matti ke mutabik khushkhabri 22:1-46
22 yeeshu ne ek baar fir unhein misalein dekar kaha,
2 “swarg ka raaj ek aise raja ki tarah hai, jisne apne bete ki shaadi par daavat rakhi.+
3 usne apne daason ko bhejkar un logon ko bulaya jinhein daavat ka nyauta diya gaya tha. magar woh nahin aana chahte the.+
4 raja ne fir se kuch daason ko yah kehkar bheja, ‘jinhein nyauta diya gaya hai unse jaakaar kaho, “dekho! main khaana taiyar kar chuka hoon, mere bail aur mote-taaze jaanvar halal kiye jaa chuke hain aur sabkuch taiyar hai. shaadi ki daavat mein aa jaao.”’
5 magar unhonne zara bhi parvah nahin ki aur apne-apne raaste chal diye, koi apne khet ki taraf, to koi apna kaarobar karne.+
6 aur baakiyon ne uske daason ko pakad liya, unke saath bura salook kiya aur unhein maar daala.
7 tab raja ka gussa bhadak utha aur usne apni senayen bhejkar un hatyaron ko maar daala aur unke shehar ko jalakar raakh kar diya.+
8 iske baad, usne apne daason se kaha, ‘shaadi ki daavat to taiyar hai, magar jinhein bulaya gaya tha woh iske laayak nahin the.+
9 isliye shehar ki badi-badi sadkon par jaao aur vahaan tumhein jo bhi mile, use shaadi ki daavat ke liye bula laao.’+
10 tab woh daas sadkon par gaye aur unhein jitne bhi log mile, chahe achhe ya bure, woh sabko le aaye. aur woh bhavan jahaan shaadi ki rasmein honi thi, daavat mein aaye* logon se bhar gaya.
11 jab raja mehmanon ka muayna karne andar aaya, to uski nazar ek aise aadmi par padi jisne shaadi ki poshak nahin pehni thi.
12 tab usne usse kaha, ‘are bhai, tu shaadi ki poshak pehne bina yahaan andar kaise aa gaya?’ woh koi javab na de saka.
13 tab raja ne apne sevkon se kaha, ‘iske haath-pair baandhkar ise baahar andhere mein feink do, jahaan yah royega aur daant peesega.’
14 isliye ki nyauta to bahot logon ko mila hai, magar chune gaye thode hain.”
15 iske baad fareesi chale gaye aur unhonne aapas mein salah ki ki kis tarah yeeshu ko usi ki baaton mein fansayen.+
16 isliye unhonne apne chelon ko herodes ke gut ke logon ke saath uske paas bheja.+ unhonne yeeshu se kaha, “guru, hum jaante hain ki tu sachcha hai aur sachchai se parmeshvar ki raah sikhata hai. tu insanon ko khush karne ki koshish nahin karta, kyonki tu kisi ki soorat dekhkar baat nahin karta.
17 isliye hamein bata, tu kya sochta hai, samrat* ko kar dena sahi hai ya nahin?”
18 magar woh samajh gaya ki unke irade bure hain aur usne kaha, “are kaptiyo, tum meri pareeksha kyon lete ho?
19 mujhe kar ka sikka dikhao.” tab woh uske paas ek deenar* laaye.
20 yeeshu ne unse poochha, “is par kiski soorat aur kiske naam ki chhaap hai?”
21 unhonne kaha, “samrat ki.” tab usne kaha, “isliye jo samrat ka hai woh samrat ko chukao, magar jo parmeshvar ka hai woh parmeshvar ko.”+
22 yah sunkar woh dang reh gaye aur use chhodkar chale gaye.
23 usi din sadooki uske paas aaye, jo kehte hain ki mare huon ke fir se zinda hone ki shiksha sach nahin hai.+ unhonne usse poochha,+
24 “guru, moosa ne kaha tha, ‘agar koi aadmi beaulad mar jaaye, to uska bhaai uski patni se shaadi kare aur apne mare huye bhaai ke liye aulad paida kare.’+
25 hamare yahaan saat bhaai the. pehale ne shaadi ki aur beaulad mar gaya. aur apne bhaai ke liye apni patni chhod gaya.
26 aisa hi doosre aur teesre ke saath hua, yahaan tak ki saaton ke saath yahi hua.
27 aakhir mein woh aurat bhi mar gayi.
28 to fir jab mare huye zinda kiye jaayenge, tab woh un saaton mein se kiski patni hogi? kyonki saaton use apni patni bana chuke the.”
29 yeeshu ne unse kaha, “tum badi galatfhami mein ho kyonki tum na to shastra ko jaante ho, na hi parmeshvar ki shakti ko.+
30 kyonki jab mare huye zinda kiye jaayenge to unmein se na to koi aadmi shaadi karega na koi aurat, magar woh swargdooton ki tarah honge.+
31 jahaan tak mare huon ke zinda hone ki baat hai, kya tumne woh baat nahin padhi jo parmeshvar ne tumse kahi thi,
32 ‘main abraham ka parmeshvar, ishaak ka parmeshvar aur yakub ka parmeshvar hoon’?+ woh mare huon ka nahin balki jeeviton ka parmeshvar hai.”+
33 yah sunkar bheed uski shiksha se hairan reh gayi.+
34 jab fareesiyon ne suna ki usne sadookiyon ka munh band kar diya hai, to woh jhund banakar uske paas aaye.
35 unmein se ek ne, jo kaanoon ka achha jaankar tha, yeeshu ko parakhne ke liye poochha,
36 “guru, kaanoon mein sabse badi aagya kaun-si hai?”+
37 usne kaha, “‘tum apne parmeshvar yahova* se apne poore dil, apni poori jaan* aur apne poore dimag se pyar karna.’+
38 yahi sabse badi aur pehali aagya hai.
39 aur isi ki tarah yah doosri hai, ‘tum apne padosi se vaise hi pyar karna jaise tum khud se karte ho.’+
40 inhin do aagyaon par poora kaanoon aur bhavishyavaktaon ki shikshayen aadharit hain.”+
41 jab fareesi vahin ikattha the, to yeeshu ne unse poochha,+
42 “tum maseeh ke baare mein kya sochte ho? woh kiska vanshaj hai?” unhonne kaha, “daavid ka.”+
43 usne kaha, “to fir, kyon daavid pavitra shakti se udhaare jaane par+ use prabhu pukarta hai aur kehta hai,
44 ‘yahova* ne mere prabhu se kaha, “tu tab tak mere daayen haath baith, jab tak ki main tere dushmanon ko tere pairon tale na kar doon”’?+
45 isliye agar daavid use prabhu kehkar pukarta hai, to woh uska vanshaj kaise hua?”+
46 javab mein koi usse ek shabd bhi na kah saka aur us din ke baad kisi ne usse aur saval poochhne ki himmat nahin ki.
