E sega ni cavuti ena iVolatabu na Halloween. E veiyabaki e levu era solevutaka na olodei qori ena ika31 ni Okotova. Ia na kena itekitekivu kei na kena ivakarau, e veisaqasaqa kei na ivakavuvuli vakaivolatabu.

Ena ulutaga qo

•  iTalanoa makawa ni Halloween kei na kena ivakarau

•  E dodonu meda kauaitaka ni vu mai na lotu butobuto na Halloween?

•  Cava e vakatokai kina me Halloween?

•   Samhain: E kaya na ivola The World Book Encyclopedia, ni itekitekivu ni Halloween e vu mai na nodra “solevutaka o ira na lewenilotu na Celt ena 2000 na yabaki sa oti, era vakabauta ni o ira na mate e maliwai ira na bula tiko. Ena gauna ni Samhain, era dau sikovi ira na mate o ira na bula tiko.”—Raica “ Cava e Vakatokai Kina me Halloween?”

•   iSulu, loli, trick se treat: E tukuni ena dua na itukutuku, era dau dara na matavulo rerevaki eso na lewenilotu na Celt, mera nanuma kina na yalo velavela ni o ira qori era yalo tale ga mera kua kina vakasagai. Eso era dau solia na loli vei ira na yalo me vakalomavinakataki ira. a

   Era uqeta na bete ni lotu Katolika e Urope na solevutaki ni soqo qori. Era dara na kena isulu na lewenilotu, ra qai gole ena veivale mera kere iloloma.

•   Ghost, vampire, werewolve, bui tevoro, kei na zombie: E vakabauti tu ni o ira qori era bula ena vuravura ni yalo. E kaya na ivola na Halloween Trivia, ni tu vei ira na “kaukaua vuni e veisemati kei ira na mate, se na rerevaki ni mate.”

•   Papukeni ni Halloween: E Urope, “era dau gole e veivale o ira na dau marautaka na Halloween mera kere kakana me isau ni nodra masu na mate.” Era kauta tale ga na “papukeni ceuti e waqa tu e loma na kadrala, e vakaibalebaletaka na yalo e vesu tu mai puregatorio.” (Halloween—From Pagan Ritual to Party Night) Eso era tukuna ni dau vakayagataki qori me kauta tani na yalo velavela. Ena veiyabaki ni 1800, e tekivu vakayagataki e Noca Amerika na papukeni ni levu qai rawarawa na kena ceuti.

 Io. Eso era nanuma ni ka ni lasa, e sega tale ga ni ca na Halloween. Ia na ka e caka kina e veisaqasaqa kei na ivakavuvuli vakaivolatabu. E yavutaki ena ivakavuvuli lasu me baleti ira na mate, yalo velavela, kei na timoni.

 Dikeva mada qo eso na tikinivolatabu e vakaraitaka nona rai na Kalou me baleta na Halloween:

•   “Me kakua ni dua vei kemuni me . . . taroga na yalo velavela, se kaciva na tamata sa mate.”—Vakarua 18:10-12, The Jerusalem Bible.

   Kena ibalebale: E sega ni vakadonuya na Kalou meda veitaratara kei ira na mate, se meda lasutaka nida veivosaki kei ira.

•   “O ira na mate era sega sara ga ni kila e dua na ka.”—Dauvunau 9:5.

   Kena ibalebale: O ira na mate era sega tu ni vakila e dua na ka, era na sega ni rawa gona ni vosa vei ira na bula tiko.

•   “[Kua] ni vakaivotavota kei ira na timoni. O sega ni rawa ni gunuva na bilo ni Turaga, kei na bilo tale ga ni timoni.”—1 Korinica 10:20, 21, New International Version.

   Kena ibalebale: O ira na vinakata me vakadonui ira na Kalou, e sega ni dodonu mera veitaratara kei ira na timoni.

•   ‘Vorata na ivadi qaseqase ni Tevoro . . . eda veivala kei ira . . . na yalo ca tawarairai.’—Efeso 6:11, 12.

   Kena ibalebale: O ira na lotu vaKarisito e dodonu mera vorata na yalo ca tawarairai, mera kua ni solevutaka.