Nodra Cakacaka na Yapositolo 10:1-48
10 E tiko e Sisaria e dua na turaga na yacana o Konilio, e turaganivalu* ni dua na iwasewase* ni mataivalu ni Itali.
2 E daulotu qai rerevaka na Kalou kei ira kece na lewe ni nona vuvale. E dau soli iloloma vakalevu vei ira na lewenivanua era vakaleqai tu, e dau masu tale ga vua na Kalou.
3 Rauta na ikaciwa ni aua,*+ e raica ena raivotu ni lako yani vua e dua na agilosi ni Kalou qai kaya: “Konilio!”
4 E wanonova na agilosi o Konilio, e tuburi koya na rere qai kaya: “Na cava Turaga?” E kaya vua: “Sa rogoca na Kalou na nomu masu, e kauaitaka tale ga na nomu dau soli iloloma vei ira na vakaleqai tu, ena nanumi iko kina o koya.+
5 O koya gona mo talatala mada i Jopa me lako mai o Saimoni, e yacana tale ga o Pita.
6 E vakaicili tiko o koya ena vale i Saimoni, e daucaka leca. E tiko nona vale mai baravi.”
7 Ni sa lesu na agilosi a vosa vei Konilio, e kaciva sara e rua nona dauveiqaravi kei na dua na sotia daulotu mai vei ira na nona dauveiqaravi,
8 e talanoataka vei ratou na ka kece qai talai ratou i Jopa.
9 Ena siga e tarava ni ratou sa volekata yani na koro, a lako cake o Pita ina delanivale me masu rauta na ikaono ni aua.*
10 Ia dua na ka nona viakana. Nira se vakarau kakana tiko, e qai raivotu o Pita.+
11 E raica ni tadola o lomalagi qai dua na ka e vaka na siti lineni vakaitamera e biu sobu mai vuravura ena tutuna vava,
12 qai tawa tu e loma na veimataqali manumanu yavaiva, na manumanu qasi e delaniqele, kei na manumanuvuka ni lomalagi.
13 E qai kaya vua e dua na domo: “Tucake Pita, vakamatea mo kania!”
14 Ia e kaya o Pita: “Sega sara Turaga, au se sega vakadua ni kania na ka e dukadukali se tawasavasava.”+
15 E vosa tale vua ena ikarua ni gauna na domo ya, e kaya: “Kua ni tukuna ni dukadukali na ka sa vakasavasavataka na Kalou.”
16 E yaco tale qo ena ikatolu ni gauna, oti sa qai kau cake i lomalagi na ka e vaka na siti lineni.
17 Ni se veilecayaki voli ga o Pita ena vuku ni raivotu qai sega ni kila se cava na kena ibalebale, eratou sa vaqara mai na vale nei Saimoni na tagane e tala mai o Konilio, ratou sa mai tu sara e matamata.+
18 Eratou kaci yani, eratou taroga se vakaicili tiko e kea o Saimoni, e yacana tale ga o Pita.
19 Ni se vakasamataka tiko ga o Pita na raivotu, e kaya na yalo tabu:+ “Raica! Eratou tarogi iko tiko e tolu na tagane.
20 Tucake, lako sobu i ra mo lai tomani ratou, kua tale ni lomalomarua, o yau ga au talai ratou yani.”
21 E qai lako sobu o Pita vei ratou na tagane, e kaya: “O yau ga qo dou vaqara tiko. Dua na ka dou vinakata?”
22 Eratou kaya: “Keitou lako mai ena vuku i Konilio+ e dua na turaganivalu yalododonu, e dau rerevaka na Kalou, ra qai dau taleitaki koya kece na Jiu. A vakaroti koya na agilosi savasava ni Kalou me talatala mai moni lako i nona vale me rogoca na ka o na tukuna.”
23 E mani sureti ratou i vale me ratou nona vulagi.
E gole vata kei ratou ena siga tarava, e tomani koya tale ga eso na veitacini mai Jopa.
24 Eratou qai yaco yani i Sisaria ni oti tale e dua na siga. Sa namaki ratou tiko mai o Konilio, e sureti ira tale ga na wekana, kei ira nona itokani voleka.
25 Ni curu yani o Pita sa tavaki koya mai o Konilio, e cuva e yavana qai vakarokoroko vua.
26 E tauri koya cake o Pita qai kaya vua: “Tucake, au tamata tale ga o yau.”+
27 Ni rau veivosaki tiko e curu sara i loma qai raica nira sa tu e kea e le levu.
28 E kaya vei ira: “Oni kila vinaka ni cala vua na Jiu me veitokani se lako vua e dua tale na matatamata,+ ia e vakaraitaka vei au na Kalou meu kua ni vakatoka e dua me dukadukali se tawasavasava.+
29 Ni o talatala yani au mani lako mai, au sega tale ni lomalomarua. Au via kila gona na vuna oni talatala yani kina.”
30 Sa qai kaya o Konilio: “Gauna vata va qo ena va na siga sa oti au a masu tiko e noqu vale ena ikaciwa ni aua,* e qai rairai e mataqu e dua na tagane e ramase nona isulu,
31 e kaya: ‘Konilio, sa rogoci na nomu masu, e sega ni guilecavi tale ga ena mata ni Kalou na nomu dau soli iloloma.
32 O koya gona, mo talatala mada i Jopa me lako mai o Saimoni e yacana tale ga o Pita. E vakaicili tiko ena vale nei Saimoni, e daucaka leca. E tiko nona vale mai baravi.’+
33 Au talatala sara yani moni lako mai. Vinaka vakalevu nomuni yaco mai. Keimami sa mai tu qo ena mata ni Kalou me keimami rogoca na ka kece e vakaroti kemuni kina o Jiova* moni tukuna.”
34 Sa qai kaya o Pita: “Au sa qai kila qo ni sega ni dau veivakaduiduitaki na Kalou,+
35 ia e vakadonui ira era dokai koya ra qai cakava na ka e vinakata mai na veivanua kece.+
36 E vakatakila yani o koya vei ira na luvei Isireli na itukutuku vinaka ni vakacegu+ e rawati ena vuku i Jisu Karisito—o koya qo e noda Turaga kece.+
37 Oni kila na ka a veivosakitaki e Jutia kece me tekivu mai Kalili,+ ni oti na veipapitaisotaki a vunautaka voli o Joni:
38 me baleti Jisu mai Nasareci, ni lumuti koya na Kalou ena yalo tabu+ kei na nona solia vua na kaukaua, e qai lakova e levu na vanua me cakava e levu na ka vinaka, me vakabulai ira e vakararawataki ira na Tevoro,+ ni tiko vata kei koya na Kalou.+
39 Keimami vakadinadinataka na ka kece e cakava ena nodra vanua na Jiu, vaka kina e Jerusalemi. Ia era vakamatei koya ena nodra vakaliligi koya ena kau.*
40 E vakaturi koya cake na Kalou ena ikatolu ni siga+ qai vakatara me vakaraitaki koya,
41 e sega ni vakaraitaki koya vei ira kece na lewenivanua, vei ira ga na ivakadinadina sa lesi ira oti na Kalou, vei keimami na kana, keimami gunu vata tale ga kei koya ni sa vakaturi mai na mate.+
42 E vakaroti keimami tale ga me keimami vunautaka sara vakavinaka vei ira na lewenivanua+ ni o koya ga qo e lesia na Kalou me nodra turaganilewa na bula kei na mate.+
43 Era tukuni koya na parofita kece,+ ni o koya e vakabauti koya ena vosoti na nona ivalavala ca ena vuku ni yacana.”+
44 Ni se tukuna tiko ga o Pita na ka kece qo, sa sobuti ira kece na vakarorogo tiko na yalo tabu.+
45 Eratou kurabui na Jiu vakabauta* eratou salavata mai kei Pita ni ratou raica ni sa sovaraki tale ga vei ira na kai veimatanitu na isolisoli ni yalo tabu.
46 Eratou rogoca nodra vosataka na vosa ni veivanua tale eso* kei na nodra vakacerecerea na Kalou.+ E qai kaya o Pita:
47 “Vakacava ena dua e bureitaka na wai mera kua kina ni papitaiso o ira qo+ ni sa sobuti ira na yalo tabu me vakataki keda ga?”
48 E mani vakarota mera papitaiso ena yaca i Jisu Karisito.+ Era qai kerea me tiko vata kei ira me vica tale na siga.
iVakamacala e ra
^ E liutaka e 100 na sotia.
^ Se “ilawalawa sotia,” dua na iwasewase lewena e 600 na sotia ni Roma.
^ Rauta na tolu na kaloko ena yakavi.
^ Rauta na 12 na kaloko ena sigalevu.
^ Oya rauta na 3 na kaloko ena yakavi.
^ Se “vunikau.”
^ Kir., “ira na vakabauta era cili.”
^ Kir., “na duivosavosa.”
