Jehova a Mukuru ongwa kupisa ovandu ovatenga. Ombeibela i tu raera kutja eye wa ungura omukazendu omutenga “ne mu eta ku” Adam. Adam wa ri nenyando tjinene nga tja tja: “Ingwi eṱupa romaṱupa wandje, nonyama yonyama yandje!” (Genesis 2:22, 23) Jehova ngamba u vanga kutja ovandu mba kupasana ve kare nouṋingandu morukupo rwawo.

Indu tji wa kupu poo tji wa kupwa, mape ya omunu kutja oviṋa avihe mavi rire oviwa. Nungwari ouatjiri owombwi wokutja, nandarire omurumendu nomukazendu mba suverasana tjiri, mave kara nomauzeu. (1 Ovakorinte 7:28) Mokambo nga, ove mo kamuna omirari vyOmbeibela mbi mavi ku vatere kutja u kare norukupo neṱunḓu eṋingandu indu tji we vi ṱakamisa.—Epsalme 19:8-11.

OMBEIBELA MAI TJA: Omurumendu eye otjiuru tjeṱunḓu.—Ovaefese 5:23.

Indu tji u ri omurumendu ngwa kupa, Jehova u undjira ko kutja ove u ṱakamise omukazendu woye norusuvero. (1 Petrus 3:7) Eye we mu uta kutja ma rire omukuvatere nu u vanga kutja u tjinde omukazendu woye nondengero norusuvero. (Genesis 2:18) Ove mo sokusuvera omukazendu woye tjinene nga tji mo zeri okutwa ozonḓero ze komeho wa inḓa ozoye.—Ovaefese 5:25-29.

Indu tji u ri omukazendu ngwa kupwa, Jehova u undjira ko kutja u tenge omurumendu woye tjinene nu u mu vatere kutja ma yenenise otjiungura tje. (1 Ovakorinte 11:3; Ovaefese 5:33) Yandja oruvara kozondyero ze nu u ungure kuna ye nomutima woye auhe. (Ovakolose 3:18) Indu tji wa tjiti nao, mo rire omukazendu omuwa komurungu we na ku Jehova.—1 Petrus 3:1-6.

OVIṊA MBI MO YENENE OKUTJITA:

• Pura omukweṋu ngu mwa kupasana kutja ove mo yenene vi okurira omurumendu poo omukazendu omusemba ku ye. Puratena nombango aihe, nu u tjite avihe mbi mo yenene

• Kara nomuretima. Mape kambura oruveze ku eṋe amuyevari okurihonga kutja mamu sokutjita vi kutja mu kare nouṋingandu

OMBEIBELA MAI TJA: Ove mo sokuyandja ombango kozonḓero zomukweṋu ngu mwa kupasana. (Ovafilipi 2:3, 4) Tjinda omukweṋu otjotjiṋa otjihuze nu tjiwa kutja Jehova u undjira ko kutja ovakarere ve, ve rire ‘ozongozu kovandu avehe.’ (2 Timoteus 2:24) “Omambo nge hi nomeripura ye tuvakaṋa tjimuna engaruvyo; nungwari omambo nge hungirwa mozondunge ye verukisa.” Okutja toorora omambo woye nongengezero. (Omiano 12:18) Ombepo yaJehova mai ku vatere kutja u hungire momuano omuwa nu worusuvero.—Ovagalate 5:22, 23; Ovakolose 4:6.

OVIṊA MBI MO YENENE OKUTJITA:

• Kumba ku Jehova kutja me ku vatere okukara nongaro ndja poro nu u rire omupaturuke ngunda amu hiya uta okuhungirira komauzeu weṋu nomukweṋu ngu mwa kupasana

• Ripura nawa ohunga na imbi mbi mo kahungira nokutja mo vi hungire momuano uṋe

OMBEIBELA MAI TJA: Tji mwa kupasana, eṋe mu rira “onyama imwe.” (Mateus 19:5) Posi yokutja, eṋe ngunda oweṋe ovandu vevari pekepeke nu mape ya amu kara noumune mbwa panguka. Okutja mamu sokurihonga okukara nomeripura yemwe noumune umwe. (Ovafilipi 2:2) Okukara nouripura umwe otjiṋa otjinanḓengu indu tji mamu toora ozondando. Ombeibela mai tja: “Tya omeripuriro woye puna ovandu.” (Omiano 20:18) Yandjereye kutja omirari vyOmbeibela vi mu hongorere indu tji mamu toora ozondando ozonanḓengu.—Omiano 8:32, 33.

OVIṊA MBI MO YENENE OKUTJITA:

• O raere omukweṋu ohunga noviṋa mbi ma hepa okutjiwa uriri, nungwari wina mu raera ohunga noumune woye

• Hungira ku nomukweṋu ngunda au hiya itavera okutjita otjiṋa kuna ovandu varwe