tjinene ve nonyuṋe movaungure ovaṱakame nu mbe ungura noupatje otja Ombeibela tji i honga. (Omiano 10:4, 26; Titus 2:9, 10) Embo raMukuru wina ri tu honga okukowa moviṋa mbi mbi ri ovinahepero nu tu vare oupanga wetu na Mukuru otja mbu ri ounanḓengu okukapita ovimariva nomauini.​—Lesa Mateus 6:24, 25, 33; 1 Timoteus 6:8-10.

Tji twa hupu otja komirari vyOmbeibela matu rire ovaveruke. (Omiano 14:30; 22:24, 25) Okutara kotjihorera, tji twa ṱakamisa omatwako waMukuru ohunga nokupurukisiwa i omeva wamururu, matji tu yama komitjise na komaumba. (Omiano 23:20) Jehova ka tjaere ovandu okunwa otjikariha, nungwari u tjaera okunwa okukapita etota. (Epsalme 104:15; 1 Ovakorinte 6:10) Omirari vyaMukuru vi tu vatera orondu ovyo kavi tu hongo okutjevera ovitjitwa vyetu porwavyo uriri, nungwari ovyo wina vi yama ouripura wetu. (Epsalme 119:97-100) Posi yokutja Ovakriste vatjiri kave puratene komirari vyaMukuru mena rombwiro yawo oveni uriri. Nungwari owo ve tjita nao mena rokuvanga okuyozika Jehova.​—Lesa Mateus 5:14-16.