Ja. Meðan Jesus var á jørðini, uppfylti hann nógvar profetiir um Messias, sum skuldi verða sendur „heiminum til Frelsara“. (Dániel 9:25; 1. Jóhannesarbræv 4:14) Og eftir deyða sín uppfylti Jesus framvegis messiasprofetiir. – Sálmur 110:1; Ápostlasøgan 2:34-36.

•  Hvat merkir „Messias“?

•  Kundi meira enn ein persónur uppfylla messiasprofetiirnar?

•  Kann Messias koma í framtíðini?

•  Hvussu nógvar profetiir um Messias eru í Bíbliuni?

•  Nakrar messiasprofetiir, sum gingu út við Jesusi

 Hebraiska orðið Masjiʹach (Messias) og tað samsvarandi grikska orðið Kristosʹ (Kristus) merkja bæði „hin salvaði“. „Jesus Kristus“ merkir sostatt „Jesus hin salvaði“, ella „Jesus Messias“.

 Tá ið ein persónur á Bíbliunnar døgum fekk eitt serligt embæti, varð hann ofta salvaður við olju, sum varð stoytt út yvir høvdið á honum. (3. Mósebók 8:12; 1. Sámuelsbók 16:13) Gud útnevndi Jesus til Messias og gav honum harvið stóran myndugleika. (Ápostlasøgan 2:36) Tó salvaði Gud ikki Jesus við olju, men við heilagum anda. – Matteus 3:16.

 Nei. Júst sum eitt fingramerki bert eyðkennir ein persón, so vísa bíbliuprofetiirnar bert til ein Messias, ella Kristus. Men Bíblian kemur tó við hesi ávaringini: „Lygikristar og lygiprofetar skulu stíga fram og gera stór tekin og undur, so eisini hini útvaldu skuldu verðið villleidd – hevði tað verið møguligt.“ – Matteus 24:24.

 Nei. Bíblian boðaði frá, at Messias skuldi vera eftirkomari hjá Dávidi kongi í Ísrael. (Sálmur 89:4, 5) Men jødisku ættartalvurnar, sum vísa aftur til Dávid, eru ikki til longur. Tær vórðu helst oyðilagdar, tá ið rómverjar hertóku Jerusalem í ár 70 e.o.t. a Síðani tá hevur eingin verið førur fyri at prógva, at hann var av kongaætt Dávids. Men á Jesusar døgum vóru ættartalvurnar til, og tí kundi eingin, heldur ikki fíggindar Jesusar, seta spurnartekn við, um hann hevði rætt, tá ið hann segði, at hann var av ætt Dávids. – Matteus 22:41-46.

 Tað ber ikki til at siga nágreiniliga, hvussu nógvar profetiir eru um Messias. Til dømis kann tað vera ymiskt, hvussu profetiirnar verða taldar, eisini í tekstabrotum, sum heilt greitt snúgva seg um Messias. Esaias 53:2-7 nevnir til dømis fleiri profetiskar smálutir um Messias. Onkur metir kanska alt brotið sum eina profeti, meðan onnur meta hvønn einstakan smálut í brotinum sum eina profeti fyri seg.