Si Nicolas asin Céline napaatubang sa ibang klaseng kadipisilan. Inako ninda an sarong asignasyon hali sa sangang opisina sa France na maglipat sa sarong kongregasyon. Inistorya ninda: “Kan primero excited kaming marhay, pero pagkatapos, nadipisilan kami ta napupungaw na kami sa mga amigo mi. Bako pa kaming gayong ugos sa mga tugang sa linipatan ming kongregasyon.” a Huli sa mga kadipisilan na puwedeng mapaatubang saimo, paano ka magigin maugma asin produktibo sa linipatan mong kongregasyon? Ano an puwedeng gibuhon kan iba para makatabang? Asin anong espirituwal na mga bendisyon an puwede mong makamtan asin maihiras sa bago mong kongregasyon?

APAT NA PRINSIPYO NA MAKAKATABANG SAIMO NA MAKA-ADJUST

1. Magsarig ki Jehova. (Sal. 37:5) Si Kazumi, na taga Japan, naghali sa kongregasyon kun sain siya nakaasosyar sa laog nin 20 taon kan an agom niya madestino sa ibang lugar huli sa trabaho. Paano niya ‘ipinagkatiwala ki Jehova an saiyang dalan’? Sinabi niya: “Sinabi ko ki Jehova an gabos na takot, kamunduan, saka kahaditan na namamatian ko. Sa kada ginigibo ko iyan, tinatawan niya ako kan kusog na kaipuhan ko.”

Paano ka urog na magsasarig ki Jehova? Kun paanong an sarong tinanom nangangaipo nin tubig asin sustansiya hali sa daga tanganing magtalubo, an satong pagtubod kaipuhan man nin piguratibong tubig asin sustansiya para magtalubo. Si Nicolas, na sinambit kasubago, nahiling na an paghurop-hurop sa halimbawa ni Abraham, Jesus, asin Pablo—mga lalaking naggibo nin dakul na pagsasakripisyo para magibo an kabutan nin Diyos—nakapakusog kan saiyang pagtitiwala na tatabangan siya ni Jehova. An regular na personal  na pag-adal nin Bibliya dai sana makakatabang sa saimo na makayanan an ano man na pagbabago sa buhay kundi makakatao man iyan sa saimo nin espirituwal na mga regalo na maihihiras mo sa linipatan mong kongregasyon.

2. Likayan an pagkumparar. (Ecl. 7:10) Kan magbalyo si Jules sa Estados Unidos hali sa Benin, kinaipuhan niyang mag-adjust sa ibang marhay na kultura. “Pagmati ko kaidto kaipuhan kong iistorya an buhay ko sa kada tawong nabibisto ko,” an sabi niya. Dahil iba iyan sa nakatudan niya, pinunan niyang isuway an sadiri niya sa kongregasyon. Pero kan mas mabisto niya na an mga tugang, binago niya an pagmansay niya. Sinabi niya: “Narealisar ko na sain man kita digdi sa daga, pare-pareho an mga tawo. Magkakaiba lang sinda sa paagi nin pagpahayag kan sadiri ninda. Mahalagang marhay na akuon ta an mga tawo sa kun ano sinda.” Kaya likayan an pagkumparar sa dati mong kongregasyon. Manungod diyan, arog kaini an sinabi nin sarong payunir na sister na si Anne-Lise: “Dai ako naglipat para hanapon kun ano an binayaan ko. Naglipat ako para makadiskubre nin bagong mga bagay.”

An mga elder kaipuhan man na maglikay na ikumparar an linipatan nindang kongregasyon sa dati nindang kongregasyon. Dai man pirming buot sabihon na sala an mga pamamaaging ginigibo kan mga tugang miling lain iyan sa ginigibo sa dati mong kongregasyon. Sarong kadunungan na aramon nguna an lokal na mga kamugtakan bago magtao nin mga suhestiyon. (Ecl. 3:​1, 7b) Mas marahay na manginot paagi sa halimbawa imbes na ipirit an personal mong mga ideya sa kongregasyon.​—2 Cor. 1:24.

3. Lubos na makikabtang. (Fil. 1:27) An paglipat nangangaipo nin dakul na panahon asin kusog, pero mahalagang marhay na sa puon pa sana mag-atender na sa mga pagtiripon kan kongregasyon—nin in person kun posible. Ta siyempre, kun dai ka pa lamang nahiling o bihira kang mahiling kan mga tugang, paano ka man ninda matatabangan? Si Lucinda, na nagbalyo sa sarong dakulang siyudad sa Timog Aprika kaiba an saiyang duwang aking babayi, nagsabi: “May mga nagsuhestiyon sako na magpokus ako sa pakikidayupot sa mga kakongregasyon ko, sa pagpartner sainda sa ministeryo, asin sa pagpartisipar sa mga pagtiripon. Sinasabi mi man sa mga tugang na puwede nindang gamiton an harong mi para sa mga pagtiripon bago maglingkod sa langtad.”

An ‘iribang pagmamaigot’ sa teokratikong mga aktibidad kaiba an mga tugang sa linipatan mong kongregasyon sarong marahayon na paagi na makakontribwir sa “pagtubod sa maugmang bareta.” Si Anne-Lise, na sinambit sa inutan, dinagka kan mga elder na testingan na makapartner sa paghuhulit an gabos. An resulta? “Narealisar ko tulos na marahayon na paagi ini para mamatian ko na parte ako kan bago kong kongregasyon,” an sabi niya. Saro pa, an pagboluntaryo sa mga aktibidad arog kan paglinig asin pagmentenar kan Kingdom Hall magpaparisa na, para saimo, ini na an kongregasyon mo. Mantang mas lubos kang nakikikabtang sa mga aktibidad kan kongregasyon, mas amay man na magigin komportable sa saimo an mga tugang asin mas amay mo man na mamatian na parte ka na kan bago mong espirituwal na pamilya.

4. Magkaigwa nin bagong mga amigo. (2 Cor. 6:​11-13) An pagpahiling nin personal na interes iyo an pinakamarahay na paagi para magkaigwa nin mga amigo, kaya magtao nin huruhalawig na panahon  bago asin pagkatapos kan mga pagtiripon para dulukon asin bistuhon an mga tugang. Hinguwahon na aramon an saindang pangaran. Kun tatandaan mo an pangaran ninda asin magigin mainamigo ka saka madaling dulukon, gugustuhon ninda na mamidbid ka asin siguradong magigin marahay kamong mag-amigo.

Imbes na pagparaisipon kun ano an gigibuhon mo para akuon ka ninda, pabayaing mabisto ka kan mga tugang kun siisay ka talaga. Arugon an sinabi ni Lucinda, “May mga dayupot na kaming mga amigo ngunyan dahil nag-inisyatiba kami na imbitaran sa harong mi an iba.”

“MAUGMANG AKUON AN LAMBANG SARO”

An paglaog sa sarong Kingdom Hall na diyan mayo ka lamang kaburubisto tibaad nakakahadit para sa iba. Kaya ano an puwede mong gibuhon para dai masakitan an mga bagong lipat? “Maugmang akuon an lambang saro,” an dagka ni apostol Pablo, “kun paanong kamo maugmang inako man kan Cristo.” (Roma 15:7) Paagi sa pag-arog ki Cristo, matatabangan kan mga elder an mga bagong lipat na mamati nindang maugma sindang inaako. (Hilingon an kahon na “ An Makakatabang Para Magin Pasil an Paglipat sa Ibang Kongregasyon.”) Minsan siring, an gabos sa kongregasyon, pati mga aki, puwedeng makatabang sa mga bagong lipat na magkaigwa nin mga amigo.

Kaiba sa maugmang pag-ako sa iba an pagigin mapag-istimar pero puwede man na kaiba diyan an pag-alok nin praktikal na tabang. Halimbawa, sarong sister an nagtao nin panahon para ilibot sa siyudad an sarong bagong lipat asin para tukduan siya kun paano mag-commute. Huli sa ginibo kan sister, napahiro an puso kan bagong lipat asin nakatabang iyan sa saiya na maka-adjust.

SARONG OPORTUNIDAD NA MAGTALUBO

Mantang nagdadakula an sarong duron, nagkapirang beses nguna ining naghihiluno sagkod na makaya na kan mga pakpak kaini na makalayog. Sa kaagid na paagi, pag naglipat ka sa ibang kongregasyon, kaipuhan mong halion an ano man na kahaditan na nakakaulang sa saimo na maibiklad an saimong mga pakpak para makalayog, sabi ngani, sa paglilingkod ki  Jehova. “An paglipat sarong marahayon na pagsasanay,” an sabi ni Nicolas asin Céline. “Tanganing maka-adjust sa bagong mga tawo saka sa ibang kapalibutan, kinaipuhan ming magpatalubo nin bagong mga kuwalidad.” Si Jean-Charles, na sinambit sa kapinunan, may sinabi manungod sa nagin pakinabang sa pamilya niya: “An mga aki mi nagigin mas maygurang saka mas dayupot ki Jehova sa linipatan ming kongregasyon. Pakalihis sana nin pirang bulan, an aki ming babayi nagkaigwa na nin mga kabtang sa pagtiripon sa tahaw kan semana saka su aki mi man na lalaki nagin nang dai pa bawtisadong parahayag.”

Paano kun dai itinutugot kan saimong kamugtakan na magbalyo, halimbawa, sa sarong lugar na mas dakula an pangangaipo? Kun arog kaiyan, puwede mong hinguwahon na mamatian mong garo man sana bago an saimong kongregasyon ngunyan asin iaplikar an nagkapira sa mga suhestiyon na sinambit sa itaas. Mantang nagsasarig ka ki Jehova, lubos na makikabtang sa mga aktibidad kan kongregasyon paagi sa paggibo nin plano na makapartner sa ministeryo an iba asin magkaigwa nin bagong mga amigo o urog na magin dayupot sa dati mo nang mga amigo. Puwede ka daw na mag-inisyatiba na magtao nin praktikal na tabang sa mga baguhan o sa mga nangangaipo? Huling an pagkamuot midbidan nin tunay na mga Kristiyano, mayong duda na an paggibo kaiyan makakatabang sa pagtalubo mo sa espirituwal. (Juan 13:35) Makakasigurado ka na “nauugmang marhay an Diyos sa siring na mga atang.”​—Heb. 13:16.

Sa ibong kan mga kadipisilan, dakul na Kristiyano an nagin mapanggana sa paglipat ninda sa ibang kongregasyon—asin magigibo mo man iyan! “An paglipat nin kongregasyon nakatabang sako na magpahiwas,” an sabi ni Anne-Lise. Kumbinsido na ngunyan si Kazumi na paagi sa paglipat “puwede mong maeksperyensiyahan an pagtabang ni Jehova sa mga paaging dai mo pa lamang naeksperyensiyahan kaidto.” Kumusta man si Jules? Sinabi niya: “Dahil sa mga amigo ko, dai ko na namamatian na mayong gustong mag-ako sako. Ngunyan namamatian kong parte na ako kan bago kong kongregasyon asin na masasakitan na akong bayaan iyan.”