N̄KPARAWA OWO ẸBỤP
Ndi Ẹkebobot M̀mê N̄kpọ Okofoforo?—Ikpehe 2: Nso Ikpanam Okûnịm ke N̄kpọ Okofoforo?
Ibuot oyon̄ Alex. Enye enịm ke Abasi odu onyụn̄ enịm ke ẹkebobot kpukpru n̄kpọ. Edi mfịn, andikpep mmọ enen̄ede ọsọn̄ uyo etịn̄ ke n̄kpọ okofoforo, onyụn̄ anam etie nte ke ukpepn̄kpọ emi ẹdọhọde ke n̄kpọ okofoforo edi akpanikọ, n̄ko ke se ntaifiọk ẹtịn̄de ẹban̄a ukpepn̄kpọ oro edi akpanikọ. Alex iyomke ndifan̄a ye se andikpep mmọ etịn̄de. Enye ọdọhọ idemesie ete: ‘Edieke edide ntaifiọk ẹdọhọ ke n̄kpọ okofoforo, ami ndi anie ndifan̄a se mmọ ẹtịn̄de?’
Ekpedi afo ke se inemede emi ọkọwọrọ, nso ke akpakanam? Yak idọhọ ke se afo enịmde edi se Bible etịn̄de nte ke “Abasi okobot enyọn̄ ye isọn̄.” (Genesis 1:1) Edi, idahaemi mme owo ẹdomo ndinam fi enịm ke mme n̄kpọ ẹkefoforo, ke owo ikobotke-bot mmọ. Ndi akpana enịm se ẹtịn̄de oro? Nso ikpanam okûnịm ke n̄kpọ okofoforo?
Ntak iba emi mûkpunịmke ke n̄kpọ okofoforo
Idịghe kpukpru ntaifiọk ẹnyịme ke n̄kpọ okofoforo. Kpa ye edide ediwak isua ẹbe tọn̄ọ ẹketọn̄ọ ndinam ndụn̄ọde mban̄a n̄kpọ ndifoforo, idịghe kpukpru ntaifiọk ẹnịm ke n̄kpọ okofoforo sia mmọ isụk inyeneke n̄kpọ ndiwụt ke n̄kpọ okofoforo.
Kere ise: Edieke kpukpru ntaifiọk mînyimeke ke n̄kpọ okofoforo ke ini edide mmọ ẹkpekam ẹdi mbon emi ẹkpenamde mme owo ẹnịm ke n̄kpọ okofoforo, ndi emekere ke ọfọn ndinịm utọ ukpepn̄kpọ oro?—Psalm 10:4.
Ana se inịmde edi akpanikọ. Ekpri eyeneren kiet emi ekerede Zachary ọdọhọ ete: “Ekpedi n̄kpọ okofoforo, ọwọrọ uwem nnyịn—ye ofụri se idude ke ekondo—ikpenyeneke ufọn.” Se enye etịn̄de oro esịne ifiọk, sia ekpedi ke n̄kpọ okofoforo, ọwọrọ se Abasi ọn̄wọn̄ọde ndinam nnọ nnyịn ikpenyeneke ufọn. (1 Corinth 15:32) Edieke edide ke ẹkebobot n̄kpọ, ọwọrọ imekeme ndikụt ibọrọ emi edidọn̄de nnyịn esịt ke mbụme ekededi emi inyenede oro aban̄ade uwem ye se Abasi edinamde inọ nnyịn ke ini iso.—Jeremiah 29:11.
Kere ise: Nso ufọn ke afo edidia edieke ọdiọn̄ọde nnennen se Bible etịn̄de ke n̄kpọ aban̄ade m̀mê ẹkebobot n̄kpọ m̀mê n̄kpọ okofoforo?—Mme Hebrew 11:1.
Mme mbụme emi okpobụpde idemfo
NDUSỤK OWO ẸDỌHỌ: ‘Kpukpru n̄kpọ ke ekondo ẹkedaha ntre ẹdidu.’
Anie mîdịghe nso ikanam mme n̄kpọ ẹdaha ntre ẹdidu?
Ewe ke otu emi edi akpanikọ—kpukpru n̄kpọ ẹkedaha ntre ẹdidu mîdịghe enyene owo emi okobotde n̄kpọ?
NDUSỤK OWO ẸDỌHỌ: ‘Owo okoto ke unam oforo.’
Edieke owo okotode ke unam oforo—ke uwụtn̄kpọ, utọ nte ebọk—ntak emi nte owo ekerede n̄kpọ onyụn̄ anamde n̄kpọ esinen̄erede okpụhọde ye eke unam? a
Nso inam mme odu uwem n̄kpọ, idem ekpededi ata n̄kpri n̄kpri, ẹnyene ndyọ? b
NDUSỤK OWO ẸDỌHỌ: ‘Mme n̄kpọ do ndiwụt ke n̄kpọ okofoforo.’
Edi, ndi mmọ ẹkeme ndiwụt fi n̄kpọ kiet ke otu emi?
Owo ifan̄ inịm ke n̄kpọ okofoforo ke ntak emi ẹkedọhọde mmọ ke se mbon en̄wen ẹnịmde edi oro?
a Ediwak owo ẹdọhọ ke se inamde etie ntre edi ke mfre nnyịn enen̄ede okpon akan eke mme ebọk. Edieke oyomde ndidiọn̄ọ ntak emi utọ ekikere oro mîdịghe akpanikọ, se ekpri ediye n̄wed oro The Origin of Life—Five Questions Worth Asking, page 28.
b Se ekpri ediye n̄wed oro The Origin of Life—Five Questions Worth Asking, page 8-12.
