ODUAVATA kei na dua vei rau na itukutuku qori? E levu era vakacegui ra qai taleitaka na vosa i Saula mai Tarisu, e kilai tale ga me yapositolo o Paula. (Cakacaka 17:26, 27) Era tu ena iVolatabu eso tale na vosa ni veivakadeitaki va qori. Kena ivakaraitaki, e masulaka o Jisu na veivakadeitaki nira na rawa ni kila na nona imuri na Kalou, me vakalougatataki ira.—Joni 17:3.

Ia e sega ni va qori na nodra rai eso na vuku me vakataki Philo. Era kaya nida na sega ni kila rawa na Kalou, ni sa bau dredre sara ga me kilai. E dina qori?

E tukuna vakadodonu na iVolatabu ni tiko eso na ka me baleta na Kalou e dau dredre meda kila. Kena ivakaraitaki, na dede ni nona bula na Dauveibuli, nona vuku kei na titobu ni nona kila e sega ni vakamacalataki rawa. E dredre me kilai na veika qori, ia ena sega ni vakalatilati ena noda kilai koya. Na noda dau vakasamataka vakatitobu na veika qori eda na “toro voleka [kina] vua na Kalou.” (Jemesa 4:8) Meda dikeva mada eso na ivakaraitaki ena dredre kina noda kila na veika me baleta na Kalou, oti da qai raica na kena ena vakarawarawataka noda kilai koya.

NA NONA BULA TAWAMUDU: Eda vulica ena iVolatabu ni Kalou e bula “mai na gauna tawamudu ina gauna tawamudu.” (Same 90:2) Matata e ke, ni sega nona itekitekivu, e sega tale ga na nona itinitini. Mai na rai vakatamata “na iwiliwili ni nona yabaki e sega ni katumi rawa.”—Jope 36:26.

Kena yaga: E yalataka na Kalou nida na rawata na bula tawamudu ke da kilai koya sara vakavinaka. (Joni 17:3) Ena nuitaki vakacava na ka e yalataka qori na Kalou ke sega mada ga ni bula tawamudu? Na “Tui [ga] ni veitabagauna” e rawa ni vakayacora na yalayala qori.—1 Timoci 1:17.

VAKANANANU NI KALOU: Eda vulica ena iVolatabu ni “sega ni dikevi rawa na ka e kila tu” na Kalou, ni cecere sara na nona vakanananu ni vakatauvatani kei keda. (Aisea 40:28; 55:9) E taroga tale na iVolatabu na taro vakavure vakasama qo: “O cei e kila na vakanananu ni Kalou me dusimaki koya?”—1 Korinica 2:16, iVolatabu na English Standard Version.

Kena yaga: E rawa ni rogoca na Kalou ena dua ga na gauna na nodra masu e vica vata na milioni. (Same 65:2) E kauaitaka mada ga na siparo e lutu ina qele. Vakacava ena curuoso nona vakanananu na Kalou, me sega kina ni rogoca se kila na nomu masu? E sega, ni sa rui cecere na nona vakanananu. Koya e bibi nida “talei sara vei ira na siparo.”—Maciu 10:29, 31.

KA E CAKAVA: E kaya na iVolatabu ni “sega ni katuma rawa na tamata na ka e cakava na Kalou dina mai na kena itekitekivu me yacova na kena itinitini.” (Dauvunau 3:11) Eda na sega gona ni kila na veika kece me baleta na Kalou. Na vuku e laurai ena ka e cakava e ‘dredre kina me kilai’ na nona sala kece. (Roma 11:33) Ia e tu vakarau me vakaraitaka na nona sala vei ira na via vakamarautaki koya dina.—Emosi 3:7.

Kena yaga: Ke o dau wilika na iVolatabu o qai vulica, ena levu tiko ga na ka vovou o kila me baleta na Kalou kei na nona sala. Kena ibalebale qo nida na rawa ni toro volekata na Tamada vakalomalagi me tawamudu.

Nida sega ni kila eso na ka me baleta na Kalou, e sega ni kena ibalebale qori nida sa sega sara ga ni kilai koya rawa. E vutucoqa ena iVolatabu na itukutuku eda rawa ni kila vinaka kina na Kalou. Dikeva mada qo e vica:

YACA NI KALOU: Eda vulica ena iVolatabu ni Kalou e vakatokayacataki koya ga. E kaya: “O yau o Jiova. Qori na yacaqu.” E volai vaka7,000 vakacaca na yaca ni Kalou ena iVolatabu, levu duadua ni vakatauvatani kei na so tale na yaca.—Aisea 42:8.

Kena yaga: E cavuta o Jisu ena masu a vakavulica: “Tamai keimami mai lomalagi, me vakarokorokotaki na yacamuni.” (Maciu 6:9) Vakacava o rawa ni cavuta tale ga na yaca ni Kalou ni o masu? E vinakata o Jiova me vakabulai ira era doka na yacana.—Roma 10:13.

NONA ITIKOTIKO: E vakamacalataka na iVolatabu e rua na itikotiko, dua na vuravura eda bula kina kei na maliwalala, dua tale na nodra itikotiko na ka bula vakayalo. (Joni 8:23; 1 Korinica 15:44) Ena iVolatabu, na vosa “lomalagi” e dau vakaibalebaletaki ena nodra itikotiko na ka bula vakayalo. Koya gona, na “lomalagi” e nona “itikotiko” na Dauveibuli.—1 Tui 8:43.

 Kena yaga: O na kila vinaka kina na Kalou. Na Dauveibuli o Jiova e sega ni dua na igu kaukaua tawakilai e veituyaki. E bula dina tiko, e dua tale ga nona itikotiko dei. E “sega ni vunitaki vua e dua na kabuli.”—Iperiu 4:13.

NONA ITOVO NA KALOU: E vakavulica na iVolatabu ni tiko nona itovo talei o Jiova. Na “Kalou ga na loloma.” (1 Joni 4:8) E sega ni lasu rawa. (Taito 1:2) E sega ni dau veivakaduiduitaki, e dauyalololoma, dauveinanumi, qai berabera ni cudru. (Lako Yani 34:6; Cakacaka 10:34) Era na kurabuitaka mada ga e levu ni vinakata na Dauveibuli me “veitokani voleka” kei ira era dokai koya.—Same 25:14.

Kena yaga: O rawa ni itokani i Jiova. (Jemesa 2:23) Ni o sa kila na nona itovo, ena qai matata vei iko na ka era volatukutukutaki tu ena iVolatabu.

E matata na kena ivakamacala na Kalou o Jiova ena iVolatabu. E vinakata sara ga na Dauveibuli mo kilai koya. E yalataka nona Vosa: ‘Ke o qarai koya, ena vakatakilai koya vei iko.’ (1 Veigauna 28:9) Vakacava mo wilika qai vakasamataka vakatitobu na ka e volatukutukutaki ena iVolatabu mo kila kina na Kalou? Ke o cakava qori, e yalataka na iVolatabu ni na “toro voleka mai vei [iko]” na Kalou.—Jemesa 4:8.

O na rairai vakasamataka, ‘Rawa vakacava niu nona itokani na Dauveibuli keu sega mada ga ni kila na veika kece me baleti koya?’ Vakasamataka mada qo: Ke o veitokani kei na dua na dauniveisele, vakacava ena vinakati mo vakaivola tale ga ena veiqaravi vakavuniwai? Sega! Ena rairai duidui na nomudrau cakacaka. Ia se rawa tiko ga ni drau veitokani voleka. Bibi ga mo kila vinaka na nona itovo na nomu itokani, na ka e taleitaka kei na ka e sega ni taleitaka. O rawa tale ga ni kila na itovo i Jiova ena iVolatabu—na ka sara ga e bibi mo drau rawa kina ni veitokani.

E sega ni wereubiubi tale na iVolatabu me baleta na kena ivakamacala na Dauveibuli, e tiko sara ga kina na itukutuku e bibi meda kilai koya vinaka kina. Vakacava o via kila e levu tale na ka me baleta na Kalou o Jiova? Era dau veivakavulici wale ena iVolatabu na iVakadinadina i Jiova. Oni uqeti moni veivosaki kei na dua na iVakadinadina ena nomuni yasayasa se rai ena neimami website, na www.pr418.com.