Jehova a Gud stovnaði fyrsta hjúnabandið. Bíblian sigur, at hann skapti ta fyrstu kvinnuna og „leiddi hana til Ádam“. Ádam varð so glaður, at hann segði: „Hesa ferð er tað bein av mínum beinum og hold av mínum holdi!“ (1 Mósebók 2:22, 23) Jehova vil enn, at hjún skulu vera lukkulig.

Tá ið tit verða gift, hugsa tit kanska, at alt verður frálíkt. Men í roynd og veru fáa øll hjún trupulleikar, sjálvt um maður og kona veruliga elska hvør annan. (1 Korintbræv 7:28) Fylgja tit bíbilsku meginreglunum í hesum heftinum, kunnu tit fáa eitt gott hjúnalag og eina lukkuliga familju. — Sálmur 19:9-12.

BÍBLIAN SIGUR: Maðurin er høvur familjunnar. — Efesusbrævið 5:23.

Ert tú ein giftur maður, væntar Jehova, at tú hevur umsorgan fyri konu tíni. (1 Pætur 3:7) Hann gjørdi hana sum eina hjálp, ið hóskar til tín, og hann vil, at tú skalt æra og elska hana. (1 Mósebók 2:18) Tú mást vera so góður við konu tína, at tú ert fúsur at lata hennara tørv koma fram um tín egna. — Efesusbrævið 5:25-29.

Ert tú ein gift kona, væntar Jehova, at tú hevur djúpa virðing fyri manni tínum og hjálpir honum at fremja sín leiklut. (1 Korintbræv 11:3; Efesusbrævið 5:33) Stuðla hansara avgerðum og samstarva heilhugað við hann. (Kolossebrævið 3:18) Tá ið tú gert tað, verður tú vøkur bæði í eygum hansara og í eygum Jehova. — 1 Pætur 3:1-6.

ROYN HETTA:

• Spyr hjúnafelaga tín, hvat tú kanst gera fyri at blíva ein betri maður ella kona. Lurta væl, og ger títt besta fyri at fylgja uppskotunum

• Ver tolin. Tað fer at taka tíð hjá tykkum báðum at læra, hvussu tit kunnu gleða hvør annan

BÍBLIAN SIGUR: Tú mást hava áhugamálini hjá hjúnafelaganum í huga. (Filippibrævið 2:3, 4) Far væl við honum ella henni, og minst til, at Jehova væntar, at hansara tænarar eru ’mildir við øll’. (2 Timoteus 2:24) „Mong tala orð, ið stinga sum svørð, men tunga hinna vísu er heilsubót,“ so vanda tær um orðini. (Orðtøkini 12:18) Andi Jehova kann hjálpa tær at tosa við mildleika og kærleika. — Galatiabrævið 5:22, 23; Kolossebrævið 4:6.

ROYN HETTA:

• Bið Jehova hjálpa tær at vera róligur og hava eitt opið sinni, áðrenn tú tosar við hjúnafelaga tín um álvarslig mál

• Hugsa um, hvat tú ætlar tær at siga, og hvussu tú skalt siga tað

BÍBLIAN SIGUR: Tá ið tit giftast, verða tú og hjúnafelagin „eitt hold“. (Matteus 19:5) Men tit eru framvegis tveir persónar, sum helst hava ymiskar meiningar. Tí mugu tit læra at vera sameind í tonkum og kenslum. (Filippibrævið 2:2) Einleiki hevur alstóran týdning, tá ið avgerðir skulu takast. Í Bíbliuni stendur: „Ætlanir fáa framgongd við ráðlegging.“ (Orðtøkini 20:18) Latið bíbilskar meginreglur hjálpa tykkum, tá ið tit skulu taka týðandi avgerðir. — Orðtøkini 8:32, 33.

ROYN HETTA:

• Tosa við hjúnafelagan um tínar kenslur, og ikki bara um gerandislig mál

• Tosa við hjúnafelagan, áðrenn tú tekur týðandi avgerðir