Vola o Joni 8:12-59
8 12 E kaya tale vei ira o Jisu: “O yau na rarama kei vuravura.+ O koya e muri au ena sega sara ni lako ena butobuto, ena cilavi koya ga na rarama+ e veivakabulai.”
13 Era mani kaya vua na Farisi: “O tukuni iko tiko ga, e sega ni dina na nomu itukutuku.”
14 E sauma vei ira o Jisu: “Keu tukuni au mada ga, e dina na noqu itukutuku niu kila na vanua au lako mai kina kei na vanua au lako tiko kina.+ Ia o kemuni, oni sega ni kila na vanua au lako mai kina kei na vanua au lako tiko kina.
15 E dau vakayago+ na lewa oni tauca, ia o yau, au sega sara ni vakatauca na kena lewa e dua.
16 Ia keu vakatulewa mada ga, ena dodonu noqu vakatulewa niu sega ni tiko duadua, e tiko vata kei au na Tamaqu e talai au mai.+
17 E volai tale ga ena nomuni Lawa: ‘E dina na nodrau itukutuku na le rua.’+
18 Au dau tukuni au, e dau tukuni au tale ga o Tamaqu e talai au mai.”+
19 Era sa qai tukuna vua: “I vei o Tamamu?” E sauma o Jisu: “Oni sega ni kilai au, oni sega tale ga ni kilai Tamaqu.+ Ke oni kilai au, oni na kilai Tamaqu tale ga.”+
20 E cavuta na vosa qo ena vanua era tu kina na kato ni iyau,+ ni veivakavulici tiko ena valenisoro. Ia e sega ni dua e vesuki koya ni se bera ni yaco mai na nona gauna.+
21 E mani tukuna vei ira: “Au sa lako qo, oni na vaqarai au, ia oni na mate ena nomuni valavala ca.+ Na vanua au lako kina oni na sega ni lako rawa yani kina.”+
22 Era qai kaya na Jiu: “De dua sa via lai vakamatei koya! ni kaya, ‘Na vanua au lako kina oni na sega ni lako rawa yani kina.’”
23 E kaya tale vei ira: “O kemuni oni lako mai ra, o yau au lako mai cake.+ Oni vu mai vuravura, o yau au sega ni vu mai vuravura qo.
24 Oya na vuna au kaya kina vei kemuni: Oni na mate ena vuku ni nomuni valavala ca. Ke oni sega ni vakabauta ni o yau ga o koya, oni na mate ena nomuni valavala ca.”
25 Era mani tarogi koya: “O cei o iko?” E sauma o Jisu: “Na cava mada au mai vosa tiko kina vei kemuni?
26 Levu na ka au via tukuna me baleti kemuni, e levu tale ga na ka meu vakatulewa kina. E dina o koya e talai au mai, na veika au rogoca vua au tukuna i vuravura.”+
27 Era sega ni kila ni tukuni Tamana tiko vei ira.
28 Mani kaya o Jisu: “Ni oni sa laveta cake na Luve ni tamata,+ oni na qai kila ni o yau ga o koya,+ niu sega tale ga ni cakava vakataki au e dua na ka,+ ia au tukuna ga na ka e vakavulici au kina o Tamaqu.
29 E tiko vata kei au o koya e talai au mai, e sega ni biuti au taudua tu, niu dau cakava na ka e vinakata.”+
30 Ni vakamacalataka tiko na ka kece qo, e levu era vakabauti koya.
31 E qai kaya o Jisu vei ira na Jiu era vakabauti koya: “Oni noqu tisaipeli dina ke oni muria tiko ga na noqu vosa,
32 oni na kila na ka dina,+ na ka dina ena qai sereki kemuni.”+
33 Era kaya vua: “O keimami qo na kawa i Eparama, keimami se sega ni bau bobula vua e dua. O qai kaya vakacava, ‘Oni na sereki’?”
34 E kaya vei ira o Jisu: “Au tukuna vakadodonu sara vei kemuni, o koya yadua e valavala ca e bobula ina ivalavala ca.+
35 Na bobula tale ga ena sega ni lewe tudei ni vuvale, na luvei itaukeinivale ga ena tiko kina me tawamudu.
36 O koya gona, ke sa sereki kemuni na Luvena, oni sa qai sereki dina.
37 Au kila ni oni kawa i Eparama. Ia oni via vakamatei au ni oni sega ni vakabauta na noqu vosa.
38 Au tukuna ga na ka au raica vei Tamaqu,+ ia o kemuni, ni cakava ga na ka oni rogoca vei tamamuni.”
39 Era mani kaya vua: “E tamai keimami o Eparama.” Qai kaya vei ira o Jisu: “Ke oni luvei Eparama,+ ni cakava na cakacaka i Eparama.
40 Ia qo oni sa via vakamatei au niu tukuna vei kemuni na ka dina au rogoca vua na Kalou.+ A sega ni cakava qo o Eparama.
41 Oni cakava na cakacaka i tamamuni.” Era kaya vua: “Keimami sega ni luve ni dukadukali,* e dua ga na Tamai keimami, na Kalou.”
42 E kaya vei ira o Jisu: “Ke Tamamuni na Kalou, oni na lomani au,+ ni talai au mai na Kalou. Au sega ni lako mai ena noqu inaki ga, e talai au mai o koya.+
43 Cava oni sega ni kila kina na ka au tukuna tiko? Baleta oni sega ni via rogoca noqu vosa.
44 E tamamuni na Tevoro, oni vinakata tale ga moni cakava na gagadre i tamamuni.+ E daulaba o koya mai na ivakatekivu,+ e sega ni dei ena dina, ni sega vua na dina. Ni vosa lasu, e vosataka ga na ka e tu e lomana, ni daulasulasu, e tama ni lasu tale ga.+
45 Ia o yau, niu tukuna vei kemuni na ka dina, oni sega ni vakabauti au.
46 O cei vei kemuni e rawa ni vakadinadinataka niu valavala ca? Keu tukuna tiko na ka dina, na cava oni sega ni vakabauti au kina?
47 O koya e nona na Kalou e rogoca na vosa ni Kalou.+ Qo na vuna oni sega kina ni vakarorogo, ni oni sega ga ni nona na Kalou.”+
48 Era mani kaya vua na Jiu: “Vakacava e sega ni dina na neimami kaya, ‘O kai Samaria+ qai curumi iko tiko na timoni’?”+
49 E sauma o Jisu: “E sega ni curumi au na timoni, au rokovi Tamaqu ga, ia o kemuni oni beci au dina.
50 Au sega ni vinakata meu vakalagilagi,+ e dua ga e vakasaqaqara qai vakataulewa tiko.
51 Au tukuna vakadodonu sara vei kemuni, ke dua e muria na noqu vosa, ena sega sara ni mate.”+
52 Era kaya vua na Jiu: “Keimami sa qai kila ni curumi iko dina tiko na timoni. Sa mate o Eparama, era sa mate tale ga na parofita, ia o kaya, ‘Ke dua e muria na noqu vosa, ena sega sara ni mate.’
53 O sa uasivi Eparama na tamai keimami sa mate? Era sa mate tale ga na parofita. O cei o iko?”
54 E qai kaya o Jisu: “Keu vakalagilagi au, ena ka wale na noqu lagilagi. O Tamaqu ga e vakalagilagi au,+ o koya oni kaya tiko ni nomuni Kalou.
55 Oni sega ga ni kilai koya,+ ia au kilai koya.+ Keu kaya niu sega ni kilai koya, au sa na tautauvata kei kemuni, au tamata lasulasu. Ia au kilai koya, au muria tale tiko ga na nona vosa.
56 Dua na ka nona vakanuinui tu na tamamuni o Eparama me raica noqu gauna, a raica dina qai marautaka vakalevu.”+
57 Era qai kaya vua na Jiu: “O se bera mada ga ni yabaki 50, o raici Eparama tu mai vei?”
58 E qai kaya vei ira o Jisu: “Au tukuna vakadodonu sara vei kemuni, au a bula e liu qai muri sara o Eparama.”+
59 Era qai tomi vatu mera vakaviriki Jisu, ia e vuni qai lako tani mai na valenisoro.
iVakamacala e ra
^ Se “veiyacovi tawadodonu.” Kir., por·neiʹa. Raica na iVakamacala ni Vosa.
