matti ke mutabik khushkhabri 20:1-34
20 isliye ki swarg ka raaj us maalik jaisa hai, jiska angooron ka baag tha. woh tadke subah baahar nikala ki apne baag mein dihadi par kaam karnevale mazdoor lagaye.+
2 woh mazdooron ko din-bhar ki mazdoori ke liye ek deenar* dene ko raazee hua aur usne unhein apne baag mein bhej diya.
3 fir woh teesre ghante* ke kareeb baahar nikala aur usne dekha ki baazar ke chauk mein kuch mazdoor khade hain jinhein koi kaam nahin mila.
4 baag ke maalik ne unse kaha, ‘tum bhi mere baag mein jaao aur jo theek hoga, woh main tumhein doonga.’
5 tab woh baag mein gaye. woh fir chhathe* aur nauvein ghante* ke kareeb baahar nikala aur usne aisa hi kiya.
6 aakhir mein, woh 11vein ghante* ke kareeb baahar nikala aur kai aur mazdooron ko khade dekha. tab baag ke maalik ne unse poochha, ‘tum din-bhar yahaan bekar kyon khade rahe?’
7 unhonne kaha, ‘hamein kisi ne kaam nahin diya.’ tab usne kaha, ‘tum bhi mere baag mein jaao.’
8 jab shaam hui, to baag ke maalik ne kaam ki dekhrekh karnevale aadmi se kaha, ‘mazdooron ko bula aur unki mazdoori de.+ jo aakhir mein aaye the unse shuroo karte huye, sabse pehale aaye mazdooron tak sabko de.’
9 jab 11vein ghante mein kaam par lagnevale aadmi aaye, to unmein se harek ko ek deenar* mila.
10 jab sabse pehale aanevalon ki baari aayi, to unhonne socha ki unhein zyada mazdoori milegi. magar unhein bhi ek deenar* diya gaya.
11 ek deenar milne par woh us maalik par kudkudane lage,
12 ‘ye jo aakhir mein aaye the, inhonne bas ek hi ghanta kaam kiya, fir bhi toone unhein hamare barbar kar diya, jabki hamne saara din mehnat ki aur tapti dhoop sahi!’
13 magar maalik ne unmein se ek ko javab diya, ‘dekh bhai, main tere saath koi naainsafi nahin kar raha. kya tu mere yahaan ek deenar* par kaam karne ke liye raazee nahin hua tha?+
14 isliye jo tera hai woh le aur chala jaa. jitna mainne tujhe diya hai, utna hi main aakhir mein aanevale is aadmi ko dena chahta hoon.
15 kya mujhe adhikar nahin ki apne paise ke saath jo chahe woh karoon? ya mainne jo bhalai* ki hai use dekhkar tujhe jalan ho rahi hai?’*+
16 is tarah, jo aakhiri hain woh pehale honge aur jo pehale hain woh aakhiri.”+
17 jab woh sab yarooshalem jaa rahe the, to raaste mein yeeshu ne apne 12 chelon ko alag le jaakaar unse kaha,+
18 “dekho! hum yarooshalem jaa rahe hain aur insan ka beta pradhan yaajkon aur shaastriyon ke havale kiya jaayega. woh use maut ki saza sunayenge+
19 aur gair-yahoodiyon ke havale kar deinge ki woh uska mazak udayen, use kode lagayen aur kaath par latkakar maar daalein.+ fir teesre din use zinda kar diya jaayega.”+
20 iske baad, jabdi ki patni apne do beton+ ke saath yeeshu ke paas aayi aur use jhukkar pranam* kiya. woh usse kuch maangna chahti thi.+
21 yeeshu ne usse kaha, “tu kya chahti hai?” woh boli, “mujhse vaada kar ki tere raaj mein, mere ye donon bete, ek tere daayen aur doosra tere baayen baithe.”+
22 yeeshu ne kaha, “tum nahin jaante ki tum kya maang rahe ho. kya tum woh pyala pi sakte ho, jo main peenevala hoon?”+ unhonne kaha, “hum pi sakte hain.”
23 yeeshu ne unse kaha, “tum mera pyala zaroor peeoge,+ magar mere daayin ya baayin taraf baithne ki ijazat dene ka adhikar mere paas nahin. ye jagah unke liye hain, jinke liye mere pita ne inhein taiyar kiya hai.”+
24 jab baaki das ne is baare mein suna, to unhein donon bhaaiyon par bahot gussa aaya.+
25 magar yeeshu ne chelon ko apne paas bulakar kaha, “tum jaante ho ki duniya ke adhikari logon par hukm chalate hain aur unke bade-bade log un par adhikar jatate hain.+
26 magar tumhare beech aisa nahin hona chahiye,+ balki tummein jo bada banna chahta hai, use tumhara sevak hona chahiye+
27 aur jo koi tummein pehala hona chahta hai, use tumhara daas hona chahiye.+
28 jaise insan ka beta bhi seva karvane nahin, balki seva karne aaya hai+ aur isliye aaya hai ki bahoton ki firauti ke liye apni jaan badle mein de.”+
29 jab woh yareeho se baahar jaa rahe the, tab ek badi bheed yeeshu ke peechhe aane lagi.
30 aur dekho! do andhe sadak ke kinare baithe the. jab unhonne suna ki yeeshu vahaan se guzar raha hai to woh zor-zor se pukarne lage, “hey prabhu, daavid ke vanshaj, hum par daya kar!”+
31 magar bheed ne unhein daanta ki woh chup ho jaayen. lekin woh aur zor se chillane lage, “hey prabhu, daavid ke vanshaj, hum par daya kar!”
32 tab yeeshu ruk gaya aur usne unhein bulakar kaha, “tum kya chahte ho, main tumhare liye kya karoon?”
33 unhonne kaha, “prabhu, hamari aankhein theek ho jaayen.”
34 yah dekhkar yeeshu tadap utha aur usne unki aankhon ko chhua.+ usi vakt unki aankhon ki raushni laut aayi aur woh uske peechhe ho liye.
kai footnote
^ yaani subah kareeb 9 baje.
^ yaani dopahar kareeb 12 baje.
^ yaani dopahar kareeb 3 baje.
^ yaani shaam kareeb 5 baje.
^ ya “dariyadili.”
^ shaa., “teri aankh dusht hai.”
^ ya “dandvat.”
