Oho. Bible no kã no kofee dɛ Nyankopɔn na ɔbɔɔ nyimpa, mbowa nye nhaban ahorow “dɛ mbrɛ hɔn su tsetsee” no. a (Genesis 1:12, 21, 25, 27; Nyikyerɛ 4:11) Bible no ma yehu dɛ nyimpa nyina yɛ Adam na Eve hɔn asefo. Hɔn na wɔyɛ hɛn awofo a wodzi kan. (Genesis 3:20; 4:1) Bible no nnkã no wɔ beebiara dɛ Nyankopɔn nam adandandzi do na ɔbɔɔ ndzɛmba ahorow ahorow a nkwa wɔ mu no. Abɔdzenyansahufo kã dɛ, sɛ efa abɔdze pɔtsee bi a nkwa wɔ mu a, ibohu dɛ wogu mu ahorow ahorow. Na biribiara nnyi Bible no mu a ɔnye dɛm asɛm yi bɔ ebira.

•  Aso Nyankopɔn maa abɔdze dandanee mbrɛ ɔbɛyɛ a obenya abɔdze afofor anaa?

•  Aso adandandzi nye Bible no hyia anaa?

•  Ɔyɛ a mbowa na ndua bi sesa kakra mbrɛ ɔbɛyɛ a wobotum atsena anaa woeenyin wɔ beebi a wɔwɔ no. Ana iyi yɛ adandandzi?

 Nyimpa a wɔgye dzi dɛ Nyakopɔn nam adandandzi do na ɔbɔɔ adze no, ɔsor mbrɛ hɔn mu biara kã wɔ asɛm yi ho. Dɛ nhwɛdo no, Encyclopædia Britannica kã dɛ “ɔkwan kor a Nyankopɔn fa do toto ndzɛmba wɔ wiadze yi mu nye dɛ, ndua anaa mbowa a wobotum egyina wimu tsebea nye akwansidze ahorow ano no, hɔn na wɔtsena wiadze yi mu.”

 Nyimpa a wɔgye dzi dɛ Nyankopɔn nam adandandzi do na ɔbɔɔ adze no, wɔsan so kã dɛ:

•   Abɔdze a nkwa wɔ mu nyina fi abɔdze bi a ɔwɔ hɔ fir tsetseetse no mu na wɔbae.

•   Abɔdze kor a nkwa wɔ mu botum adandan dɛm araa abɛyɛ abɔdze fofor koraa.

•   Ɔyɛ Nyankopɔn na ɔma adandandzi ahorow yi kɔ do.

 Nyimpa a wɔgye adandandzi dzi no kã dɛ adzebɔ ho nsɛm ɔwɔ Genesis nwoma no mu no nnyɛ nokwar koraa. Naaso Jesus twee adwen sii Genesis nwoma no do dɛ ɔyɛ abakɔsɛm a ɔyɛ nokwar. (Genesis 1:26, 27; 2:18-24; Matthew 19:4-6) Bible no kã dɛ Jesus tsenaa Nyankopɔn nkyɛn wɔ sor ansaana ɔreba asaase do, na ɔboaa Nyankopɔn ma ɔbɔɔ “adze nyina.” (John 1:3) Ntsi asɛm a wɔkã dɛ Nyankopɔn nam adandandzi do na ɔbɔɔ ndzɛmba ahorow no nnye Bible no nnhyia.

 Sɛ efa dua anaa abowa pɔtsee bi a, Bible no nnkyerɛ n’ahorow ahorow a yebotum enya. Afei so, biribiara nnyi Bible no mu a ɔnye nsɛm ebien a odzidzi do yi bɔ ebira: sɛ ndua anaa mbowa wo mba a, mba no tum sesa kakra fi hɔn awofo ho; ɔyɛ a ndua nye mbowa bi tum sesa kakra mbrɛ ɔbɛyɛ a wobotum atsena beebi a wɔwɔ. Ɔtɔfabi na sɛ mbowa anaa ndua bi sesa kakra a, nyimpa binom kã dɛ ɔyɛ adandandzi. Naaso sɛ abɔdze a nkwa wɔ mu sesa wɔ dɛm kwan yi do a ɔnndan mmbɛyɛ abɔdze fofor bi.