Jehova wa yandja ehi kovandu. Oro omaturiro wetu. Pu mape hee kutja Mukuru ka memene ovandu ovatenga Adam na Eva kutja ve ture meyuru, eye tjinga a mema ovaengeli rukuru kutja arire mba kara meyuru. (Job 38:4, 7) Mukuru wa twa omurumendu omutenga moparadisa ombwa ndjaai isanewa otjikunino tjaEden. (Genesis 2:15-17) Jehova wa kwizikira Adam novanatje mbu maa kara na wo moruyaveze omuinyo waaruhe kombanda yehi.​—Lesa Epsalme 37:29; 115:16.

Kotjirutenga, otjikunino tjaEden uriri otji tja ri oparadisa. Ovandu vevari ovatenga aave sokuurisa ehi norukwato rwawo. Okutja oruveze tjaaru kayenda owo aave sokuurisa ehi arihe nokuritanaurira moparadisa. (Genesis 1:28) Ehi kamaari yandekwa ko. Oro mari rire omaturiro wovandu nga ko nga aruhe.​—Lesa Epsalme 104:5.

Tarera OKavidio Omena ratjike Mukuru tja mema ehi?

Adam na Eva kava ri nonḓuviro ku Mukuru, okutja Jehova otje ve ramba motjikunino. Oparadisa otji ya pandjara nu kape nomundu ngwa yenena okuikotora rukwao. Okuza koruveze ndwo ouye u honaparerwa po i ovandu ovarunde.​—Lesa Genesis 3:23, 24.

Jehova wa urwa okuyenenisa ondando ye ohunga novandu po? Kako katjiperi! Eye omunamasaaehe. Kape notjiṋa tji tje mu ura. (Jesaja 45:18) Eye ma tjiti kutja ovandu ve yaruke kongaro eye ndje ve memena.​—Lesa Epsalme 37:11, 34.

Oparadisa mai kotoka kombanda yehi indu Jesus tji ma honapara otjOmbara yaMukuru. Movita mbi isanewa Armagedon, Jesus ma hongorere ovaengeli vaMukuru na yandeke ovandu avehe mbe pirukira Mukuru. Okuzambo Jesus ma pandeke  Satan oure wozombura 1 000. Ovandu mbe karera Mukuru mave tuurunga ovita mbi orondu Jesus me ve hongorere nokuvetjevera. Owo mave kayorokera omuinyo waaruhe mOparadisa kombanda yehi.​—Lesa Omavandururiro 20:1-3; 21:3, 4.

Mukuru ma yandisa ruṋe ouvi mbu tjitwa kombanda yehi? Jesus wa yandja “otjiraisiro” tjokutja omaandero wouye ye ri popezu. Ozongaro mouye ndino ze etera ovandu oumba nu ze raisa kutja eṱe nai tu hupa moruveze ‘rwomaandero wouye.’​—Lesa Mateus 24:3, 7-14, 21, 22.

Oruveze ndwi Jesus tji ma honaparere ouye okuza meyuru oure wozombura 1 000, eye ma yandisa omauzeu aehe. (Jesaja 9:6, 7; 11:9) Jesus ke nakuhonapara otjOmbara uriri, nungwari ma rire Omupristeri Otjiuru nu ma isire omauvi waimba mba suvera Mukuru. Okutja okupitira mu Jesus, Mukuru ma isapo omitjise, noukurundu nonḓiro.​—Lesa Jesaja 25:8; 33:24.

Ovandu mbe nonḓuviro ku Mukuru mave kahupa mOparadisa. (1 Johanes 2:17) Jesus wa hinda ovemukongorere kutja ve pahe ovandu overisusuparise nu ve ve honge omuano wokukara noupanga ouwa kuna Mukuru. Jehova ndino u rongerisa omangete wovandu kutja ve kahupe mOparadisa kombanda yehi moruyaveze. (Sefanja 2:3) POmatuwo wOmerikotameneno wOvahongonone vaJehova, ovandu ve rihonga okurira ovarumendu nooihe ovasemba nokurira ovakazendu nooina ovasemba. Ovanatje novanene ve rikotamena pamwe nu ve rihonga omuano ombuze ombwa mbu i yenena okuvevatera.​—Lesa Mika 4:1-4.