As boas noticias segundo Mateo 2:1-23
2 Xesús naceu en Belén de Xudea nos días do rei Herodes*. Resulta que chegaron a Xerusalén uns astrólogos* que viñan de Oriente,
2 e dixeron: “Onde está o rei dos xudeus que acaba de nacer? É que vimos a súa estrela cando estabamos en Oriente e viñemos para mostrarlle o noso respecto*”.
3 Ó escoitar isto, o rei Herodes colleu medo e tamén toda a xente de Xerusalén.
4 O rei xuntou a tódolos sacerdotes principais* e os escribas* do pobo, e preguntoulles onde tiña que nacer o Cristo*.
5 Eles respondéronlle: “En Belén de Xudea, porque isto foi o que se escribiu mediante o profeta:
6 ‘E ti, Belén da terra de Xudá, de ningunha maneira es a cidade máis insignificante entre os gobernantes de Xudá, porque de ti sairá un gobernante que pastoreará* o meu pobo Israel’”.
7 Entón, Herodes mandou chamar os astrólogos en segredo para saber exactamente en que momento aparecera a estrela.
8 Despois enviounos a Belén, e díxolles: “Ide e buscade por todas partes onde está o neno. Cando o encontredes, volvede e dicídemo para que eu tamén poida ir e mostrarlle o meu respecto”.
9 Despois de escoitar o que dixo o rei, seguiron o seu camiño. Entón, a estrela que viran cando estaban en Oriente foinos guiando ata que parou enriba de onde estaba o neno.
10 Ó ver que a estrela se detiña, alegráronse moitísimo.
11 Cando entraron na casa, viron o neno coa súa nai María e inclináronse diante del para mostrarlle respecto. Tamén abriron os seus cofres e regaláronlle ouro, olíbano* e mirra*.
12 Despois, marcharon para o seu país por outro camiño porque Deus lles advertira nun soño que non volvesen onda Herodes.
13 Cando xa marcharan, o anxo de Xehová* aparecéuselle a Xosé nun soño e díxolle: “Levántate, colle o neno e a súa nai e escapa para Exipto. Queda alí ata que te avise, porque Herodes vai buscar o neno para matalo”.
14 Así que Xosé levantouse esa noite, colleu o neno e a nai do neno, e marchou para Exipto.
15 E quedou alí ata que morreu Herodes. Así cumpriuse o que dixera Xehová* mediante o seu profeta: “Chamei o meu fillo para que saíse de Exipto”.
16 Cando Herodes se deu conta de que os astrólogos o enganaran, púxose furioso. E mandou matar a tódolos nenos de dous anos ou menos que había en Belén e en tódalas rexións que había arredor, porque esa era a idade que calculara polo que lle dixeran os astrólogos.
17 Así cumpriuse o que se dixera mediante o profeta Xeremías:
18 “Escoitouse a voz de alguén en Ramá que choraba e se lamentaba moito. Era Raquel chorando polos seus fillos. E non quería que a consolasen porque eles xa non están”.
19 Cando Herodes morreu, o anxo de Xehová* aparecéuselle nun soño a Xosé, que estaba en Exipto,
20 e díxolle: “Levántate, colle o neno e a súa nai e volve á terra de Israel, porque xa morreron os que querían matar o neno*”.
21 Así que se levantou, colleu o neno e a nai do neno, e volveu á terra de Israel.
22 Pero, ó saber que Arquelao estaba gobernando en Xudea en vez do seu pai Herodes, deulle medo ir alí. Ademais, como Deus lle dera unha advertencia nun soño, marchou para a rexión de Galilea.
23 E quedou a vivir nunha cidade chamada Nazaret. Así cumpriuse o que se dixera mediante os profetas: “Chamaráselle Nazareno*”.